Dizionari de Lenghe Furlane

so  so  [FO]

1. adi.poss., pron.poss. di lui o di jê:  le cjalave dentri di se e al restave moments incjantâts a cirî la plee de sô bocje, la forme dal so cerneli e il tai dai voi (Maria Forte, Il Bide di Miot); une piçule glesie blancje cul so brâf tor (Franca Mainardis, Grivôr); al tirà fûr il tacuin, e dopo di vê contât al Nin i siei bêçs, al provà la biciclete (Carlo Sgorlon, Prime di sere)
   Sin. so di lui ipon. , so di jê
   Cfr. to , gno , nestri , vuestri , lôr²
   
   1. al pues ancje riferîsi a une tierce persone plurâl, di lôr:  i fantats a continuarin a fâ i siei fats, cence abadâlu (Franco Marchetta, Light my Fire)
      Sin. so di lôr , lôr²
   2. come chei altris possessîfs, cui nons di parintât al inibìs la presince dal articul definît, simpri tal singolâr e dispès ancje tal plurâl:  la brave mulinarie che e veve salvade la cjase di so pari. Sôs sûrs Gjulie e Mignete, che e erin lis plui grandis, la secondavin, siei fradis la ubidivin e il mulin invece di piardi al cuistave aventôrs (Catarine Percude, La mulinarie); là sù a stavin «ducj» une volte, chê e jere la diference: so pari, sô mari, siei fradis e sô sûr. E al jere dut un berghelarili a ore di cene (Nadia Pauluzzo, Il bintar)
   3. se nol è ancje l'articul definît, il possessîf si met dopo dal sostantîf "cjase":  al è lât in feriis: al ven a stâi che al è lât a cjase sô, des bandis di Palme, indulà che al à di vê une sûr (Josef Marchet, Lis predicjis dal muini)
   4. l'ordin normâl che al previôt la posizion dal possessîf denant dal sostantîf, al pues jessi invertît ancje in ciertis locuzions tipichis o par resons di enfasi o di stîl:  "Noaltris e sin ca par justâ i siei malans…" "…par salvâ l'onôr di cheste cjase, che no à mai vût une magle, e l'onôr so…" (Ercole Carletti, Mariute)
2. s.m. dome sing., ce che al è di proprietât, in possès, tal interès o di competence di lui o di jê, o in cierts câs ancje di lôr:  cuant che un al ven tocjât sul so, al piert dut il sens de justizie e dal dirit dal prossim (Roberto Ongaro, Il muc); a disevin che se ducj a fossin cjampaniliscj, dutis lis robis a funzionaressin ad in plen. Parcè che ognun al lavorarès sul so, cul so, par se (Riedo Pup, I furlans e il cjampanilisim); Graciant Diu, un franc dal so no i mancjave, stant che in bancje in France al veve un biel grumut (Franca Mainardis, Grivôr)
   
   1. tal pl., i bêçs di lui, di jê o in cierts câs di lôr
3. s.m. tal pl., i parincj, spec. il pari e la mari, di lui, di jê o ancje di lôr:  i siei a fasevin i contadins, a vevin un bon teren (Catarine Percude, L'oseladôr); la cjase dai siei no jere avonde grande di tignî une fameone cussì cressude (Lucio Perès, Il mâl dal mûr)
4. s.m., pron.poss. [CO] tal pl., la compagnie, il grup, il partît, la fazion e v.i. di lui, di jê o in câs ancje di lôr:  el jeur al cor indenant. Svelt el re, un pôc ancje infotât, gji da daûr, e cor che ti cor al è za lontan dai siei (Dolfo Zorzut, Cui isel content in chist mont?); tal votâ [in consei comunâl], ducj i siei a cjalavin Gavot: se al sgnofrave il nâs al jere di votâ sì; se invezit al spacave il façolet in bande al jere no… e ducj a ubidivin (Dino Virgili, La aghe da pît la cleve)
5. adi.poss., pron.poss. in forme sostantivade o cul sostantîf sotintindût, tal f.pl., lis ideis, lis peraulis, lis azions e v.i. di lui, di jê o in câs ancje di lôr, soredut se a son baronadis o strambariis:  si voleve fâlu lâ tel poç, par viodilu a fântin cualchidune des sôs, e podê fâ bacan su la sô piel (Giovanni Gortani, A la sagre di Mion); a viodilu cussì calm e cuiet, no i passave nancje pai siet sintiments di stufâlu cu lis sôs (Jolanda Mazzon, Fûr di timp)

