Dizionari de Lenghe Furlane

rezi  /ré-/  re|zi  [AF]

1. v.tr. tignî sù cdn. o alc, fâ che al stedi sù, che al stedi dret o intune cierte posizion, che nol coli:  pâi che a rezin dôs grandis filis di reticolâts (Ivano Urli, Storie di Min)
   Sin. tignî sù , sostignî , tignî
2. v.tr. vê il podê e la responsabilitât intune istituzion, organizazion, aziende, comunitât e v.i.:  il Pape Benedet XIV […] al pensave che no si podès dislidrisâ i malans che a jerin di ca o di là, corezi lis brutis abitudins, predicjâ ben il vanzeli, intune peraule rezi ben la diocesi di Aquilee cuntun confin tal mieç (Francesc Placerean, L'ultin patriarcje: Denêl Dolfin); il re al rêç il popul, / il pape ju benedìs ducj i doi, / il soldât ju difint ducj i trê / […] (Zuan Nazzi Matalon, Ottorino Burelli, Sacheburache)
   Sin. aministrâ , condusi , direzi , menâ , guviernâ , regnâ
   
   1. (fig.) di criteri, valôr, idee e v.i., jessi impuartant tal indreçâ une istituzion, organizazion, aziende, comunitât e v.i.:  il cuadri des regulis che a rezin il procès di riforme de scuele al è un grum di buine vignude e al seonde un resonament e un orientament pedagogjichementri positîf (Bruno Forte, Un lûc pe cussience comunitarie)
      Sin. dreçâ , indreçâ , tignî sù , menâ , guviernâ , regolâ
3. v.tr. [TS] gram. massime pai verps, coordenâsi cuntun complement, cuntun câs, cuntune costruzion
   Sin. tignî sù
4. v.tr. (ancje ass.) fâ i lavôrs che a coventin par tignî in ordin cjase, stale, bestiis e v.i.:  ce covential smondeâ la cjase e rezi la cort e vistîsi di fieste? (Josef Marchet, Lis predicjis dal muini); intant il timp al passe, l'è alt bielzà il soreli, e Menie e rugne e bruntule come il maltimp, che à di lâ a finî di rezi, impiâ il fûc e meti sore a fâ la fedarie (Giovanni Gortani, Sot consei di vuere)
   Sin. regolâ , guviernâ
5. v.intr. rivâ a restâ intune cierte posizion, forme, maniere e v.i.:  mi clopin i zenoi, / sai ce che o fâs, che o dîs, / ma no pues rezi in pîts (Pieri Çorut, Par lis gnocis Percût-Braçà)
   Sin. rezisi , tignîsi , restâ , resisti , stâ
   
   1. rivâ a resisti, a sopuartâ:  il frut si sintiva za avilît, e nol veva plui fuarcis di rezi. Il pari capiva che no gji sarès stât pussibil di finî [il lavôr] par chê sera (Federigo Comelli, Il me paîs); chel pinsîr i dave un spasim, che il cjâf nol podeve rezi (Maria Forte, La tiere di Lansing)
      Sin. tignî , tignî bot , tignî dûr , tignî pont
6. v.intr. soredut di resonament, argoment, procediment o sim., vê valôr logjic, jessi just, ben fondât:  cjacaris che no rezin ne in cîl ne in tiare (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
   Sin. stâ in pîts , tignî , stâ sù , tacâ
7. v.intr. rivâ a frontâ un confront, un paragon:  […] che il vin produsût in cheste regjon al sedi di cualitât une vore alte, e che al puedi rezi il confront cui miôr vins dal mont (Enrico Peterlunger, Storie curte de vît in Friûl)
   Sin. stâ sù