Dizionari de Lenghe Furlane

ledrôs  le|drôs  [FO]

1. adi. che al è de bande contrarie rispiet a chê normâl, chê juste, chê difûr, chê devant e v.i.:  daûr dal cjar il trop des mascaris. Fantats vistûts di femine cu lis cotulonis lungjis des sûrs o de mari, cu la muse platade tune velete laçade daûr de cope… e oms vêrs in vistîts a sbrendul, un cu la camisole ledrose […] (Pieri Menis, Mascaris e… maraveis)
   Var. ladrôs , redrôs , radrôs
   
   1. s.m. bande contrarie rispiet a chê normâl, chê juste, chê difûr, chê devant e v.i.:  a fuarce di jessi voltâts e tornâts a voltâ [i vistîts], no si capive plui di ce bande che al fos il dret e di ce bande il ledrôs (Gianni Gregoricchio, La clape)
   2. s.m. (fig.) part platade, part che pal solit no si viôt, che no si pense, che no si cjape in considerazion:  cuissà, se e ves savût il ledrôs de storie, se le varès pensade in chê maniere? (Roberto Ongaro, Il muc)
2. adi. contrari rispiet a un tiermin di confront:  a fuarce di cirî a cjatin une radio e alore po o sintìn il discors di Badoglio, dut ledrôs di chel che nô o crodevin: «La guerra continua» (Alan Brusini, La cartuline)
   
   1. s.m. ce che al è il contrari di alc:  plui che al "vêr" al smicje al "biel" o al "brut", che al è il so ledrôs (Antoni Beline, Turoldo e il so Friûl)
3. adi. che al è negatîf, che al fâs cuintri:  e lui invezit, là dentri, ta chê preson a studiâ, spiât di dì e di gnot ancje tai pinsîrs, cence podê fidâsi di nissun, jenfri un cjap di fruts che i jerin ducj ledrôs (Alan Brusini, Par stradis lungjis); damis che a vevin vût un destin ledrôs, e che a jerin finidis magari intune galere o su la forcje (Carlo Sgorlon, Ombris tal infinît)
   Sin. aviers , contrari , negatîf , nemì , ostîl
4. adi., s.m. che, cui che al è dificil di tratâ, che nol è zentîl ni degnevul:  "Dal rest bisugne ancje compatîlu: si capìs che al ere ledrôs, parcè che i à tocjât lâ vie di Udin, e slontanâsi di jê, siore Angjeliche" (Vittorio Vittorello, A ogni cost); "No volevi fâus sledrosâ, Aghite." "Ah, che al mi lassi stâ! E son ducj ledrôs ca dentri, no dome che jo!" (Ercole Carletti, L'amôr vieri)
   Sin. salvadi , ruviers , cjaviestri , ruspiôs , rusgnac , impussibil , scontrôs
   
   1. di umôr, no legri, no seren, no calm, caraterizât di rabie, fastidi e sim.:  dome jê a era buna, cuant che a rivava adora, a disgretegnâi il temperamint che al veva, ledrous la sô part, e da cuietâi luni e disdegns (Novella Cantarutti, Se i tu mi voul, tu mi voul)
      Sin. stuart , inmusonît , inrabiât , malmontât , rabiôs , stiçât , sustât , urtât , gnervôs
   2. che al da fastidi:  il siorut di Udin, cul so mût di fevelâ sgnanfôs, un fâ propit ledrôs, i domandave cemût che al veve di considerâsi (Alan Brusini, Come tai romançs)
      Sin. rognôs , osteôs , fastidiôs
5. adi., s.m. [TS] artes. te gucje, pont contrari al dret
6. s.m. [TS] sport tal tenis, tîr fat partint cu la rachete dongje dal flanc contrari rispiet ae man che le ten

Polirematichis e espressions idiomatichis

• lune ledrose loc.s.f.

Proverbis:

• al è miôr vivi tal bosc che no cu la femine ledrose