Dizionari de Lenghe Furlane

personâl  per|so|nâl  [FO]

1. adi. che al rivuarde dome une persone:  se la vite fisiche, personâl di ogni om, di ogni fradi no deventarà il valôr plui preseôs di salvâ sore dut e a ogni cost, il nestri mont «civîl» al continuarà a judâ i afamâts cun «disegni di legge» (Riedo Pup, La sflacje e merte un premi); favorî cualchidun di chenti e cualchi forest…, cul tornecont personâl dai deputâts comunâi… (Alviero Negro, Int di masnade)
   Sin. individuâl , singolâr , particolâr
   
   1. che al covente a identificâ une persone:  document personâl
   2. che al vâl dome par un individui:  un biliet personâl
      Sin. nominatîf
   3. adi., s.f. [CO, TS] art esposizion li che a son oparis di un sôl autôr:  lis sôs primis mostris personâls [di Afro Basaldella] a son dal 1936-'37 (Luca De Clara, Afro Basaldella); al jere stât inviât il progjet «Spazio Fvg» par promovi i artiscj di chenti (che al à dât acet ancje a une personâl di Toffolutti […]) (Erika Adami, Ce fâ di Vile Manin)
2. adi. subietîf, individuâl:  no ise ore di finîle di proclamâsi bessôi puartevôs di dut un popul, cuant che si fevele nome daûr des propris personalissimis opinions o interès? (Josef Marchet, Cuarde e savon); mi sostignive une sorte di incussience otimistiche che e jere part des mês carateristichis personâls (Adrian Cescje, Memoriis di politiche linguistiche)
   Sin. individuâl , origjinâl , particolâr , so , subietîf
   
   1. origjinâl:  la sô scriture [di Novella Cantarutti] e va daûr di trois siei personâi, sei par sielte de varietât di Navarons, sei pe libertât de espression (Cristina Cescutti, Leterature furlane)
      Sin. origjinâl , particolâr , so
3. adi. privât e risiervât:  nol è che o feveli cui sa trop cun chei altris di cheste robe de sessualitât, parcè che o crôt che e sedi une robe personâl (AAVV, Sul florî)
   Sin. privât , risiervât
   
   1. che al à a ce fâ cu la sfere dai afiets, dai sintiments, dai caratars tra personis:  lis tensions che a vevin scjassât il grup fondadôr a jerin personâls e politichis (Max Mauro, Un Friûl difarent: i 90 mhz di Onde Furlane)
4. adi. dedicât, indreçât o in relazion cuntune persone specifiche:  [Casanova] cuant che al à bêçs, al à simpri daûr il cogo personâl, se al è pussibil francês (Pierluigi Visintin, Friûl e furlans te Histoire de ma vie di Giacomo Casanova); dopo de muart dal ultin cont di Gurize, Leonart, [il Palaç Lantieri] al passà al so miedi personâl (Consorzi pe difese dai cjistiei storics dal Friûl - Vignesie Julie, Palaç Lantieri); Cavedalis al si jere fat cualchi nemì personâl che nol viodeve la ore di podê ridusi la sô autoritât (Giovanni Pillinini, Zuan Batiste Cavedalis - Une vite esemplâr)
   Sin. particolâr , privât , so
5. adi. che al fâs riferiment al cuarp di une persone:  suiemans e ce che al covente pe igjiene personâl (Aministrazion Publiche, Informazions utilis pal ricovar)
6. adi. fat di une persone in mût diret, cence mediazion:  Pietro Martinis che al à curât in maniere personâl la costituzion e la difusion di varietâts [di pierçolârs] cun plui cualitât e plui justis pe planure Furlane (Sandri Carrozzo, Une regjon di cerçâ)
7. s.m. il fisic uman tal so aspiet esteriôr:  un om cence etât, che al someave zovin, cjavei neris, sec di personâl, un movisi a scats (Alan Brusini, Gian Paolo Linda, I forescj)
   Sin. cuarp , persone
8. s.m. individui uman, spec. cun cualchi carateristiche particolâr:  il gnûf arcipredi al à di jessi paron di fâ e disfâ cemût che al vûl e no i va di vê nissun personâl stramp che i dedi fastidi (Antoni Beline, Pre Pitin)
   Sin. persone , personaç
9. s.m. dut ce che al tocje la sfere privade di une persone:  un contrast tacât par motîfs politics e sbrissât sul personâl
10. s.m. complès dai dipendents di une aziende, di un ufici, di un ent e v.i.:  competence a 'ndi è di vendi: competence stagjonade, parcè che i sorestants a passin e il personâl al reste (Josef Marchet, Debil il cerviel ma fuarte la gramule); dopo de fusion il personâl de Interbank al è stât ridimensionât (Fabian Ros, La rambe)
11. adi., s.m. tren pal traspuart di personis:  il personâl des siet al è plen di students
12. adi., s.m. [TS] sport viôt fal personâl

Polirematichis e espressions idiomatichis

• a titul personâl loc.av.