scûr1
scûr
[FO]
-
adi.
di colôr che al tire sul neri o che al è cjariât, mancul clâr rispiet a altris ats di colôr:
Dorine e veve intorsi une cotule blu scûr (Pieri Menis, Chei di Muraie);
chel vert scûr dai ciprès, che a pichin sù chi è là pes clevis e tal mieç des ruvîs dal santuari (Adrian Cescje, Viaç aes origjins dal Logos)
Sin. flusc
, fluscât
, fosc
, fumul
, fuscât
, suturni
, torvit
, turbit
-
che al à un colôr di chê sorte:
un biel om, moro, cui voi scûrs (Roberto Ongaro, Il muc);
in chei dîs un sirocâl al faseve colâ lis fueis prin da la ore e un nûl penç, scûr, al pesave su lis cjasis (Pieri Somede dai Marcs, Sant Simon: 28 di Otubar 1917)
-
s.m.
colôr che al tire al neri:
i mobii di cusine a jerin piturâts di scûr (Carlo Sgorlon, Il dolfin)
-
adi.
cun pocje lûs:
la Stele, cuiete tal so cjanton scûr, e moveve i siei voi tonts e e parave jù il fen a bocjadis (Maria Forte, La tiere di Lansing);
prin di lâ jù pal bosc scûr di cjastinârs si sin fermâts a spietâ il glon di cualchi cjampane (Pieri Menis, Il cuader de none)
-
adi.
di sun, profont, grâf:
vôs scure di femine anziane (Alan Brusini, Come tai romançs);
vôs disperade, scure e cuasi simpri stonade (Checo Tam, La maree nere)
-
adi.
(fig.)
che al pant pôre, marum, asse, conturbie o altris umôrs, sensazions o sintiments calcolâts negatîfs:
"Nuie… O ai fat il zîr di ducj i mulins des roiis [cence cjatâ farine]! là sù di Fiôr a S. Bernart, là sù di Fostar a Cjavalì, pardut… - dissal Guri cu la muse scure (Dino Virgili, La aghe da pît la cleve)
-
che al mostre tristerie, agressivitât:
crodistu che ti basti fâ la cjaladure scure par che il mont al vebi sudizion di te […]? (Josef Marchet, Lis predicjis dal muini)
-
adi.
(fig.)
caraterizât di misteri, inciertece o ancje di alc di negatîf o platât:
o dismetevi di colp di jessi il frut lusorôs, tirât sù tal bombâs, fabricant intor di lui une clime di serenitât aiarose, par jentrâ intun teritori scûr e proibît (Carlo Sgorlon, Il dolfin);
e veve un sintî a mût so,… scûr, che nol lassave mai sigûrs (Maria Forte, Cjase di Dalban)
-
adi.
(fig.)
brut, caraterizât di situazions negativis:
tun dai moments plui scûrs pe identitât de Scozie, segnade inmò dal pês de repression metude in at dopo des rivoltis jacobitis, Burns al à savût tignî impiât il sium di une Scozie libare (Carli Pup, Teritoris - Oms di Libertât)
Sin. brut
, neri
-
adi.
(fig.)
caraterizât de decjadence e ignorance:
al sarès un disastri se la sience e fos acessibile dome a cui che al fevele ciertis lenghis, inglês o altri: un tornâ indaûr a timps scûrs che a àn fat dam no dome aes cognossincis ma a dutis lis libertâts principâls des personis (Carli Morandin, Interviste a Mauro Ferrari)
-
s.m.
mancjance di lûs:
al sune l'alarme […] si distude ogni lusôr, […] dut un scûr dulintor e planc planchin il sunsûr dai bombardîrs che si tire incà (Ivano Urli, Storie di Min);
i mi svei co l'è scûr, i prepari il cafè / e po fadias osteadas fintant che al ven not (Giorgio Ferigo, Taresia di Val Vezil)
-
s.m.
(fig.)
ce che nol è cognossût, che al è dismenteât, che al è dificil o impussibil di capî, situazion di no savê o di misteri:
cualchidun al jere blocât di une sudizion antighe, che forsit no jere nassude cun lôr, ma e vignive di plui lontan, si pierdeve tal scûr dai secui (Carlo Sgorlon, Il dolfin);
o cognossês il gno segret e il parcè dal gno cidin che us faseve bacilâ. O cognossês il scûr dal gno vivi e mi perdonais… (Maria Forte, La tiere di Lansing)
Sin. misteri
-
s.m.
(fig.)
ce che al è negatîf, indreçât in cualchi mût al mâl o caraterizât di cundizions negativis o di efiets negatîfs:
la sô muse si compagnà a chel scûr che al veve dentri (Maria Forte, La tiere di Lansing);
ma parcè il cjalâ lusorôs di lôr fi ju jemplavial di scûr ta la anime? (Dino Virgili, La aghe da pît la cleve);
indulà isal chest scûr? Scûr al è in Spagne, in Portugal, in cualchi republicute da la Americhe meridionâl, dulà che centralisim e ditature si dan la man (Josef Marchet, Trê salts tal scûr: costituzion - republiche - autonomie)
Polirematichis e espressions idiomatichis
Proverbis:
- a scûr dutis lis ocjis a son neris
- clâr a matutin, scûr tal stali; scûr a matutin, clâr tal stali
- cuant che al è scûr, e je gnot
- cuant che e je scure la buse di Pinçan, e ven la ploie, co e je clare al ven bon timp
- cui che di gjat al nas al cjape surîs a scûr
- cui che nol à lusôr che al ledi a durmî a scûr
- miôr lâ a durmî cuntun mocul che no a scûr
- miôr un bocon di lum che no lâ a durmî a scûr
- sant Pauli scûr, dal Invier no sin fûr
- sant Pauli scûr, forment sigûr
- scure la marine: mangje, bêf e sta in cusine; clare la montagne: bêf e va in campagne
