Dizionari de Lenghe Furlane

durâ  du|râ  [FO]

1. v.intr. lâ indevant par une cierte dade di timp:  messaçs publicitaris che a durin dai trente seconts al minût (Max Mauro, Un Friûl difarent: i 90 mhz di Onde Furlane); la comedie e durave une ore e cuarante, ma jo e Bartolini o sin lâts vie dopo 30 minûts: no si podeve plui (Pierluigi Visintin, Friûl e furlans te Histoire de ma vie di Giacomo Casanova)
   Sin. lâ indevant , lâ dilunc
2. v.intr. mantignîsi tal timp cence mudâ, cence ridusisi, cence sparî e v.i.:  no tu âs pensât mai un sôl moment a fâti une famee… e la mê e la tô zoventût crodistu che a durin simpri? (Pieri Somede dai Marcs, Un pugn di moscjis); al scugnive cjatâsi une cjamare e fâsi di mangjâ di bessôl, cussì i bêçs a duravin di plui (Carlo Sgorlon, Prime di sere); i afiets, in chest mont, a nassin, i afiets a durin, i afiets a muerin (Francesc Placerean, Tal matrimoni l'amôr al devente virtût e sacrament dal amôr di Diu par nô); vistîts comprâts cun palanchis sudadis, che a duravin a lunc (Riedo Pup, I furlans e la mode)
   Sin. bati dûr , condurâ , conservâsi , indurâ , intignîsi , resisti , rezi , sussisti , tignî dûr , restâ , lâ indevant , lâ dilunc
   
   1. ancje cuntun predicatîf:  rosis e ramaçs no durin verts trop a lunc (Josef Marchet, Lis predicjis dal muini); cjapâ sium, nancje discori. Masse vivis i duravin tal cjâf lis impressions di Altane (Alan Brusini, Il mâl dal tor)
   2. mantignîsi intune cjarie, posizion, funzion e v.i.:  i ministris in Italie a durin a pene cualchi mês (Riedo Pup, Ocjo di no pintîsi)
3. v.intr. mantignîsi intun bon stât, no lâ di mâl:  il vuardi e il forment a durin se si tegniju ben (Franc Fari, Il cjâf dai furlans)
   Sin. mantignîsi , resisti , tignî , condurâ
4. v.intr. restâ in vite:  nol durà no, siôr Bertin… Nol durà. Une sere al murì, a colp, che al jere a pene lât sot a durmî (Maria Forte, Cjase di Dalban)
   Sin. condurâ , indurâ , lâ indevant , lâ dilunc
5. v.intr. lâ indevant a fâ alc, a tignî un ciert costum e v.i.:  la Bete e durave in chel so rivâ tart de filande (Meni Ucel, Rosaris); [lis fantatis che a vevin vendût lis strecis] a duravin li stagjons cul façalet peât a strent fin che i cjaviei a na tornavin a cressi (Novella Cantarutti, Li streci rossi)

Proverbis:

• al dure l'afiet fin che al dure il confet
• bêçs di lot, di pene e di putane no durin trop
• bontimp fat di gnot nol dure trop
• cualchi volte e dure plui une vite viere che no une gnove
• cui che le dure le vinç
• cui che no le misure, pôc e dure
• cui che si misure le dure
• dutis lis maraveis a durin trê dîs
• e dure plui une cite sclapade che no une gnove
• il timp che si fâs di gnot nol dure trop, chel che si fâs a misdì al dure dut il dì
• il timp fat di gnot al dure tant che l'amôr dai viei
• il timp fat di misdì al dure dut il dì; il timp fat di gnot al dure tant che un cjaval di trot
• il vin si lu misure, il pan si lu mangje fin che al dure
• il zurament dal lôf se al dure une ore al dure trop
• la mode e la fortune a durin tant che la lune
• la nêf denant Nadâl e dure tant che l'açâl
• la ploie di buinore a dure une ore
• la sagre dai amîs a dure cuindis dîs
• lis esagjerazions no durin
• miôr polente che e dure che no pan che al finìs
• nissun ben e nissun mâl nol dure cent agns
• nissun mâl nol dure cent agns
• nissune maravee no dure plui di trê dîs
• nûl a lane al po durâ une setemane,
• ogni grant maravee e dure trê dîs
• ogni marcjât al dure trê dîs
• San Vicenç, grant criùre; Sant Laurinç, grant cjaldure: la une e la altre pôc e dure
• se a 'nt fossin, se a 'nd vignissin, se a 'nd vessin, a son trê sants che a durin dut l'an
• se no si misure, no dure
• tant durassie la triste vicine come che e dure la nêf marçuline
• timp fat di gnot, se al dure une ore al dure trop
• trot di mus al dure pôc
• ue madure, vin che al dure
• un brâf om e un bon vassiel di vin a durin pôc