Dizionari de Lenghe Furlane

brut  brut  [FO]

1. adi. che al à un aspiet, une forme che no plasin:  sô fie e jere brute e la fiastre invezit e jere plui che biele (Popolâr - Andreina Nicoloso Ciceri, La fie e la fiastre - Racconti popolari friulani I); il viandant che al passe par lenti, al cjale chel brut arbossat e al dîs: - Butaitlu fûr, fait tantis stielis, e che al vadi sul fûc (Catarine Percude, La rosade di sant Zuan); il murel de nêf al tapone il brut colôr dai cops vieris, al scuint il mismàs dai cjôts, dai rudinaçs, dai mussulins (Josef Marchet, Il cjanâl vistût di blanc)
   Sin. mostruôs , orent , oribil , teribil
   
   1. di aspiet, pôc san, che al somee malât:  "Tu âs vuê une brute ciere" "Veramentri ai durmît pôc usgnot…" (Pieri Somede dai Marcs, Ursule)
2. adi. spec. cuant che si insulte cdn., come infuarcitîf di adi. o sost.:  ven dongje chi, brute bestie che tu sês! (Pieri Menis, Agne Ursule); Jacum, chel brut mostro, me à petade (Angelo Covazzi, A confessâsi); va a incjocâti vie di chi brut schifôs (Bepi Zefon, Sante Luzie e i merecans); brut di un ludro cui crodistu di menâi la viole (Laurin Zuan Nardin, SIP)
   
   1. adi., s.m. intal ûs dai fruts, antipatic, trist:  va vie, brut!
3. adi. che nol plâs daûr di une percezion sensoriâl:  une brute puce di frait; un brut odôr di sierât
   Sin. displasevul , ledrôs , mâl , stomeôs , trist
   
   1. che nol plâs in gjenerâl:  ce brut lâ tal asilo! (Checo Tam, Mater Tenebrarum)
4. adi. negatîf par un cualchi aspiet:  o ai di dâti une brute gnove. […] O sin intune brute situazion (Checo Tam, Sense)
   Sin. ledrôs , negatîf , ruspi , ruspiôs , trist
   
   1. che nol rive a un nivel suficient o bon:  vaî par piçulis robis, come une note a scuele o un brut vôt (AAVV, Sul florî); la lame [de lance] si presente in brut stât di conservazion: a scaiis compatadis cu la tiere e smorseaduris a cause dal rusin (Lucio Perès, Une lance longobarde cjatade a Baracêt)
      Sin. negatîf , trist , scjars , bas
   2. che nol è avonde coret, avonde ben cognossût e ben doprât:  o vevi un brut todesc (Checo Tam, Sense)
   3. che nol è avonde produtîf, che nol da bogns risultâts:  ae fin dal ’800, cu lis malatiis che a vignivin de Americhe, […] si scree un brut moment di crisi pe viticulture furlane (Mara Piccoli, Vignâi: lis autoritâts sotanis e la resistence dai coltivadôrs)
   4. che al da prospetivis negativis:  cuant che e regne dome une idee e ducj a son in cunvigne al è brut segn (Franc Fari, Il cjâf dai furlans); al tremave rivant ta la ostarie come se al ves vût un brut presintiment (Pieri Menis, Sul agâr)
   5. che al puarte a jessi piês:  al à scomençât a lâ cun brutis compagniis e, prin un spagnolet, dopo une bire o la sgnapute, al è passât in fin a robis plui grandis (AAVV, Sul florî)
   6. contrari ae leç, ae morâl, ae religjon e v.i.:  in paîs e jere capitade une brute facende: un brut omenat, maridât, al veve ruvinade une puare frute (Pieri Somede dai Marcs, Strambariis)
5. adi. che al fâs mâl, che al pues jessi pericolôs pe salût:  Rosine e jere come saltade fûr, ancje jê, di une brute malatie che le veve marcade insot (Maria Forte, Cjase di Dalban); cun cheste man, par cualchi dì, no podarai fâ nuie: mi soi fat un brut tai, di ca fin ca, che mi è sbrissade la sgoibe (Josef Marchet, Lis predicjis dal muini); Sandri, ancje se al veve une brute feride, al jere fûr di pericul (Pieri Menis, Sul agâr)
   Sin. ledrôs , pericolôs
6. adi. che al è caraterizât di displasê, dolôr, disgracie e v.i.:  un brut an si visà che chel [purcit] che al nudrive, sui cuatri cinc mês, al veve cjapât il mâl rossin (Meni Ucel, A marcjât); l'alcul i disfave i bruts pinsîrs, ma ancje, a voltis, i strambive lis imagjins come tun fat di deliri (Maria Forte, La tiere di Lansing); in chel an, di Vierte adore, che Zuan si indurmidì te stale e no si dismovè plui, e fo une brute Pasche (Riedo Pup, Zuan Gjeremie)
   Sin. disgraciât , dolorôs , ledrôs , sfortunât , trist
7. adi. che al vûl rivâ a obietîfs triscj:  varaial brutis intenzions cun me? Jo no soi vignût cun chê di fâi la vuere (Checo Tam, Les tamossis)
   Sin. carognôs , cragnôs , indegn , meschin , schifôs , trist , vergognôs
   
