pît  pît  [FO]

  1. s.m. part estreme de gjambe:  planchin planchin al butà de bande la coltre, al metè fûr i pîts dal jet, al jevà sù (Pieri Menis, Nadâl ancje par Gjelmin); al fo dut un ridi, un slapagnâ di pîts e di mans in muel, un nadâ jenfri lis rostis (Maria Forte, Chel svampît di 'Sefut); [i cjaradôrs] si soflavin il flât su lis mans imbramidis, a pestavin i pîts infurmiâts tai stivalons di pêl (Alan Brusini, Come tai romançs); indulà che a tocjavin lis cotulis e chei piduts lizerins, il prât al sflorive di bote (Catarine Percude, Lis striis di Gjermanie)
    Var. pe2 , pêt2
    Cfr. plante , dêt , talon , talpe , fals , cravueç , cuel1
    1. [LE] (fig.) part di alc che e pues corispuindi o fâ pensâ ae part estreme de gjambe di une persone:  i pôi, cui pîts crots ta la aghe, a sintin dut e po a cjantin ancje lôr, cun chês fueutis in forme di cûr te bavesele che si dismôf sù par là (Dino Virgili, La aghe da pît la cleve)
  2. s.m. [TS] zool. tai animâi vertebrâts, la part de talpe che e poie par tiere
  3. s.m. [TS] becj., gastr. tai di bestie macelade, spec. di vidiel, e pitance fate cu la estremitât de çate:  jere un pastiç ben fat di done Paule, / cators jerin, pernîs, / rost di vidiel, e i pîts, / colombins, cudulins, e bandulis / empladis cul pistum fat cu lis mandulis (Ermes di Colorêt, I, 180)
    Cfr. talpin
  4. s.m. [TS] zool. tai moluscs, masse muscolâr sot dal cuarp, che cun chê a cjaminin
  5. s.m. [TS] anat. part basâl di une formazion anatomiche
  6. s.m. [TS] bot. part basâl di une plante:  intal lagu di Mîl, cuant che sui lens dal bosc a si disrarissin li fueis e la lûs a riva jù a lenzi i peis da li planti, la aga a deventa di arzent (Novella Cantarutti, I voi di Miriscja)
    1. (fig.) esemplâr di plante:  tal ort o ai cincuante pîts di vît (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
  7. s.m. di un mobil o di un altri ogjet, ognidune des parts che a poin par tiere:  Tite Signôr lu veve puartât dongje di se e fat sentâ par tiere, tacât dongje dai pîts dal caregon (Pieri Menis, Tinut di Libro); un laveman a trê pîts di fier smaltât (Roberto Ongaro, Il muc); le cjatarin alì, induride, tal doman a buinore, cuntun braç che al strenzeve i pîts de crôs (Pieri Somede dai Marcs, Nardon e Vigjute di Nani)
  8. s.m. [TS] metrol. misure di lungjece, za doprade par antîc, in Friûl e corispuindeve a 34-35 cm, ancjemò doprade tal sisteme anglosasson là che e corispuint a 30,38 cm:  il gratecîl al va sù par 1776 «pîts», un numar simbolic: al è l'an de firme de Costituzion americane (Oscar Puntel, Mario Collavino: une bandiere furlane parsore il gnûf World Trade Center di New York); Ianuarius cui siei bêçs, che a son un regâl di Diu, al à podût paiâ 880 pîts cuadrâts di mosaic (Giovanni Battauz, Flavio Cossar, Renato Iacumin, I mosaics de basiliche di Aquilee)
    Cfr. pas , once
  9. s.m. [TS] metr. te metriche classiche, secuence di silabis cun timps fuarts e debii:  la metriche de Odissee e je fondade sul esametri grêc, che al veve sîs unitâts par viers (sîs "pîts") (Sandri Carrozzo, Pierluigi Visintin, Jentrade de Odissee)
    1. (fig.) forme metriche in gjenerâl, struture metriche determinade di un ciert numar di silabis:  stanziis nonantenûf abrace in se / di gnûf coni adobadis a plasê, / di cuatri piartiis la une a undecim pît (Toni Broili, Il furlan in Parnâs)
  10. s.m. [TS] tipogr. part basse dai caratars di stampe
Polirematichis e espressions idiomatichis Proverbis:
  • a Nadâl un pît di gjal
  • a Nadâl un pît di gjal, a pascute miezorute
  • a Nadâl un pît di gjal, prin dal an un pît di cjan
  • a Nadâl un pît di gjal, prin dal an un pît di cjan, a Sant Antoni un pît di demoni
  • al è mâl dâ vie cu lis mans e cirî cui pîts
  • al è miôr sbrissâ cul pît che no cu la lenghe
  • bisugne fâ la cjalce seont il pît
  • cui che si distire plui che a son luncs i bleons, si discuvierç i pîts
  • cui che si distire plui infûr de plete al reste cui pîts distaponâts
  • cul vin si sta tra amîs, cu la aghe si lave i pîts
  • di Sante Luzie a Sante Catarine si scurte un pît di gjaline
  • doi pîts no stan ben intune scarpe
  • lis bausiis a àn i pîs curts
  • lis robis mâl fatis a cjaminin cui lôr pîts
  • miôr sbrissâ cul pît che no cu la lenghe
  • ogni pît tal cûl al pare indenant
  • prin dal an, un pît di cjan; Pifanie, un pît di strie
  • si fâs e si dîs e la muart e tire pai pîts
  • un ûf e un pît tal cjâf al è compagn

Altris Imprescj

Coretôr Ortografic

Il coretôr online pai tescj furlans.

Dizionari Bilengâl
Talian-Furlan

Il plui complet dizionari dal Talian al Furlan (passe 76.000 lemis) e no dome.

Dizionari des Formis

Par cognossi la flession dai lemis furlans: la coniugazion pai verps e la declinazion pai nons e adietîfs.

Sinonims e Contraris

Par cjatâ la juste peraule.

Lenghis

La plataforme didatiche pe scuele furlane.