Dizionari de Lenghe Furlane

cundizion  /-òn/  cun|di|zi|on  [FO]

1. s.f. ce che al covente par che al sucedi alc altri:  e reste in pîts la cuistion de cognossince des cundizions che a àn favoride la vite e cualis che a son lis causis che a àn puartât ae formazion de prime celule (Lorenzo Marcolini, Recension di La scienza non ha bisogno di Dio); o vin dit e mostrât tantis voltis che chestis cundizions [par vê la autonomie regjonâl] - etnichis, linguistichis, storichis, gjeopolitichis - a son plui netis e plui fuartis pal Friûl che no pe Sardegne o pe Sicilie, e pôc sù pôc jù compagnis di chês de Val di Aoste e dal Trentin (Josef Marchet, Cuarde e savon)
   Sin. câs
   Var. condizion
   
   1. part di un acuardi, element che al fâs che un acuardi al vedi validitât:  cui che al lavore intal implei public al gjoldarà di cundizions contratuâls miôr, ma il belanç dal Stât nol vignarà metût a pericul (Tjaša Gruden, Guvier Šarec, al cres il gradiment de opinion publiche); cheste prime mission no concludè nuie, par vie che lis cundizions [di rese] proferidis dai todescs a jerin masse duris (Giovanni Pillinini, Zuan Batiste Cavedalis - Une vite esemplâr)
      Sin. pont , tiermin , clausule
2. s.f. complès di elements, carateristichis, fenomens che a caraterizin cdn. o alc:  rindisi cont des veris cundizions politichis di chês pocjis nazions che a mantegnin ancjemò un guvier acentrât (Josef Marchet, La gnespule malmadure); Nardon al jere restât propit malapaiât e al si tormentave il cerviel avilît di chê sô cundizion [di brutece] e al cirive di vistîsi ben, di metisi un pôc in mostre, ma al jere dibant (Pieri Somede dai Marcs, Nardon e Vigjute di Nani)
   Sin. circostance , stât² , situazion
   
   1. situazion de atmosfere, dai fenomens meteorologjics:  la condensazion e mande fûr calôr, alore il nûl al reste plui cjalt dal aiar che al è dulintor e al è intune cundizion di instabilitât (Stefano Micheletti, Marcellino Salvador, Notis di meteorologjie pal Friûl - Vignesie Julie)
   2. maniere che alc si è conservât:  un esemplâr prime identificât par Langobardisaurus rossii (Bizarrini & Muscio, 1997) al è salacor une altre forme di retil, avonde primitive, che al è dificil assegnâ a di un ciert grup par vie che nol è in buinis cundizions (Francesco Gobbo, Gjeologjie e paleontologjie ator di Preon)
3. s.f. ancje tal pl., mût di jessi, mût di stâ:  Vera e je cumò in cundizions, cun dutis lis strussiis frontadis in chei agns de sô vite, che se e pense ae mame e aes baronadis petadis di picinine a rimpinâsi pai orts di chei dongje, no rive a gloti lis lagrimis che i travanin i voi (Ivano Urli, Storie di Vera); Eluana Englaro e jere intun stât vegjetatîf, une cundizion che no esist in nature e che no esisteve prime des tecnichis di rianimazion avanzade (Christian Romanin, Amato De Monte: Il Friûl, patrie des bataiis di civiltât); o pensavi ai filosofs che a disin che il patî al è te cundizion umane e che a curâmi al sarà nome il timp (Alan Brusini, Gian Paolo Linda, I forescj)
   
   1. situazion che e permet di fâ alc:  no soi in cundizion par un compit cussì impuartant (Roberto Ongaro, Il muc)
4. s.f. posizion sociâl e economiche di une persone:  jo o soi stât pal mont un pieç di agns; e no cu la int di alte cundizion che e sa compuartâsi, ma simpri in mieç de puare int, cui operaris, cul popul bas (Josef Marchet, Lis predicjis dal muini); il mangjâ e il bevi, come ancje il lâ a stâ tal miôr albierc, al è un simbul de cundizion alte e al à un fuart valôr di rapresentance (Pierluigi Visintin, Friûl e furlans te Histoire de ma vie di Giacomo Casanova); di cundizion modeste, al studie prime a Vignesie, là che al cognòs Girolamo Muzio, il compagn di une vite, e po a Padue, cence però, che nus risulti, rivâ a laureâsi (Mario Turello, Il brevet)
   Sin. nivel , grât¹ , stât²
   
   1. ass., posizion sociâl alte:  un sôl i secjave al plevan di viodilu fûr: Tin Çanôr, om di afârs e di cundizion (Riedo Pup, La sigurazion des vacjis)
      Sin. nivel
5. s.f. complès di capacitâts inteletivis che a permetin di capî, di valutâ e di fâ cun ecuilibri:  une femine plene di cundizion, brave di podine e spolert, che no pierdeve timp a meti perlis in fîl (Maria Forte, Il Bide di Miot)
   Sin. cjâf , sintiment

Polirematichis e espressions idiomatichis

• a cundizion che loc.coniun.
• a pat e cundizion che loc.coniun.
• in cundizion di loc.prep.