Dizionari de Lenghe Furlane

idee  /-dè-/  i|de|e  [FO]

1. s.f. rapresentazion o elaborazion mentâl di alc di concret o astrat:  Logos al è duncje […] chê idee dal om che lu fâs responsabil dal destin che si risierve par se (Adrian Cescje, Viaç aes origjins dal Logos); e je fuarte in Camillo la influence di Llull, soredut la idee di combinatorie (Mario Turello, Il brevet)
   Sin. concet , concezion , imagjin , pinsîr
   Var. indee
2. s.f. filos. imagjin che si fâs la ment di ce che al è ogjet di cognossince
   
   1. inte filosofie platoniche, forme eterne dome inteligjibile che i corispuindin lis cjossis de realtât sensibile
   2. inte filosofie di Kant, concet de reson di là dal fenomenic e che al à un valôr regolatîf e no cognossitîf pe esperience
3. s.f. robe che si pense, massime dal improvîs:  alore i ven la idee di clamâ il frut forest a montâ su la slite cun lui (Marisa Moretti, Neveade); cence volê, al sbrisse di gnûf tes sôs ideis plui neris (Maria Forte, La tiere di Lansing)
   Sin. pinsîr , pensade
   
   1. pensade strambe:  ma ce ideis ancje il plevan di fâle cussì tart [la messe] (Pieri Somede dai Marcs, Resurezion a Pontinie)
   2. buine pensade:  no saressie une idee vierzi puartis e barcons e clamâ dut il paîs a fâ baldorie? (Alan Brusini, Amîs come prime)
4. s.f. soluzion, invenzion, sisteme e v.i. cjatât dal pinsîr:  o ai jo la idee juste par comedâ lis robis! (Franca Mainardis, Un bosc cence colôrs); biel che al stave pensant il mût di risolvi la situazion, i vignì une idee (Angelo Covazzi, Il miracul des panolis)
   Sin. cjatade , ideone , intuizion , invenzion , pensade
5. s.f. mût di pensâ, di viodi lis robis, opinion, convinciment:  tal prin nissun nol jere di idee di comprâju [i ôcs] (Maria Forte, I ôcs di Miute); aial une idee, lui, speziâr…? […] o dîs se al à une idee di cui che al po jessi stât… (Alviero Negro, Int di masnade)
   Sin. convinciment , convinzion , crodince , ideologjie , lubie , parê² , pont di viodi , pont di viste , posizion , stoc¹ , pinsîr
6. s.f. principi, fondament teoric di une dotrine politiche, religjose, filosofiche, sientifiche e v.i.:  tu sâs che jo no lu viôt chest Partît. Jo o ai altris ideis. Jo o soi libar e o vuei restâ libar. No vuei tessaris, jo, ni "pudiesis" (Meni Ucel, Ideis); no jerin tancj partîts come cumò: a jerin invezit, ad in grues, dôs ideis che si lotavin: di une bande i siôrs e di chê altre il popul (Riedo Pup, Il compromesso); [Australopithecus africanus] e jere propit une "simie bipede" che e confermave lis ideis di Darwin (Claudio Tuniz, Evoluzion umane: la sience e mostre i segrets des nestris origjins); nus àn dit […] di vê preseade une vore la nestre iniziative, che e jere in cunvigne cu lis lôr ideis politichis, che a jerin marxistis leninistis (Adrian Cescje, Memoriis di politiche linguistiche)
   Sin. concezion , fondament , fonde , pinsîr , principi , teorie
7. s.f. nozion schematiche elementâr:  par vê une idee dai tancj lûcs dulà che [lis artistis "Feminis dal bosc"] a àn lassât i lôr segns, baste dâ un cuc al sît (Erika Adami, Art che e nas de nature e e torne ae nature); no ai idee di dulà che al sedi lât (Roberto Ongaro, Il muc)
8. s.f. pussibilitât imagjinade dal pinsîr o de fantasie:  amavistu la tô esistença e provavistu orôr a la idea de la tô distruzion (Zuan Luîs Filli, Il farc); dome la idee di scugnî traviersâ la cusine sot dai voi di Berto, i de i sgrisui (Gianni Gregoricchio, Trê feminis)
   Sin. ipotesi , pinsîr , prospetive
   
   1. il pensâ alc par otignîlu, fâlu e v.i.:  nol varà la idee di copâmi ancje me? (Roberto Ongaro, Il muc)
      Sin. voie , volê² , volontât , intenzion , chê
   2. pinsîr che al fâs tacâ un progjet:  la idee [di +Sklet/Xtreme tv ] e je nassude dal fat che no esistin trasmissions TV che a contin il nestri teritori a di un public di zovins (Fabian Ros, Interviste cun Giorgio Cantoni)
9. s.f. impression che si à o che si fâs:  il fat des pocjis peraulis al da al furlan une idee di concretece (Oscar Puntel, Toni Capuozzo: «Ognidun al bale cun sô agne»); dute la cjase, comò e dave plui idee di grandece (Maria Forte, Cjase di Dalban)
   Sin. imagjin
   
   1. robe che e da la impression di jessi alc, che e ricuarde alc par someance:  si viodeve ancje di lontan chel çuf di lens [de bressane], come in cunvigne sul colm de alture coce. A pene une idee di bosc cul so vert ancjemò intîr e penç (Maria Forte, Cjase di Dalban)
10. s.f. cuantitât une vore piçule:  met un sclip di cafè tal lat, ma pôc, juste une idee; Sant Zuan al dismôf une idee di rosade lusinte tun sgrisul di fresc, sore sere (Dino Virgili, Friûl di Istât)
    Sin. ombre , ninin , tininin , tic¹ , ongule , ponte , fregul

Polirematichis e espressions idiomatichis

• cambiâ idee loc.v.
• dâ la idee loc.v.
• mudâ idee loc.v.
• nancje par idee loc.av., loc.inter.
• nancje par ideis loc.av., loc.inter.
• sclarî lis ideis loc.v.
• sclarîsi lis ideis loc.v.

Proverbis:

• ogni cjâf la sô idee, ogni cjase il so costum, ogni bocje il so pistum
• ogni cjâf une idee, ogni idee un interès
• tes ideis si à di sei parons e no fameis
• une idee e nas tal cjâf ma e cres tal cûr