Dizionari de Lenghe Furlane

cuarp  cuarp  [FO]

1. s.m. cualsisei robe che e cjape un spazi e che e à une forme:  chescj crets, che in origjin a formavin cuarps tabulârs o lenticolârs plui o mancul orizontâi, a son stâts comprimûts, deformâts e fruçonâts (Francesco Gobbo, Gjeologjie e paleontologjie ator di Preon)
   Sin. ogjet , robe
2. s.m. chim., fis. ogni complès materiâl che al à estension spaziâl:  la energjie di un cuarp ponderabil e dovarès vignî rapresentade di une sume estindude a ducj i atoms e i eletrons de energjie possedude dai singui atoms e eletrons (Lorenzo Marcolini, L'articul di Einstein dal 1905 sul efiet fotoeletric. Un lavôr plurilengâl voltât in lenghe furlane)
3. s.m. l'organisim che al costituìs la struture fisiche dal om e des bestiis:  il cuarp uman al è componût almancul al 60 par cent di aghe, ma ogni dì traviers il sudôr, la urine, la respirazion a vegnin pierdûts plui di doi litris di aghe (Guglielmo Pitzalis, Mangje san 2); domenie e je un regâl dal Signôr par polsâ il cuarp e nudrî la anime (Riedo Pup, Tornìn a fâ fieste)
   Sin. fisic
   
   1. costituzion:  dal barbe Tilio, mi visi a pene: un omenon di cuarp, come ducj i Pascuts, ma cuntune muse di frutin (Gianni Gregoricchio, Trê feminis)
      Sin. complession , costituzion , cuarnadure , fisic , grene
   2. part materiâl dal om che e si opon a chê spirituâl:  feminis seneosis di gjoldi il plasê dal cuarp (Angelo Floramo, Il scritôr plui "pop" de Ete di Mieç)
      Sin. cjar²
   3. il toc dal cuarp fra il cuel e la vite:  un dai segns plui tipics dai insiums a son lis alucinazions visivis. Bestiis che no esistin (par esempli, un cuarp di elefant cun gjambis di zirafe e cjâf di crocodîl), personis mai viodudis, machinis fantastichis (Franc Fari, Il cjâf dai furlans)
4. s.m. persone o bestie cence vite:  al jere muart pe libertât de sô patrie. Il so cuarp bandonât su la rive, cence sepulture (Checo Tam, La sentinele); i cuarps dai animâi che a vignivin di ambients di vite diferents […] a finivin tal fonts dal bacin, a jerin cuviertis dal pantan e li si mantignivin (Francesco Gobbo, Gjeologjie e paleontologjie ator di Preon)
   Sin. cadavar , muart²
5. s.m. [TS] astron. ognidun dai grancj ogjets dal cîl, tant che planets e stelis
   Sin. astri , planet , sfere , stele¹
6. s.m. complès di elements plui o mancul de stesse sorte, che al pues jessi calcolât dut insiemi:  chê puare taviele e je lade in mil bocons, infûr che il cuarp di mieç, dulà che i Jacots e vevin il broili (Giovanni Gortani, La sbigule - Une gnot tun broili); la petroliere sore il grant vintri neri e veve arbui di açâl blancs, e il grant cjamin ros e turchin a fassis, e lis struturis blancjis e altis dal cuarp dai lozaments (Agnul di Spere, Int no consumade)
   Sin. batarie , complès , grup¹ , racuelte , rie , serie , sfilze , unitât , bloc
7. s.m. insiemi di personis che al forme une unitât che e à in comun une funzion, une ativitât, une posizion sociâl e v.i.:  e conte la capilaritât de presince sul teritori e tai siei cuarps sociâi. Il Partît teritoriâl al è prime di dut une rêt di coesion sociâl; (Sergio Cecotti, Il risultât eletorâl dai partîts di identitât teritoriâl - A case study: Scottish National Party); Al decidè alore di lâ a Osôf e di rinfuarçâ chê posizion furnintle di un cuarp di 600 militârs, di canons e di munizions (Giovanni Pillinini, Zuan Batiste Cavedalis - Une vite esemplâr); i autonomiscj furlans, che a son une minorance intal cuarp dai eletôrs furlans, no nus vignaran daûr (Adrian Cescje, Memoriis di politiche linguistiche)
   Sin. categorie , compagnie , complès , consei , corporazion , ordin , organisim , trop²
8. s.m. unitât di fuarcis armadis:  ai 12 di Zenâr dal 1915 al è stât clamât a servî tal cuarp dai Alpins, prime tal distret militâr di Sacîl e po dopo intal bataion "Cividât" (Angelo Floramo, Ricart e Gjenio, furlans cuintri in non di chei altris); il comun, par sigurâ l'ordin public e la esecuzion dai siei compits al è dotât di un o plui cuarps di polizie comunâl che a fasin sul teritori comunâl lis funzions previodudis de leç e dai regolaments comunâi (Aministrazion Publiche, Statût dal Comun di Udin)
   Sin. specialitât , unitât
9. s.m. element principâl, part plui compate e salde di alc:  par facilitâ la consultazion, prime dal cuarp dal dizionari a son listis des scurtaduris dopradis (Sandri Carrozzo, Jentrade dal DOF); lis prominencis a son vignudis une vore infûr e dal cuarp dal nûl (Stefano Micheletti, Marcellino Salvador, Notis di meteorologjie pal Friûl - Vignesie Julie); La costruzion e veve une forme stranie, tant che se a un cuarp principâl, vieri di almancul cinccent agns, si fossin zontâts tal lâ dal timp altris tocs, altris repeçs (Franca Mainardis, Il sium di Lissandri)
   Sin. cûr , implant , mieç , nusel , sostance , vues
10. s.m. densitât, consistence:  un vinut cun pôc cuarp
    Sin. anime , consistence , durium , fuarce , gnerf , plenece , possance , soliditât , tignince , vigôr , virtût , vivôr
    
