Dizionari de Lenghe Furlane

pôre  pô|re  [FO]

1. s.f. emozion, sensazion di cuant che si sintisi in pericul o si è une vore preocupâts:  però la guera a vierç subit i voi / il paltan, i pedoi, la pôra soradut / la pôra incuguiada intuna grusa / un muart denti una busa, un berli da un murut, la pôra che a ti sgarfa sot la piel / la pôra che a si nea tal butilion (Giorgio Ferigo, Un soldatin); la fie no jere ancjemò no tornade, siore Anute e scomençà a vê un sgrisul di pôre e a cjalâ fûr pal barcon, a talpinâ di ca e di là cence padin (Maria Forte, Cjase di Dalban); cetantis voltis che al veve fate la dreture di Cjamp a dutis lis oris: Cuesim nol veve pôre ni di vîfs ni di muarts (Dino Virgili, La aghe da pît la cleve)
   Sin. fufe , piu-piu , sbigule , spac , spali , spavent , terôr , spaghet , teme¹ , timôr¹
   Var. paùre
2. s.f. [TS] psic. modalitât di compuartament che e cjape dentri une sorte di diminuzion dal jo, causade de percezion reâl o imagjinade di un pericul:  al somee che la reazion di panic e sedi diferente de reazion de pôre, parcè che i circuits neurâi che a son ae fonde di chestis dôs emozions a son forsit diferentis (Franc Fari, Neurosiencis dal dolôr)
3. s.f. prospetive di alc che no si vûl, che nol plâs:  o vin simpri vude pôre che cierte int, convertide a la autonomie al ultin moment, si sedi fate indenant par inturbidî lis aghis (Josef Marchet, Cuarde e savon)
   
   1. presintiment, massime negatîf:  «O ai pôre che la Siore no rivi a Nadâl» e diseve la infermiere che e viodeve di jê (Alan Brusini, Come tai romançs)
4. s.f. ognidun dai pinsîrs o des situazions che a fasin preocupâ:  mi vignivin sgrisui di scatûr pensant a la mê idee di partî, ancje se no varès mai confessât chê pôre a 'Sef (Enrico Martina, Ricuarts e inlusions)

Polirematichis e espressions idiomatichis

• di fâ pôre loc.av., loc.adi.inv.

Proverbis:

• a volê fâ robe no bisugne vê pôre dal diaul
• al è il 'sâf che al à simpri pôre che i mancji la aghe
• al è miôr vê pôre prin che no daspò
• cui che al à la code di paie al à pôre che si brusi
• cui che al à la code di stran al à simpri pôre che si impii
• cui che al à reson al à pôre, cui che al à tuart al spere
• cui che al è scotât ta la aghe cjalde al à pôre di chê frede
• cui che al menace al vîf cu la pôre
• cui che plui al sberle plui al à pôre
• e je miôr la pôre che no la angosse
• e je piês la pôre che no la dulie
• e je piês la pôre de muart che no il murî
• e je plui la pôre che no la angosse
• e plui grande la pôre dal mâl che il mâl stes
• il brâf miedi nol à pôre di scorteâ
• il brigant e il viandant a stan simpri cu la pôre
• la bolp e à pôre de sô ombre
• la pôre no resone
• mâl no fâ, pôre no vê
• miôr la pôre che no l'ingôs
• no bisugne lassâ scjampâ il jeur par pôre di ruvinâi la piel
• no stâ fâ di mancul di semenâ par pôre des passaris
• par fâ bêçs no bisugne vê pôre dal diaul
• par pôre dai uciei no si lasse di semenâ
• peraulis e blestemis no fasin pôre