Dizionari de Lenghe Furlane

jerbe  /jè-/  jer|be  [FO]

1. s.f. cualsisei plante basse e cence fust di len:  cuant che tancj [uciei] a becutavin, su lis jerbis, siôr Meni al tirave il spavent (Maria Forte, Cjase di Dalban); si viodeve tal fonts de ledre jerbis e claps (Agnul di Spere, Il puint de ledre)
   Var. erbe , arbe
   Cfr. fîl , fros , fuee
   
   1. plante doprade tant che medisine:  une tossite intrigose, di no rivâ a parâle fûr cun nissune jerbe ni cui fuments di castagnolâr (Maria Forte, Cjase di Dalban)
2. s.f. complès di plantis bassis e cence len che a cressin intun stes puest:  une ligrie juste di fruts, cori pal prât, zigâ, marcolâ te jerbe (Dino Virgili, La aghe da pît la cleve); seâ la jerbe pai cunins te cunete de strade gnove (Josef Marchet, Lis predicjis dal muini)
   Cfr. çuf , bâr , prât
3. s.f. massime tal pl., complès des plantis che si mangjin:  al mangjave la fertaie cu lis jerbis e la cevole (Alan Brusini, I universitaris); a semenavin il forment, la blave, lis jerbis (Dino Virgili, Cuel Valâr)
   Sin. jerbum , ortaie
   
   1. spec. tal pl., plantis aromatichis:  un cusinâ che al jere scuasit sintiment […] siore Lise si judave plui di dut cu lis jerbis buinis. E lave a sielzi fuee par fuee, tun zîr pai trois dal ort, e e meteve dongje il so macet misturât; e il mangjâ al pareve cuinçât cun aiar di bonodôr (Maria Forte, Cjase di Dalban)
4. s.f. (zerg.) mariuane:  a son tancj i zovins che a fumin o a bevin o a fumin jerbe (AAVV, Sul florî)
   Sin. cjanaipe indiane

Polirematichis e espressions idiomatichis

• jerbe dal gomit loc.s.f.
• male jerbe loc.s.f.

Proverbis:

• a cjaval vieli i plâs la jerbe frescje
• a mus vieli, jerbe frescje
• al vîf tant il jeur a jerbe che il lôf a cjar
• anade di jerbe, anade di mierde
• ancje il jeur al vîf a jerbe
• cjar e fâs cjar e jerbe a fâs mierde
• dulà che si nas ogni jerbe e pas
• il jeur al vîf a jerbe, la bolp a gjalinis, e a son grues compagns
• la cjative jerbe e cres prest
• la jerbe triste e cres pardut e nissun no le mangje
• la jerbe triste e cres prest
• la triste jerbe a cres simpri
• la vacje e mangje il fen parcè che al è stât jerbe
• la zulugne e je la peste de jerbe
• lasse mus che la jerbe a cressi
• miôr jerbe sute che no fen bagnât
• ogni jerbe e à la sô lidrîs
• ogni jerbe e devente fen
• ogni jerbe e fâs la sô semence e ogni len la sô pome
• ogni jerbe intun fas
• ogni jerbe la sô lidrîs
• se si lu mangje in jerbe, no si lu à in gran
• sorc biel in jerbe, brut in panole
• spiete bo che la jerbe e cres
• spiete cjaval che la jerbe e cres
• tal troi simpri batût no ven sù jerbe