Dizionari de Lenghe Furlane

plante  plan|te  [FO]

1. s.f. cualsisei organisim vegjetâl che al à lidrîs, fust, fueis:  ce biel che al è il mont!… Biel par ducj: umign, bestiis e plantis! … E dut al vîf ben te sô forme juste (Maria Forte, La tiere di Lansing); i grîs a ingrandivin la campagne viers la planure, la tiere e lis plantis a mandavin un bonodôr che Mirco nol veve mai sintût prime di cumò (Alan Brusini, Par stradis lungjis); a ôr de strade doi cjamps di blave cun plantis altis come oms (Checo Tam, La codebuie)
   Cfr. arbul , morâr , len , jerbe , lidrîs , fust , fuee , pedâl , ramaç
   
   1. ancje cun riferiment specific a arbui grancj:  al veve une premure mate di mostrânus il zardin che al jere une maravee, i dams che i veve fat la nêf alte passe un metro, siet plantis sglovadis (Alan Brusini, Come tai romançs)
2. s.f. (fig.) origjin e nature etniche, culturâl, linguistiche e v.i.:  o vevin cjatade la fate di metisi dacuardi cun todescs e cun sclâfs, di lavorâ e di tratâ cun lôr, cence rineâ o tradî ni pôc ni trop la nestre plante, il nestri spirt, la nestre lenghe, il nestri costum furlan (Josef Marchet, No si à di judicâ il passât cu la mentalitât di cumò)
   Sin. implant , nature , naturâl , caratar , lidrîs , çocje , çoc
3. s.f. teren o filâr di ciertis speciis, in particolâr vîts, pôi o morârs:  al cjapà un troi plen di claps e di busis glaçadis. Di ca e di là a corevin dôs plantis di morârs cui ramaçs çoncjâts fin sul çoc (Carlo Sgorlon, Prime di sere); là pa li planti la uva a sglova i revoi (Novella Cantarutti, Paron Salvadi)
   Sin. implant , plantision , culture , planton , filâr
   Cfr. ronc , roncjade , vignâl , vigne , morarade , povolade
4. s.f. cuantitât di verzis, capûs e v.i. nassûts in vivâr e di meti tal cjamp:  o ai comprât in place un pocje di plante di meti tal ort (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
5. s.f. viôt plante dal pît
6. s.f. rapresentazion grafiche, in scjale o aprossimative, di un puest, in particolâr di une costruzion o di un ambient, in câs ancje cui detais des robis cemût che a son disponudis dentri:  il tenent nus mande a dî che i ocor une plante, un dissen dal lager di Are (Alan Brusini, Amîs come prime)
   Sin. mape , cjarte
   
   1. struture, forme di un edifici viodude dal alt:  i segns di colonis tal paviment a fasin pensâ che [la aule Nord de basiliche di Aquilee] e ves une plante di trê nâfs paralelis (Giovanni Battauz, Flavio Cossar, Renato Iacumin, I mosaics de basiliche di Aquilee)

Polirematichis e espressions idiomatichis

• di plante fûr loc.
• in plante stabil loc.av.
• in plante stabile loc.av.

Proverbis:

• de semence si cognòs la plante
• ogni plante e à la sô lidrîs