Dizionari de Lenghe Furlane

ombrene  /-è-/  om|bre|ne  [FO]

1. s.f. zone o part no iluminade de lûs:  la ombrene dal bosc, il cîl plen di lûs, la aghe verde e turchine, i vevin dât a Mirco il sens de libertât (Alan Brusini, Par stradis lungjis); co era straca, a si distirava ta ombrena dai pôi e dai morârs (Ugo Pellis, Catinuta)
   Sin. scûr¹ , ombre , ombrenûl , ombrie
   Var. lombrene , nombrene , dombrene , ombrele
   
   1. colôr scûr, segn scûr:  e veve la muse strache, di no durmît, cui calamârs di ombrene insot (Dino Virgili, Pôre tal nuie…)
2. s.f. imagjin di un cuarp proietade in negatîf de lûs su di une superficie:  la flame alte dal nadalin e slungjà un slambri ros aur sul bleon de nêf blancje, come une code di comete, puartant la ombrene scure dal nono fin sul mûr dal ort (Pieri Menis, Il pignarûl); e cualchi paveon si bute tal lusôr dal ferâl e ogni claput de strade al à une lungje ombrene (Maria Forte, L'avôt); ognidune e je une puare, suturne bestie feride, spauride ancje de sô ombrene e che e lenç lis sôs plaiis e creturis (Ivano Urli, Storie di Vera)
   Sin. ombre
3. s.f. figure o persone che no si rive a viodi ben:  la puartute e vuicà, une ombrene sierade e sbrissà dentri, si segnà cu la man blancje: e restà li dongje l'antîl che no olsave a vignî indevant (Dino Virgili, La aghe da pît la cleve); si cjalìn tai voi e une ombrene nus passe dongje. No 'nd è mai un doi cence il trê (Sandri Di Suald, Ah! la provincie)
   Sin. ombre , sacume , figure
4. s.f. atmosfere negative o element in cualchi maniere negatîf:  il president dal partît autonomist Iacovissi nol cjate di miôr che di dissociâsi de concuiste de grafie unitarie, di banalizâ la cuistion, lassant une ombrene di suspiet che al Moviment Friûl la facende no lu rivuardedi plui (Adrian Cescje, Memoriis di politiche linguistiche); alc che no si podeve perdonâ, che al butave une ombrene di infier sun dute la sô vite (Carlo Sgorlon, Il dolfin)
   Sin. ombre
5. s.f. imprest doprât par parâsi de ploie o dal soreli, fat di une cube di tele montade suntun telâr di bachetis che si pues vierzilis o sierâlis:  si intabarossà ben e no mâl, al cjapà sù la ombrene e al jessì di cjase (Roberto Ongaro, Cretevierte); Lis feminis, di Istât, a tignivin la ombrene vierte par parâsi dal soreli (Carlo Sgorlon, Il dolfin); [l'ombrenâr] si pleave jù dentri la ombrene vierte par tiere, a cusî un tondel, a cambiâ un braç o un mani, e daûr sul mûr, in rie, ancjemò ombrenis (Maria Forte, Il bal spisimât des ombrenis)
   Cfr. ombrenin , ombrenon , ombrenone , ombrenute
6. s.f. cualsisei robe che e vedi la forme che e ricuarde chel imprest:  lis rosis intropadis a macetuts a metin adun une ombrene formade di rosis piçulis cun fueis blancjis o rosadis (Giorgio Pascoli, Il Litum: jerbis salvadiis te cusine)
7. s.f. [TS] micol. fonc avonde grant, che si pues mangjâ, cul pît lunc e stielôs e il cjapiel sierât in forme di bale di zovin, ben viert a cuant che al è madûr, lat.sient. Macrolepiota procera:  si cîr foncs; si cjape su chei che si cognòs: ceredans, ombrenis, stecherins (Sergio Visentin, Estât in mont)
   Sin. mace di tambûr , mace

Polirematichis e espressions idiomatichis

• a ombrene loc.av., loc.adi.inv.
• fâ ombrene loc.v.

Proverbis:

• al vâl plui un solt in soreli che no in ombrene
• bisugne sparagnâ la ombrene par cuant che al plûf
• la ombrene dal mês di Avost e fâs dulî la panze il mês di Zenâr
• la ombrene di Istât e fâs mâl di Invier
• no si cjol la ombrene par une sole ploie
• ogni fros la sô ombrene, ogni om il so difiet
• ogni fros o vin la nestre ombrene
• ombrene di Istât, e dûl la panze di Invier
• ombrene, femine e orloi no si impreste a dinissun
• taiât il morâr, e cesse la ombrene