Dizionari de Lenghe Furlane

stâ sù    [AF]

1. loc.v. jessi e restâ in posizion verticâl:  i cjapà une tremarole di no rivâ a stâ sù (Maria Forte, La tiere di Lansing)
   Sin. stâ in pîts , stâ dret , stâ impins
   
   1. jessi poiât suntun supuart:  [il tor] al poiave diret sul mûr de façade e dentri al stave sù su dôs colonis di piere (Maria Forte, La rive di Sant Pieri)
   2. no colâ, no vignî jù, no vignî vie de posizion juste:  se no tu spietis che la cole si sui, il toc nol sta sù
2. loc.v. restâ sveât:  [lis trê brûts] e àn scomençât a stâ sù une gnot parom dongje il jet de lôr puare madone (Catarine Percude, La brût); al scugnive stâ sù fin tart par sierâ il cine (Antoni Beline, Pre Pitin)
   Sin. stâ in pîts , stâ impins
   
   1. restâ in fuarcis:  si stave sù metint tal stomi dome mignestris, verzis e râfs (Gianni Colledani, Mangjâ di magri: une tradizion antighe)
3. loc.v. esisti e durâ intune cierte cundizion:  la Svuizare, par esempli, e sta sù, salde e unide, tant ben che mai, parcè che la sostance de sô unitât e dal so patriotisim no je la liende di Guglielmo Tell, ma la cussience de sô situazion gjeografiche e de sô economie (Josef Marchet, La sgarfade dal cjan)
   Sin. stâ in pîts , tignî pont , tignî bot , stâ impins
   
   1. vê logjiche, coerence, funzionalitât e v.i.:  no sta sù propit la tesi che i presits de soluzion intierade [pal eletrodot] a fasaressin jevâ i coscj (Ferdinando Ceschia, Eletrodot Udin-Redipulie pal Friûl la partide no je sierade)
   2. rivâ a jessi in ecuilibri economic o a dâ avonde vuadagns:  la ativitât cjaçadorie e fâs nassi e e manten puescj di lavôr. Nissun po dineâ che centenârs di fabrichis a stan sù cul lavôr di sclopis, di munizions, di monturis (Riedo Pup, La cjace e i laris)
   3. poiâsi suntune fonde, suntun principi, su un element e v.i.:  o marchìn la nestre persuasion che dutis lis politichis di svilup a scuegnin stâ sù su la valorizazion des potenzialitâts locâls e regjonâls (Luche Nazzi, Regjonalizâ la Europe)
4. loc.v. jessi e restâ adalt intun spazi, in particolâr restâ sul pêl da la aghe o su la superficie di un licuit:  al veve nadât fin che al veve podût cirint di slontanâsi de nâf e, cuant che nol podeve plui, al rivà adore di ingrimpâsi tor di doi cadavars di soldâts che strents un cul altri a stavin sù su la aghe… (Pieri Menis, Sul agâr)
   Sin. sta parsore
5. loc.v. vê un valôr o meti un presit alt:  "Dît po: na savaressis ua ce ca ai paia las piels a chi chi da Bucari?" "Mah! … Dibodibot i stentarès a saviasju a dî. Ma provait a stâ sù di istès. Jo i crout ca ai las pai mancumâl" (Tite Bulfon, Las barghessas di Nart Palot)

Components:

• stâ v.intr.
• sù av., inter., s.m.inv., adi.inv.

Proverbis:

• sta sù boton fin che o soi fûr di chest porton
• une vît cence arbul no sta sù