    1. (fig.) fuarce, vigôr:  une propueste cence cuarp
       Sin. anime , fuarce , gaiardece , gnerf , plenece , possance , vigôr , virtût , vivôr , schene
11. s.m. mat. insiemi di elements indotât des operazions di sume e di moltiplicazion, che si puedin comutâ e che a àn lis proprietâts formâls de sume e de moltiplicazion
12. s.m. tipogr. misure di grandece di un caratar tipografic:  come che si bacile de netisie des mans, de juste bulidure dal rîs, de cuete dal pan o dal rost, de gradazion dal vin, dal cuarp di stampe di un libri o di un sfuei e salacor di tantis altris cagneris di nuie, cussì si a di bacilâ de proprietât, de mondisie e de puritât de lenghe (Josef Marchet, Fevelâ ben)
13. s.m. [TS] anat. part di un organisim animâl o vegjetâl cun carateristichis di forme e di funzions particolârs:  a començarin a studiâ i malâts che i neurochirurcs a vevin operât taiantji dal dut il cuarp calôs, ven a stâi il colegament di comunicazion dal cerviel di çampe cul cerviel di diestre (Franc Fari, Il cjâf dai furlans)

Polirematichis e espressions idiomatichis

• dâ cuarp loc.v.
• lâ dal cuarp loc.v.
• lâ di cuarp loc.v.
• mosse di cuarp loc.s.f.

Proverbis:

• al è râr di cjatâ une frute che di cuarp e di cûr e sedi sane dute
• beât chel muart che al plûf sul so cuarp
• cuant che il cuarp al si frolìs, la anime a si pintìs
• cuarp passût, anime consolade
• il plet, il çuet e il vuarp a àn il diaul tal cuarp
• la femine e je il paradîs dal cuarp, il purgatori de borse, l'infier da la anime
• lis feminis a son il paradîs dal cuarp, il purgatori de borse e l'infier da la anime
• trombe di cûl, sanitât di cuarp: cui che nol trombe al è muart