Dizionari de Lenghe Furlane

voie  /-ò-/  vo|ie  [FO]

1. s.f. il volê, il desiderâ alc, soredut in maniere sintude e improvise:  mi ven sù une voie di frut: cori ad ôr da la aghe, discolç, cjapâ sù un clap e tirâlu dentri (Dino Virgili, Il cîl sot aghe); dificoltâts e problemis, voiis e sperancis, golis e pôris (Riedo Pup, La Comission de miserie); la clime di chel gustâ no jere des miôr, tant plui che Lissandri nol veve voie di cjacaris e, plui che mangjâ, al pastrocjave tal plat (Franca Mainardis, Il sium di Lissandri); a Pieri, invezit, chel savoltâsi dal cûr i scjaldà la voie di meti robe buine sot i dincj (Maria Forte, Cjase di Dalban); cuant che i vignive une voie, no spietave nancje un minût (Carlo Sgorlon, Il dolfin)
   Sin. brame , sen² , desideri , gole
2. s.f. (eufem.) ancje tal pl., desideri sessuâl:  l'empit de passion che ti sdrondene la anime e che ti sgrisule il cuarp di voie (Gianni Gregoricchio, Trê feminis); chê sô cjâr colôr rose che mi sveave un deliri di voiis (Alan Brusini, Gian Paolo Linda, I forescj); su la mê schena i sintivi i tiei dêts / la legria dai tiei flancs che a sveava las voias / las tôs bussadas che a studavin la sêt (Giorgio Ferigo, La sô puema); a viodisi crots lis voiis a si impiin e, par distudâlis, si sa ce che i vûl (Alviero Negro, Int di masnade)
   Sin. brame , bramosetât , gole , pice , pitic , sen² , seneosetât
3. s.f. (fam.) spec. tal pl., desideri improvîs, tipic des feminis che a spietin un frut, di mangjâ o bevi daurman alc di particolâr
4. s.f. magle su la piel, angjiome o neu, causionade, daûr de crodince popolâr, di une voie no gjavade de mari vie pe gravidance:  une voie moron, grande tant che une palanche, subit parsore dal sen çamp (Roberto Ongaro, Cretevierte)
   
   1. (fig.) cuantitât minime, risultât minim, o ancje esempli o esemplâr insuficient che no si svicine avonde a ce che al varès di jessi:  al è a pene une voie di om (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
      Sin. ombre

Polirematichis e espressions idiomatichis

• biele voie loc.v.
• buine voie loc.s.f.
• cuintri voie loc.av.
• di buine voie loc.av.
• fâ la biele voie loc.v.
• fâ passâ la voie loc.v.
• fâ voie loc.v.
• passâ la voie loc.v.
• voie o no loc.av., loc.inter.
• voie o no voie loc.av., loc.inter.

Proverbis:

• cui che al à voie di mateâ che al compri un orloi o che si ledi a maridâ
• cui che al è cence bêçs che no si lassi vignî voiis
• cui che nol à voiis, al vûl dî che ses à gjavadis
• mai mangjâ i piçs par voie di cjar
• no stâ mangjâti i dêts par voie di cjar
• passade la doie, tornade la voie
• se si à voie di un displasê, si à di lâ ca dai parincj
• se si à voie di vê un bon poltron, bisugne mandâlu a scuele o a passon