Dizionari de Lenghe Furlane

stâ in pîts    [CO]

1. loc.v. jessi dret, poiant par tiere dome cui pîts, no jessi ni sentât ni distirât:  cui strac di stâ in pîts, cui stuf di stâ a scoltâ, e scomençavin a sentâsi (Zuan Lurinçon, La Madalene); [dai vidieluts] a ‘nd jere un nassût la dì prime e al stentave a stâ in pîts (Dino Virgili, La aghe da pît la cleve)
   Var. stâ impins
   
   1. jessi impegnât intune ativitât o in plui ativitâts che no lassin stâ sentâts o distirâsi o polsâ
2. loc.v. vê un minim di fuarce, di salût, di vite:  i soldâts che a rivavin ancjemò a stâ in pîts […], si contavin sui dêts di une man (Carlo Sgorlon, Il dolfin)
   Sin. stâ sù
3. loc.v. restâ in posizion verticâl o mantignî la posizion o struture normâl, no colâ:  i ai alçât i voi e a colp i ai cjatât alt parsore di me, il slambri di mûr, altissim, che al viarzeve il teritori de Cengle. Un mûr sdrumât, un spironton alt desinis di metris e che no si capive cemout che al podeve stâ in peits (Stiefin Morat, Kebar krossè)
   Sin. stâ sù
4. loc.v. di idee, argoment, progjet, tesi e v.i., vê une buine logjiche o une buine corispondence cu la realtât:  mi someave che dentri al fos dut un messedot di bausiis, di robis che no stevin in pîts, che no podevin sucedi (Carlo Sgorlon, Il dolfin)
   Sin. stâ sù
   
   1. vê une buine fuarce o un bon risultât a nivel funzionâl, economic e v.i.:  i 50 discs jessûts cu la etichete Musiche Furlane Fuarte dal '97 a son ducj invistiments di Radio Onde Furlane. O rivavin a stâ in pîts parcè che i cd si vendevin, ma cumò la storie e je cambiade (Natascia Gargano, Nuie Premi Friûl pal secont an: cualchi riflession)

Components:

• pît s.m.
• stâ v.intr.