Dizionari de Lenghe Furlane

particolâr  par|ti|co|lâr  [FO]

1. adi. di une part:  noaltris o sin furlans fin te medole dai vues e o considerìn il Friûl, de Livence al Timau, come une regjon che e sta par se, […] e che e à interès particolârs di difindi (Josef Marchet, A chei che no àn ancjemò capît)
   Sin. propri , specific , speciâl
   Var. particulâr
   
   1. dedicât in mût specific a une part, a un teritori, a une comunitât, a une persone, a une persone e v.i.:  la ocupazion dal Friûl par opare di Vignesie e vignì stabilide midiant di tratativis particolârs cun ognidun dai cjastelans e ognidune des Comunitâts (Josef Marchet, Cuintristorie dal Friûl fin sot la Italie)
   2. dedicât a une ativitât, a une finalitât precise:  un recipient particolâr di cuarde, il vieri, calât jù ta la aghe, che al covente par tignî vîf il pes pescjât (Giovanni Battauz, Flavio Cossar, Renato Iacumin, I mosaics de basiliche di Aquilee)
2. adi. caraterizât di une cierte forme, di detais speciâi e propris:  e veve une gracie dute particolâr tal movisi, tal doprâ lis mans, tal fâ lis piçulis robis di ogni dì (Franca Mainardis, Il sium di Lissandri); l'articul 108 de Cjarte Costituzionâl, cul emendament Pecorari-Tessitori, al garantìs al Friûl un statût autonomistic particolâr in viste des sôs cundizions gjeopolitichis (Josef Marchet, E cumò?)
   Sin. carateristic , individuâl , personâl , propri , singolâr , tipic , speciâl
3. adi. che al risalte, che al è parsore dal ordenari:  la tutele des minorancis linguistichis e à une impuartance particolâr inte nestre regjon (Marc Stolf, Masse planc e cence plans. L'ûs public de lenghe furlane)
   Sin. alt¹ , fuart¹ , grant , marcât , speciâl
4. adi. che al è diferent dal normâl, o diferent dal rest o di chei altris, ancje in maniere strambe:  DJ Caralitanus al è un tipo particolâr: des voltis al salte la gulizion par durmî (Checo Tam, La maree nere); chei discors su la vanitât des cjossis dal mont, a àn creade une clime particolâr, a àn fats nassi pinsîrs che a disturbin (Meni Ucel, Otavari a Madone)
   Sin. balçan , bislac , capriçôs , crestôs , curiôs , ecentric , estrôs , fûr dal vade , mataran , matuçat , maturli , origjinâl , singolâr , strambalât , strambere , strani , stravagant , stramp , fûr dal ordenari
5. s.m. proprietât, idee, concet dal jessi di une part, dal jessi specific e v.i.:  il scheme neoplatonic al met il spirt prin de materie, il gjenerâl prin dal particolâr, la potence prin dal pratic e vie indenant (Mario Turello, Il brevet)
6. s.m. singul element, singule part di un dut:  al viodeve lis culinis e i boscs di Buie e di Sant Denêl, e al burive dentri di se un grum di particolârs di chei paîs che i pareve di vê dismenteâts (Carlo Sgorlon, Prime di sere); no veve fat nuie par mostrâsi miôr di ce che e jere. O crôt che al sedi stât chest particolâr a fâme jentrâ in gracie (Gianni Gregoricchio, Trê feminis)
   Sin. detai , aspiet¹
   
   1. element che al risalte, che al è diferent, speciâl:  la art greghe […] e je combatude tra la bisugne di netâ vie il particolâr ecessîf, il disformât, idealizant, e chel contrari di no pierdi la veretât dal reâl, la complessitât (Adrian Cescje, Viaç aes origjins dal Logos)