Dizionari de Lenghe Furlane

cause  cau|se  [FO]

1. s.f. ce che al prodûs un efiet:  il cine furlan al è rivât tart su la sene culturâl e la cause si à di cirîle tal fat che il cine al è une art "industriâl", che e à bisugne di mieçs economics impuartants (Fabian Ros, Il cine furlan); cualchidun al viodeve propit inte mancjance di spazis informatîfs la cause dal faliment politic (Max Mauro, Un Friûl difarent: i 90 mhz di Onde Furlane); lis corints fredis che si sbassin a son un prodot dal temporâl e tal timp stes une des causis che lu fasin disfantâ stant che a impedissin al aiar cjalt e umit di alçâsi (Stefano Micheletti, Marcellino Salvador, Notis di meteorologjie pal Friûl - Vignesie Julie)
   Sin. causion , colpe , fonde , motîf , reson
   
   1. cui che cul so fâ al prodûs un efiet:  ma cjo! Tu sês cause ancje tu, di dutis chestis pantuminis… (Anute Fabris, A passe la scalmane); la idee di sei stât di bessôl la cause dal so mâl, lu indelirave (Maria Forte, Cjase di Dalban)
      Sin. causion , colpe , fonde , motîf , reson
2. s.f. complès di dirits e interès, spec. coletîfs:  il sindicât al à di difindi la cause dai lavoradôrs
   Sin. reson , part¹
   
   1. ideâl:  il Friûl plui libar al è e plui ben al po siervî la cause de pâs, tal interès so e ancje da la Italie (Josef Marchet, No si à di judicâ il passât cu la mentalitât di cumò); o soi convint che la mê cause e je juste e che al è il gno dovê di lotâ pe justizie pai puars… Il gno puest al è cun lôr…! (Alviero Negro, Int di masnade)
      Sin. ideâl , idee
   2. ancje cence nissune specificazion, intindint par antonomasie l'ideâl di un grup di personis:  al voleve viodi se la sô fedeltât al partît e rivave a passâ parsore des amiciziis, des parintâts e, l'interès de cause, parsore di dut e di ducj (Roberto Ongaro, Il muc); Cavedalis al pensave che intun mût o intun altri l'impuartant al jere servî la cause cun umiltât e dedizion (Giovanni Pillinini, Zuan Batiste Cavedalis - Une vite esemplâr)
3. s.f. [FO, TS] dir. cuistion puartade denant dai judiçs, contese in tribunâl:  l'avocat lu sconzurave di stâ ben atent a ce che al diseve al judiç, par no vignî fûr di chê cause cence un carantan (Agnul di Spere, Frêt); par tant che la int si ricuardave, no jere mai stade pâs tra i doi paisuts: si contavin nome storiis di barufis, di dispiets, di causis in preture, di legnadis tra fantats… (Pieri Menis, Disore e disot); il Parlament, un pôc a la volte, al deventà ancje un tribunâl che al tratave lis causis tra il patriarcje e i siei feudataris ministeriâi, lis ribelions, e i delits cuintri la pâs dal Stât (Josef Marchet, Cuintristorie dal Friûl fin sot la Italie)
   Sin. procès
4. s.f. [TS] filos. intal razionalisim, reson che e determine un efiet necessari, che nol pues no sucedi, gjenerant une cjadene deterministiche dai fats intal timp
   
   1. intes teoriis empiristichis, ce che al ven intal timp prime di alc altri, ma che al à cul efiet dome un rapuart di prevedibilitât probabilistiche
5. s.f. cun valôr di prep., in consecuence di, par vie di:  un barbe che al jere paralizât cause la vuere (Mario Beltramini, Jo e Graziella)

Polirematichis e espressions idiomatichis

• a cause di loc.prep.
• cause che loc.coniun.
• cause di loc.prep.
• clamâ in cause loc.v.
• fâ cause loc.v.
• fâ cause comune loc.v.
• in cause di loc.prep.
• par cause di loc.prep.

Proverbis:

• tes causis a vuelin trê robis: vê reson, savêle dî e cjatâ cui che le dedi