Dizionari de Lenghe Furlane

stuart  stuart  [FO]

1. p.pass., adi. viôt stuarzi , viôt stuarzisi
2. adi. che nol à une forme drete o ecuilibrade o simetriche, che al bute di une bande o che al è iregolâr:  la stradute stuarte che lis unive [lis dôs vilis] madracant pai cjamps e pareve une coree tirade malamentri. (Pieri Menis, Disore e disot)
   Sin. butât , imberlât ipon. , pleât
   Cfr. stramp , çuet
   
   1. adi., s.m. cui che al è çuet o che al à cualchi asimetrie fuarte tal cuarp:  e sclopà la vuere che e puartà vie dute la zoventût, drets e stuarts, sans e malâts, biei e bruts, ducj cu la sclope (Pieri Menis, Une cotule pal dì de sagre); no si contavin i çuets, i vuarps, i stuarts che a domandavin la caritât (Gianni Gregoricchio, Îr e doman)
3. adi. in posizion contrarie rispiet al normâl o al just:  come un sturnel denant dal desktop cul mouse in man de bande stuarte (Ivano Urli, Il progrès)
   Sin. ledrôs , sledrosât
4. adi. [TS] tess. di filât, che al è fat cun plui fîi sempliçs, prodot cuntune torsion di direzion contrarie a chê dai singui elements doprâts:  tirâ la gusiele cent e cent, mil e plui voltis, passe e torne passe, pont daûr pont su chei cotulons di regadin, sui gjachetins di bavele e fîl stuart (Pieri Menis, Marum)
5. adi. (fig.) ancje cun funz. di av., che al è in cualchi maniere negatîf, dificil, problematic, malfat, contrari dal just, dal normâl e v.i.:  i siei pinsîrs a jerin bruts, masse stuarts par chel fantat cussì zovin (Nello Malisano, Il furlan tai timps che cambiin); mai une barufe o une peraule stuarte, un matrimoni fortunât (Alan Brusini, Come tai romançs); l'aspiet di strissindul al pandeve une vite stuarte e straçone (Maria Forte, Cjase di Dalban); al è chel nuie che ti tire fûr robis essenziâls che a dan savôr ae vite, che ti fâs tornâ drete une zornade tacade stuarte (Natascia Gargano, Dal nuie, dal dut tal ultin lavôr dai ¿Cuinon?)
   Sin. ledrôs
   Cfr. çuet
6. adi. (fig.) ancje in funz. di av., che al à bevût masse e che duncje nol rive a stâ ben impins e a cjaminâ dret:  a fuarce di taiuts, o sin tornâts a cjase stuarts

Polirematichis e espressions idiomatichis

• cjalâ di stuart loc.v.
• fradi stuart loc.s.m.
• lâ in stuart loc.v.
• lâ par stuart loc.v.
• lâ stuart loc.v.
• lâ stuarte loc.v.
• vê la lune stuarte loc.v.

Proverbis:

• cuant che il tamon al va stuart, lis ruedis a van tal fossâl
• cuant che no ti impuarte no stâ cjalâ se e va drete o stuarte
• dret o stuart un om al è simpri om