Dizionari de Lenghe Furlane

lidrîs  li|drîs  [FO]

1. s.f. part di une plante che si infonde sot tiere:  i lens che a jerin ingrampâts tai crets cu lis lôr lidrîs stuartis, tant che sgrifis di strie (Roberto Ongaro, Cretevierte); al cjaminà al cjaminà […] atent dome a no inçopedâsi tes lidrîs o sbrissâ sul muscli (Maria Forte, La tiere di Lansing); al jere l'ort botanic plen di jerbis e lidrîs che la int a sielzevin cuintri ducj i mâi (Alan Brusini, Come tai romançs)
   Var. radîs , radrîs , ladrîs , ladrie , lidrie , ledrîs , ledrie
   Cfr. poc²
   
   1. [TS] bot. orghin cence clorofile des plantis cormofitis che, a part il câs di ciertis plantis acuatichis o parasitis, al à la funzion di jentrâ tal teren par assorbî nudriment e sostignî la plante
   2. len di presi otignût di chê part di une plante:  siôr Nando, robe cussì [une cocjete e un armâr] no 'ndi cjate nancje a Udin, dute cun rimès di lidrîs penze (Maria Forte, Cjase di Dalban)
2. s.f. (ancje fig.) part profonde di alc:  par me, al deventava alc di pi: al era un fâmi cu li robi, un supâ ta li radîs fondi da la cjera la fievra dal spetâ, il cjant dal sbrocâsi (Novella Cantarutti, Pesteli)
   
   1. part profonde di une part dal cuarp:  al pâr che i cjavei i si sedin arsîts vie pe gnot (i duelin tes lidrîs) (Amedeo Giacomini, Tal ospedâl); la lidrîs di un dint
   2. lûc dulà che alc al nas:  chel troi che al veve la lidrîs tal penç dal fueam e al passave dongje di un riul di aghe clare (Maria Forte, Mabile la Lunghine)
3. s.f. (fig.) base, part basse di alc:  il cjistiel [di Çuc] lu faserin sù i siôrs di Cucagne; al jere part di un sisteme difensîf che al tacave de lidrîs de mont (Consorzi pe difese dai cjistiei storics dal Friûl - Vignesie Julie, www.consorziocastelli.it)
   Sin. cûr , çucul¹ , fonde , pît
4. s.f. (fig.) origjin, cause:  sui nobii che no rivin a scjampâ si sbroche fûr une asse che e à lidrîs lontanis (Carli Pup, Il Friûl de Joibe Grasse dal 1511); i grêcs par prins a ricognossevin in Omêr la lidrîs no dome de lôr epiche, ma di dute la lôr civiltât (Sandri Carrozzo, Pierluigi Visintin, Jentrade de Odissee)
   Sin. cause , cûr , fonde , gnerf , medole , poç , principi , reson , vues
   
   1. complès di elements dal passât che a àn efiet sul presint e sul futûr:  fantats e fantatis che no savevin plui di ce lidrîs che o divignìn, parcè che o sin ca, di ce bande che o varessin di lâ (Agnul di Spere, Vivi a Codroip)
   2. divignince gjeografiche, culturâl, etniche e v.i.:  o vin di jessi diferents dai Stâts Unîts dulà che un imigrât al à di deventâ american e vonde. Invezit noaltris canadês o volìn che i imigrâts a mantegnin il leam cu lis lôr lidrîs (Christian Romanin, Sandra Pizzolitto Pupatello: «Furlan is better! Il Friûl? La puarte de Europe pal Canadà»)
5. s.f. [TS] ling. part di peraule tes lenghis flessionâls e aglutinantis che e reste fisse daspò di vê gjavadis dutis lis parts flessivis e derivazionâls, e che e à valôr semantic e e reste in ducj i vocabui de stesse famee lessicâl:  sul prin, o jerin par mantignî la forme de lidrîs des peraulis dilunc de flession: stess come stesse, cjantad come cjantade (Xavier Lamuela, La grafie furlane normalizade)
   Sin. element radicâl , radicâl
6. s.f. [TS] ling. base etimologjiche recuperade li che si ripuartin lis formis lessicâls distintis di diviersis lenghis storichis:  il non di Vençon al ven […] di Auentione, cuntune lidrîs prelatine che e vûl dî "sorzint", "riu". (Luigina Di Giusto, Andrea Guaran, Mauro Pascolini, La culine furlane)
7. s.f. [TS] filos. tes filosofiis antighis, principi materiâl di ogni robe
   Sin. archè
   
   1. intal pinsîr di Empedocli, ognidune des cuatri sostancis fondamentâls, aghe, aiar, tiere e fûc
      Sin. archè
8. s.f. [TS] mat. numar che, elevât ae potence che e corispuint al indiç de estrazion, al da il numar sometût ae estrazion stesse:  la lidrîs cuadre di 16 e je 4
   
   1. soluzion di une ecuazion

Polirematichis e espressions idiomatichis

• lâ a supâ lis lidrîs pal poc loc.v.
• meti lidrîs loc.v.

Proverbis:

• ogni jerbe e à la sô lidrîs
• ogni jerbe la sô lidrîs
• ogni plante e à la sô lidrîs