Dizionari de Lenghe Furlane

ombre  /ò-/  om|bre  [FO]

1. s.f. zone o part no iluminade de lûs:  e tacà la rive ta la ombre frescje des cjasis, po, parsore, e tornà te batude direte dal soreli (Maria Forte, Cjase di Dalban)
   Sin. scûr¹ , ombrene , ombrenûl , ombrie
2. s.f. imagjin di un cuarp proietade in negatîf de lûs su di une superficie:  il soreli al jere zaromai alt, i boscs no fasevin plui lis ombris lungjis sore i flancs de valade (Agnul di Spere, In Friûl, nossere); lis ombris che ur cjaminavin da pâr, si scurtin a sbighet, si tirin sot lis ruedis cjochis di zirâ (Dino Virgili, La aghe da pît la cleve)
   Sin. ombrene
3. s.f. segn scûr:  vistidi da neri, cun chê ombri di stracura intor dai voi (Novella Cantarutti, Cjasa da la mê zent)
   Sin. scûr¹ , ombrene
   
   1. magle lizere che si viôt a pene:  te tovaie e je restade une ombre di cafè
4. s.f. persone o robe viodude in mût no clâr o che si viôt dome par jessi scure cuintri un fonts plui clâr:  une gnot trê ombris a sbrissarin vie di scuindon dilunc la cente dai Madiis, a voltarin li de torate che e fâs cjanton sul flum (Dino Virgili, La aghe da pît la cleve); ogni om, pes stradis scuris, al deventave nome une ombre cence non (Roberto Ongaro, Il muc); il dissen dal orizont dulà che a vignivin sù lis ombris di aeroplans bombardîrs (Checo Tam, Lis pinessis)
   Sin. sacume , ombrene , figure
   
   1. (fig.) presince indefinide, ancje dome psicologjiche, di cdn.:  co Tite si jere metût a vê a cefâ cu lis feminis, la ombre di sô mari si jere metude tal mieç (Alan Brusini, Par stradis lungjis)
5. s.f. spirt dai muarts:  si viodin ombris, mo in forme di om e mo in forme di femine, che a contin bêçs, grums di arint e di aur che a fasin vignî la aghegole (Pieri Menis, Lis leiendis di Buie); lis ombris dai vons, se a varan fuarce di tornâ culenci, a restaran scaturidis viodint la cjase cence lûs e cence flât, cussì tasselade di pieris pusticis (Maria Forte, I arcs)
   Sin. fantasime , spirt , parence
6. s.f. (fig.) persone che e à pierdût tant pês o tante fuarce o tantis capacitâts:  tu mi viodis là che o soi ridusude di muse, di peraule… no soi plui se no la ombre di me (Pieri Piçul, Vieri e gnûf)
7. s.f. (fig.) presince o cuantitât une vore piçule, sedi di alc di materiâl che di imateriâl, spec. in espressions negativis cun valôr iperbolic:  te cjamare no jere nancje la ombre di une stue (Alan Brusini, Gian Paolo Linda, I forescj); l'idrogjen, pûr jessint l'element chimic plui bondant tal univiers, inte forme molecolâr (H 2) si lu cjate tal aiar dome in ombris (0,5 part par milion!) (Lorenzo Marcolini, La invenzion dal vueit inte lampadine di Turo Malignani. Storie, gnovis ipotesis e atualitât); cence armis, cence mieçs, cence ordin, cence ombre di preparazion militâr (Josef Marchet, Cuintristorie dal Friûl fin sot la Italie)
   Sin. olme , fregul
8. s.f. espression negative o indefinide o svelte che si impâr te muse o te cjalade:  al jere vignût blanc, sec, tombadiç, cuntune ombre di pôre tai voi e lis spalis pletis (Dino Virgili, La aghe da pît la cleve); e cuant che encje jo i ai butât dintor / il risi, a à vût una ombra di ridi nervôs / una voglada di chês di un timp / che a mi à voltât par dret e par ledrôs (Giorgio Ferigo, Un picjât)
   
   1. atmosfere o element in cualchi maniere negatîf:  par un pôc ducj a tasin… une ombre di dolôr e passe pe sale (Pieri Somede dai Marcs, Timp di infier); la ombre nere de Incuisizion e tornave come une manarie sul paîs, ma chest colp no nome par fâ pôre (Alan Brusini, Come tai romançs)
   2. aspiet negatîf in contrast cun altris positîfs:  o soi convinte che ogni esperience umane, cun ducj i siei lusôrs e dutis lis sôs ombris, e sedi un tesaur di dividi cul prossim (Gianni Gregoricchio, Trê feminis); un puest di dolôr come l'infier, al sarès une magle, une ombre tal biel e te lûs di dut (Maria Forte, La tiere di Lansing)
9. s.f. (fig.) sens di suspiet, di risintiment, di fastidi o in cualchi maniere di contrarietât:  Pitin non veve un naturâl facil e, o par ombre o par scrupul, al cavilave cun ducj chei che a jerin a vivi cun lui (Antoni Beline, Pre Pitin); le cjalavi cun ombre: masse robis mi veve scuindudis (Maria Forte, Dome la cjampanute di Sant Bortul); il prin suspiet inmò crei, si jere pontât dentri vie. A pene une ombre, un scrupul di vê sbaliât il judizi su di lui (Maria Forte, Mabile la Lunghine)
   
   1. pôre:  levin vie cidins e simpri cul cûr in man par ombre di petâ i pas in cualchi spie (Catarine Percude, La maledizion dei luvins)
      Sin. pôre , teme¹ , scrupul
10. inter. tant che espression di maravee o di altris sensazions imburidis o tant che esclamazion o imprecazion gjeneriche:  vuê di matine o lei a fâ cuatri pas in zardin e mi rimpinai sù fin in cime de Rive. Ombre! e ce fature (Guido Antonioli, Florean dal Palaç, I, 13)

Polirematichis e espressions idiomatichis

• can da la ombre loc.inter., loc.s.m.
• cjan da la ombre loc.inter.
• cjapâ ombre loc.v.
• da la ombre loc.adi.inv., loc.av.
• dâ ombre loc.v.
• fâ ombre loc.v.
• nancje par ombre loc.av., loc.inter.

Proverbis:

• l'Invier al fûc, l'Istât a la ombre
• la bolp e à pôre de sô ombre