   1. che al mostre tristerie, ostilitât, agressivitât:  al è dibant che tu mi fasis chê brute cjaladure a mi: no mi scompon jo (Josef Marchet, Lis predicjis dal muini)
8. adi. che al è cuintri de creance, de morâl, de dignitât e v.i.:  ogni tant al çavariave, brutis peraulis, peraulis che no si capive, cualchi blesteme (Pieri Somede dai Marcs, La letare de mame)
   Sin. sporc
9. adi. dûr di risolvi:  a vore al è vignût fûr un brut imbroi
   Sin. dificil , dûr , grivi , intrigôs , ledrôs
10. adi. caraterizât di nûi, ploie, cundizions meteorologjichis no plasevulis:  al nevee e al svinte… (ogni tant si sint l'aiar a businâ) Ce brute stagjonate! (Pieri Somede dai Marcs, Gnot di Nadâl)
    Sin. trist
11. s.m. dome tal sing., il jessi contrari dal biel, ce che nol è biel di viodi:  al à un brut che al plâs (Maria Forte, La fie çuete); par cognossi il biel, bisugne viodi il brut (Luciano Rocco, La foghere); il secul de gjeometriche ben slissade razionalitât componentistiche des formis, dal brut artistic, dal brut pardut (Adrian Cescje, Viaç aes origjins dal Logos)
    
    1. aspiet negatîf, robe negative:  a gno judizi / il brut dal taramot al è che al rive / cence un indizi (Meni Ucel, Avîs); ce biei timps, ce biei timps ma il brut al è vignût dopo (Pieri Somede dai Marcs, Tripoli bel sol d'amore)
12. s.m. persone di aspiet pôc armonic, nuie biel:  lis cjasis di ripôs che si tegnin dentri biei e bruts, mats e savis (Alan Brusini, Cercandui)
13. s.m. dome intal sing., timp meteorologjic cun perturbazions, precipitazions:  lis previsions a metin brut
    Sin. maltimp , nulât , ploie , trist timp , brut timp

Polirematichis e espressions idiomatichis

• a brut loc.av.
• brut afâr loc.s.m.
• brut insium loc.s.m.
• brut mâl loc.s.m.
• brut sium loc.s.m.
• brut timp loc.s.m.
• brut tîr loc.s.f.
• brute bestie loc.s.f.
• brute copie loc.s.f.
• brute figure loc.s.f.
• brute fin loc.s.f.
• brute gnove loc.s.f.
• brute part loc.s.f.
• brute stagjon loc.s.f.
• brute strade loc.s.f.
• cjalâ di brut voli loc.v.
• di brut loc.av., loc.adi.inv.
• fâ brute figure loc.v.
• meti in brute lûs loc.v.
• riscjâ une brute cjarte loc.v.
• vê in brut concet loc.v.
• viodi di brut voli loc.v.
• viodile brute loc.v.
• zuiâ une brute cjarte loc.v.

Proverbis:

• a fantate biele, brut fantat
• al è un brut mistîr chel di fâ ridi
• brut di piçul, biel di grant; biel di piçul, brut di grant
• brut in fasse, biel in place; biel in fasse, brut in place
• cu lis bielis peraulis e i bruts fats si ingjane savis e mats
• cuant che i fruts a stan cuiets, brut segn
• cui triscj al è brut vê ce fâ
• di une brute scarpe no vignarà mai fûr une biele çavate
• il diaul nol è mai tant brut che lu fasin
• il diaul nol è mai tant brut che lu piturin
• par cognossi il biel, bisugne viodi il brut
• sant scugnî al è un brut sant
• sorc biel in jerbe, brut in panole
• vuardilu ben, vuardilu dut: l'om cence bêçs tant che al è brut