Polirematichis e espressions idiomatichis

• dî la sô loc.v.
• lâ par so cont loc.v.
• lassâ cori la aghe pal so canâl loc.v.
• lassâ fridi tal so gras loc.v.
• par so cont loc.av., loc.adi.inv.
• provâ su la sô piel loc.v.
• savê il cont so loc.v.
• savê il fat so loc.v.
• su lis sôs loc.av.
• tignîsi su lis sôs loc.v.
• tirâ la aghe al so mulin loc.v.
• tornâ tal so jessi loc.v.
• viodi cui siei voi loc.v.

Proverbis:

• a fiestis di Nadâl, ognidun al so cjavedâl
• al è facil di direzi lis cjasis di chei altris, al è la sô che al è une vore dificil
• al pâr che la sô crôs a sedi la plui grande ma se si cjale chê di chei altris si torne a cjoli sù la sô
• al sa plui un mat a cjase sô che no un savi a cjase di altris
• ancje il lôf al cîr la sô cove
• contentâsi dal fat so e gjoldi plui che si po
• cuant che ognidun al à il so, il diaul nol à nuie
• cui che al fâs pezarie al mangje il so
• cui che al litighe al mangje il so
• cui che lis cjape a son sôs
• cui che nol cjate bêçs tes sôs sachetis int cjate mancul in chês di chei altris
• cui che nol ten cont dal so, mancul di chel di chei altris
• cui che si cure dai fats dai altris al trascure i siei
• cui che si lasse cridâ al è paron dal so cûr
• cui che si lasse vuidâ al è paron dal so cûr
• cui che si scuse cence jessi interogât al fâs clâr il so pecjât
• daspò tancj agns e tant timp la aghe a torne al so mulin
• di Avost mangje a so cost
• Diu al tocje i siei
• ducj a àn lis sôs
• ducj à gust di viodi mats in place ma no dai siei
• ducj misure sul so braçolâr
• ducj si à la sô pecje
• ducj tire la aghe al so mulin
• fortunât cui che al impare a spesis dai altris e no a spesis sôs
• i bêçs siei a son i plui biei
• i siei carantans a plasin plui di ducj
• il cûr al resone a so mût
• il diaul al jude i siei
• il pan che al è destinât pai siei dincj, nissun no lu mangje
• il Signôr al cjastie i siei
• il Signôr al tocje i siei e jo mi tocji i coions
• il Signôr al visite i siei
• in cent agns e cent dîs la aghe a torne ai siei paîs
• intant che si pense ai fats dai altris, si dismentee i siei
• l'agnel umil al tete dôs maris, chel sofistic nancje la sô
• l'om la sô sorte le puarte tai comedons
• la aghe no piert mai i siei dirits
• la bolp e à pôre de sô ombre
• la lezion plui imprimude e je chê imparade a sôs spesis
• la vît i vûl il so pâl
• lasse lâ la aghe al so destin
• mangjâ a gust so e vistîsi a gust dai altris
• mangjâ a mût so e vistî a gust gno
• mangjâ a mût so e vistîsi a mût dai altris
• miôr famei a cjase sô che no paron a cjase dai altris
• miôr un cjôt so che no un palaç di un altri
• nissun profete tal so paîs
• no bisugne impaçâsi dai fats dai altris che si à avonde di viodi dai siei
• no si à di spudâ tal so plat
• nol po tignî cont de robe dai altris cui che nol ten cont de sô
• ogni bocje il so pistum
• ognidun al è paron a cjase sô
• ognidun al sint cu lis sôs orelis
• ognidun al viôt cui siei voi
• ognidun che al cjali a cjase sô
• ognidun che al lavori de sô art
• ognidun che al pensi ai fats siei
• ognidun che al proviodi ai câs siei
• ognidun che al stedi cui siei
• ognidun le pense a so mût
• pal fat so, ognidun al è bon
• par fâ il fat so ognidun al è bon
• tirâ il pont tant che si po, ma dâi a ognidun il so
• vistî a mût di chei altris, mangjâ a mût so