Dizionari de Lenghe Furlane

stramp  stramp  [FO]

1. s.m., adi. [BF] di cdn., che nol cjamine dret o des gjambis, che a son stuartis e no permetin di cjaminâ in maniere normâl:  el puer peçotôs, dut rot, sence cjapiel, dut dispetolât, stramp e çuet al entre inta cjase di contadins (Dolfo Zorzut, Ipocrisie, ipocrisie, el Signôr ti cjastie); son di chês come fusetis / tant ben fatis, bielis, dretis / che, a dî il just, / a cjalâlis al è un gust; / ma son chês po che àn lis gjambis / come troncs o stecs o strambis (Maria Gioitti del Monaco, Ai bagns)
   Sin. stuart , imberlât , scalembri , scudulât , disombolât , strupiât , çuet
   
   1. che al à une forme o une ande o un moviment stuart, iregolâr:  i becanots tal palût che a jevin sù a vueu come fusetis strambis (Alan Brusini, Par stradis lungjis)
2. adi., s.m. che, cui che al à compuartaments o formis di pensâ che si slontanin de norme sociâl:  il vicjari al saveve che al jere pôc ce resonâ cun chel «tomo» […] Al jere stramp ma, dopo dut, al servive ben (Pieri Menis, I sioperos dal muini); par sei stramp al jere simpri stât stramp, di piçul insù. Al barufave cun ducj, al jere arogant, al veve simpri reson lui, nol veve nissun rispiet (Laurin Zuan Nardin, Stramp); un stramp, un diaulat, un voie di fâ nie, che nol veve fat un colp se no ce che i pocave (Alan Brusini, Par stradis lungjis)
   Sin. curiôs , strani , origjinâl , strambalât , strambere , strambel , matucel , maturli , stravagant , scalembri
3. adi. che nol è solit, normâl, usuâl:  i siei i vevin metût non "Aristico", un non stramp intonât cul personâl (Antoni Beline, Pre Pitin); un bon om […] e tant cjandit che al prestave fede a dutis chês che i disevin, par strambis che a fossin (Meni Ucel, Mondo birbo)
   Sin. curiôs , fûr dal ordenari , fûr dal solit , fûr dal vade , origjinâl , particolâr , singolâr , strambalât , strambel , stravagant , ecezionâl , straordenari , strani , insolit
   
   1. che no si spietisi o che nol è cemût che si spietisi:  il lavôr lu veve scomençât tal 1788, par finîlu in cuatri agns, e al è une vore stramp che, vint vivût ancjemò 6 agns, al vedi lassât fûr 24 agns su 73 (Pierluigi Visintin, Friûl e furlans te Histoire de ma vie di Giacomo Casanova)
   2. che no si rive a definî ben:  o varès volût che chel dopodimisdì nol finis mai, e o provai un sbisieç stramp tal sanc cuant che o viodei che il soreli al jere daûr a bonâsi (Carlo Sgorlon, Il dolfin)
4. s.m. ce che al è fûr dal ordenari:  a publicâ une notizie di cheste fate si po vignî acusâts […] di manie di fâ viodi nome il mâl, il sporc, il stramp, il misar (Riedo Pup, Dopo 50 agns lavôr ancjemò)
   Sin. strani