Dizionari de Lenghe Furlane

nivel  /-èl/  ni|vel  [FO]

1. s.m. altece di un plan orizontâl in riferiment a di un altri plan orizontâl; altece di un pont a confront cuntune superficie:  a lavorarin par liberâ dal pantan il plan a nivel de strade (Carlo Sgorlon, Ombris tal infinît)
   Sin. altece
   Var. livel
   
   1. altece là che e rive la superficie libare di un licuit:  il nivel de aghe si sbasse e si rivin a viodi lis ruvinis dai borcs di Redone (Daria Miani, Maman! 28-8-2020)
2. s.m. (fig.) grât di cualitât o cuantitât:  la clime di cjace ae spie e jere tal Friûl a di un nivel esasperât (Carli Pup, La seconde Irlande); a paritât di cuantitât di alcul parât jù, i nivei di alcolemie a puedin svariâ in funzion di diviers fatôrs (Guglielmo Pitzalis, Mole il bevi!)
   Sin. cualitât , grât¹ , valôr
   
   1. (ancje ass.) situazion puntuâl intun procès, intune dinamiche, intun stât dal jessi e v.i.:  tu rivis a un nivel che ti pâr che la tô realtât e sedi une altre (Checo Tam, Sic transit gloria mundi)
      Sin. pont
3. s.m. (fig.) cundizion sociâl o economiche:  la int e va indenant a spindi, magari indebitantsi, pûr di no rinunziâ al so nivel di vite abituâl (Angelo Floramo, Cuintristorie dal Nûfcent 1970-1980)
   Sin. categorie , cundizion , grât¹ , posizion
   
   1. posizion tignude intune organizazion:  il duche [dal Friûl] no si tignarà ma lafè no di sotan dal re [langobart] si ben di sorestant di nivel compagn (Sandri Carrozzo, Rotgaut e la politiche furlane langobarde); struturis par dipendents di tierç nivel (Aministrazion Publiche, Atlant dai servizis sanitaris e sociasanitaris in Friûl Vignesie Julie)
      Sin. categorie , cundizion , grât¹ , posizion
4. s.m. mût di considerâ alc, contest li che si considere o che al sucêt alc:  la Scuele mosaiciscj dal Friûl, la plui impuartante a nivel mondiâl (Oscar Puntel, Mosaic, une art furlane); a nivel psicologjic la meditazion mindfulness e je une pratiche di esperience e un alenament mentâl (Franc Fari, Neurosiencis de meditazion)
5. s.m. [TS] tecn. imprest dai muredôrs, formât pal solit di une stangje cuntune capsule di veri plene di aghe cuntune bufule di aiar, che e sta juste tal centri se si ten dret, doprât par viodi se une struture e je juste in plan o in verticâl:  al jere partît cun nivel e cul plomp, mighe cu la sclope, che a lui no i lave la sclope (Meni Ucel, Ideis)
   
   1. strument topografic par cjatâ la linie orizontâl
6. s.m. [TS] dir. contrat a paiament e sume paiade pe cession dal domini util di un fonts:  dazi sul pan, sul vin, su la cjar, sul sâl, che a jerin lôr, e cjanui e nivei di campagne cu la glesie, e tassis su ogni fûc (Dino Virgili, La aghe da pît la cleve); lis renditis dai Braçà tal 1780 a vignivin di 119 afitancis […], di 83 nivei […], di 17 enfiteusis […] (Adrian Cescje, Liniis di storie sociâl e economiche dal Friûl 1500 - 1800)
   
   1. (fig.) spese o impegn che al va indevant tal timp:  chei fîs e son stâts par lui un grant livel (Giulio Andrea Pirona, Ercole Carletti, Giovanni Battista Corgnali, Il Nuovo Pirona)

Polirematichis e espressions idiomatichis

• a nivel loc.av., loc.adi.inv.
• a nivel di loc.prep.
• sore il nivel dal mâr loc.av., loc.adi.inv.
• sul nivel dal mâr loc.av., loc.adi.inv.