Dizionari de Lenghe Furlane

ordin  /ò-/  or|din  [FO]

1. s.m. il meti e il tignî lis robis tal lôr puest e la cundizion di ce che al è tignût tal so puest o cui elements tal lôr puest:  e cjapà cun ingôs chê robe preparade cun tant afiet […] e le poià cun ordin tai stes scansei (Maria Forte, Cjase di Dalban); là dentri al regnave ordin e mondisie (Alan Brusini, Come tai romançs)
2. s.m. disposizion daûr di un criteri:  l'inglês e je une lenghe cuntune morfologjie flessionâl puarute, cuntun ordin des peraulis fer (par esempli, intes frasis declarativis il subiet al ven prime dal verp predicatîf) (Vladimír Petkevič, trad. di Zorç Cadorin, Corpus linguistics); lis rispuestis a son in ordin alfabetic (Max Mauro, Un Friûl difarent: i 90 mhz di Onde Furlane); obietîfs no gjenerics, ma disponûts secont un ordin di prioritâts (Adrian Cescje, Memoriis di politiche linguistiche)
   Sin. sest
   
   1. secuence di elements:  si cjate che la solidarietât e ven considerade di cui che al rispuint plui impuartante dal acet (91% e 84% tal ordin) (Marianna Stella, La imigrazion percepide. Il câs di studi dal Comun di Puçui); i fruts i vevin savoltât l'ordin des lastris [che a vignivin proietadis] (Pieri Somede dai Marcs, Sant Simon: 28 di Otubar 1917)
      Sin. secuence , direzion
3. s.m. atitudin a tignî lis robis tal lôr puest, a fâ lis robis pulît:  a vore si à di vê ordin e precision
   Sin. sest
4. s.m. rispiet des regulis:  il svilup dal spirt indulà che e devi risultâ la justizie, la fradaie, il rispiet de autoritât, dal ordin (Tarcisio Venuti, La cjase di Toni)
   Sin. dissipline
5. s.m. implant politic e sociâl:  stant che lis pretesis dai contadins a jerin une turbative dal ordin, i nobii a vevin fat ricors al tribunâl dai Incuisitôrs (Pierluigi Visintin, Friûl e furlans te Histoire de ma vie di Giacomo Casanova); par chest jo o scombat, par chest o dovìn scombati, prin par imbastî e po par costruì un gnûf ordin sociâl (Pieri Somede dai Marcs, Un pugn di moscjis)
   Sin. sisteme , implant , ordenament
6. s.m. complès di ce che al è naturâl, che al va daûr des leçs de nature o che al è normâl:  strache e polse a van o a vegnin in volte. Ogni robe e je intal ordin des robis e no spaurìs (Ivano Urli, Storie di Vera); meti adun la sfere dal ordin cosmic, dulà che lui al olme […] une reson superiôr par ogni fat (Franco Marchetta, Madalene)
   Sin. nature , norme , normalitât
7. s.m. nivel di cualitât o di impuartance:  une sdrume di atendents e cjavai di prin ordin a implenivin lis stalis e ogni cjanton dal curtîl (Pieri Somede dai Marcs, Une conference di padre Gemelli); in cheste suaze i problemis di lavôrs publics, o di stradis di sistemâ a deventin di secont ordin (Marta Vezzi, Giorgio Morocutti, Sindic dal plui piçul paîs de Cjargne)
   Sin. categorie , cualitât , cundizion , grât¹
8. s.m. setôr, nivel o cualitât di alc che al ven considerât:  il sburt a emigrâ al è stât il finâl di un complès ingredei di motivazions, di ordin economic, politic, e fintremai emotîf (Francesco Fait, La emigrazion in Australie dal Friûl - Vignesie Julie); [tescj dal Friûl orientâl dal Votcent] pe prime volte a tratin di cuistions mai prin frontadis in lenghe furlane: cuistions di ordin morâl e sociâl, di storie e di gjeografie, di botaniche e di zoologjie, di art e di economie (Zuan Nazzi Matalon, I Lunaris dal '800 dal Friûl Orientâl)
   Sin. caratar , fate , gjenar , nivel , sorte , stamp , tai , tip
9. s.m. grandece plui o mancul aprossimative:  dimensions dal ordin di une desene di nanometris (Lorenzo Marcolini, Lis celis organichis nanostruturadis); 89 documents, di divierse lungjece, par un totâl sul ordin des 600.000 peraulis (Sandri Carrozzo, Franz Feregot, La elaborazion di un corpus etichetât de lenghe furlane scrite: esperiments e prospetivis)
10. s.m. grup des personis, pal solit organizât, che a àn in comun une ativitât, une profession e v.i.:  un cors di formazion gjornalistiche pai colaboradôrs, cun la partecipazion dal president dal Ordin dai gjornaliscj de regjon (Max Mauro, Un Friûl difarent: i 90 mhz di Onde Furlane)
    
    1. ordin religjôs:  la Vie Crucis, che si ispire aes antighis devozions in ûs intai Lûcs Sants, e scomençà a difondisi, graciis al ordin dai fraris francescans, ae fin dal secul XIV (Erika Adami, A Pasche no dome ûfs)
    2. [TS] stor. associazions di caratar religjôs e militâr nassudis inte Ete di Mieç:  cuant che al murì, tal 1977, il storic furlan Gaetano Perusini le lassà [la Roche Bernarde] al Sovran Militâr Ordin di Malte (Consorzi pe difese dai cjistiei storics dal Friûl - Vignesie Julie, Roche Bernarde)
    3. [TS] stor. fasse sociâl:  [la Contee di Gurize] e jere aministrade dai Stâts Provinciâi […], un organisim ancjemò feudâl formât di trê ordins: clericât, patrizis e i no nobii (Ferruccio Tassin, Autonomie tal Friûl austriac)
11. s.m. biol., bot., zool. categorie inte classificazion di organisims biologjics, tra la classe e la famee:  i corvats a fasi part dal ordin dai Passeriformis
12. s.m. [TS] arch. sisteme de architeture classiche:  [a Olimpie] il Templi di Ere di ordin doric al è plui piçul di chel di Zeus, ma plui antîc (Adrian Cescje, Viaç aes origjins dal Logos)
13. s.m. imposizion di fâ alc che e ven fate cun autoritât, cul oblic di ubidîle:  i uficiâi a corevin sù e jù tirâts in muse e a berlavin ordins un daûr di chel altri (Gianni Gregoricchio, Trê feminis); la prime virtût par cui che al si è inrezimentât intal partît e je la dissipline; il so prin dovê al è chel di ubidî ai ordins o aes diretivis che a vegnin dal alt (Josef Marchet, Dissipline)
    Sin. befel , disposizion , comant
14. s.m. [TS] cum. domande di vê un prodot o un servizi:  fâ un ordin di cincuante sacs di ciment
    Sin. ordenazion

Polirematichis e espressions idiomatichis

• fâ ordin loc.v.
• meti in ordin loc.v.
• par ordin loc.av.
• par ordin che loc.coniun.

Proverbis:

• di un disordin cualchi volte al nas un ordin
• dulà che nol è ordin al è disordin
• l'ordin al è pan, il disordin al è fam
• un disordin al fâs un ordin
• un disordin al mene un ordin