Dizionari de Lenghe Furlane

to  to  [FO]

1. adi.poss., pron.poss. di te:  tu pei tiei studis tu cognossis ben operis e autôrs, e pel to inzen tu cognossis la art (Zuan Lurinçon, La Madalene); "Al è miôr che a Udin no tu ti fasis plui viodi. Crodimi. Tu âs fat il plui grant fal de tô vite." (Gianni Gregoricchio, Îr e doman)
   Cfr. gno , so , nestri , vuestri , lôr²
   
   1. come chei altris possessîfs, cui nons di parintât al inibìs la presince dal articul definît, simpri tal singolâr e dispès ancje tal plurâl:  «To pari al jere un om râr, tu fasis ben a vaîlu» (Alan Brusini, Par stradis lungjis); "Gjovanin, va svelt a clamâ tiei fradis […]" (Pieri Somede dai Marcs, Il prossim)
   2. se nol è ancje l'articul definît, il possessîf si met dopo dal sostantîf "cjase":  jentre, fâs come che tu fossis a cjase tô! (Stiefin Morat, Donald dal Tiliment)
   3. l'ordin normâl che al previôt la posizion dal possessîf denant dal sostantîf, al pues jessi invertît ancje in ciertis locuzions tipichis o par resons di enfasi o di stîl:  "Che e sedi dute robe tô, Gjovane, al è dut di viodi!…" (Luciano Rocco, La foghere)
2. s.m. dome sing., ce che al è di proprietât, in possès, tal interès o di competence di une seconde persone singolâr:  no tu vevis une cjamese di mudâti la fieste, e se tu volevis spudâ sul to, tu vevis di spudâti in man (Josef Marchet, Lis predicjis dal muini); "Ten lis mans sul to, capît?" (Pieri Piçul, Vieri e gnûf); Pense ai tiei afârs. [...] Sta tal to. (Roberto Polesello, https://polesello.org/2024/07/03/friulian-22/)
   
   1. tal pl., i bêçs di une seconde persone singolâr
3. s.m. tal pl., personis che a componin la famee de seconde persone singolâr, in particolâr i gjenitôrs:  «Cemût?» «Ben» «E i tiei?» «Graciant Idiu, vonde ben» (Meni Ucel, Misure)
4. s.m., pron.poss. [CO] tal pl., la compagnie, il grup, il partît, la fazion e v.i., de seconde persone singolâr:  "Ah, cussì! Tu no tu fasis la spie nome dai nestris [dai partigjans], ma ancje dai tiei [dai fassiscj]!" (Roberto Ongaro, Il muc)
5. adi.poss., pron.poss. in forme sostantivade o cul sostantîf sotintindût, tal f.pl., lis tôs ideis, lis tôs peraulis, lis tôs azions e v.i., soredut se a son baronadis o strambariis:  "Tu âs cumbinât une des tôs!" (Arturo Feruglio, In cîl e je une stele!…); e jù une ridade, un got, une bugade, une riduçade. "Simpri lis tôs, tu!" (Dolfo Zorzut, No je plui vive)

Polirematichis e espressions idiomatichis

• tô agne loc.inter.

Proverbis:

• cjale il to trâf intant che tu cjalis il gno cjaveli
• conte i tiei botons e po tu contarâs i miei
• cui che al fâs il to mistîr no ti è mai amì
• cui trê rês de Pifanie va decîs par la tô vie
• il pan destinât pai tiei dincj nissun no lu mangje
• la tô muart e je la mê vite
• mangje a mût to e vistìs a mût dai altris