Dizionari de Lenghe Furlane

contrari  /-à-/  con|tra|ri  [FO]

1. adi. che al è in oposizion a alc o a cdn., che al è cuintri:  si jerin formadis ideis che, dade la diversitât dai doi caratars, a finirin par deventâ contrariis (Tarcisio Venuti, La cjase di Toni)
   Sin. aviers , contrastant , in oposizion , lontan , opuest
   
   1. che al cree dificoltât, fastidi, situazions negativis:  dut i jere contrari, e i pareve di no rivâ mai a cjapâ alc che e scugnive vê, come se e ves vût di vierzi puartis cun sieraduris intrigosis (Maria Forte, La fie çuete)
      Sin. aviers , ruviers , cuintri , ledrôs
2. adi., s.m. che, cui che intune decision, intune votazion, intun confront al è cuintri di une posizion, di une propueste, di une persone e v.i.:  umigns libars a pensin che si devi rivâ adore di vê un mont libar, cence "stangjis" e par chest a son contraris a dutis lis rivendicazions nazionâls (Josef Marchet, Moviment Autonomist Furlan pe Federazion dai Popui); il nestri comun al jere metût tal numar di chei che a vevin int contrarie al Duce (Pieri Somede dai Marcs, Lis votazions)
   Sin. aviers , ostîl
   
   1. s.m. vôt dât cuintri di une propueste:  la Assemblee dal Moviment e à aprovade la mozion cuasi ae unanimitât, cun dome cinc contraris (Adrian Cescje, Memoriis di politiche linguistiche)
      Sin. cuintri , no
3. adi. che al è intune posizion oponude, che al va ta chel altri sens:  al vignive indenant biel planc, par vie de buere che e soflave contrarie (Carlo Sgorlon, Prime di sere); si jevà sù e ancje lui al le a poiâsi su la bancje, ma de bande contrarie, in face di Catine (Gianni Gregoricchio, Trê feminis)
   Sin. aviers , denantdaûr , ledrôs , ruviers , cuintri
4. adi. logj. di dôs proposizions universâls, che a àn sogjet e predicazion compagns, ma une e je negative e chê altre afermative
   
   1. logj., mat. di proposizion o teoreme, indulà che de negazion de ipotesi e ven fûr la negazion de tesi
5. s.m. ce che al è cuintri, che al è in oposizion, che al corispuint a alc ma in cuintri:  si podarès cuasi riscjâ une propueste: conseâ i letôrs delicâts di fâ il contrari di ce che a stan fasint: invezit di nissun gjornâl, leint invezit une vore (Riedo Pup, Il partît dai zovins coscrits); lis lôr ideis a son une il contrari di chê altre; nissun ancjemò nol è stât bon di mostrâ il contrari: al plui cualchidun si è contentât di sentenziâ di no, cence nissun resonament (Josef Marchet, Cuarde e savon)
   Sin. incontrari , ledrôs , opuest
6. s.m. [CO, TS] ling. peraule di significât contrari a une altre:  un dizionaris cun sinonims e contraris; la peraule 'umiltât' e je il contrari de peraule 'supierbie'
7. s.m. situazion negative, soredut se no je casuâl o se no dipent di cui che le patìs:  ogni tant si pues dome che sopuartâ i contraris de vite

Polirematichis e espressions idiomatichis

• al contrari loc.av., loc.coniun., loc.adi.inv.
• al contrari di loc.prep.
• bastian contrari loc.s.m., loc.adi.
• câs contrari loc.coniun.
• dut al contrari loc.av., loc.coniun.
• vê in contrari loc.v.

Proverbis:

• se e comande la femine, e je contrarie al om