Dizionari de Lenghe Furlane

cualitât  cua|li|tât  [FO]

1. s.f. proprietât o complès di proprietâts che a segnin la nature o l'aspiet di alc:  lis fonts di energjie fossile a àn diviersis cualitâts che lis rindin unichis: la densitât energjetiche (tante energjie in pôc spazi), la pussibilitât di jessi traspuartadis e imagazenadis cuntune cierte facilitât, la lôr dutilitât di ûs (a van ben in tancj contescj diferents), la sigurece tal doprâlis, il fat di podê programâlis (Matteo Mazzolini, Autonomie energjetiche nol vûl dî autarchie)
2. s.f. nivel di cure, di bontât, di perfezionament:  la radio e fâs un grant servizi ae lenghe furlane, stant che e je la sole radio in lenghe furlane, e la sô cualitât gjornalistiche e linguistiche si juste cul passâ dal timp simpri di plui e simpri miôr (Adrian Cescje, Memoriis di politiche linguistiche); ce che al conte al è il numar - come in bancje - la cualitât no à plui nissun valôr (Franc Fari, Il cjâf dai furlans); ancje par vie de crisi di soreproduzion de viticulture europeane, la atenzion dai produtôrs si è spostade di plui sul miorament de cualitât (Enrico Peterlunger, Storie curte de vît in Friûl)
3. s.f. complès di carateristichis fisichis, psicologjichis o morâls di cdn.:  no je la scuele che e fâs l'om, al è il cûr, l'amôr di patrie, il coragjo e il sens dal dovê, e nô, dutis chestis cualitâts lis vin viodudis in te (Roberto Ongaro, Il muc); l'ostîr, par insegnâi, al saltà fûr su la strade e al viodè che l'om al jere cuntun cjar e cul cjaval; curiôs di cualitât, nol savè fâ di mancul di domandâ (Roberto Ongaro, Cretevierte)
   Sin. caratar , dote , carateristiche , fate , nature , naturâl , ande
   
   1. carateristiche positive:  il nestri mût di vivi, di lavorâ e di pensâ: cualitâts e difiets, virtûts e vizis, valôrs e sperancis (Riedo Pup, Fûr che al vegni cui che al è stât); une frutate di tantis cualitâts (Pieri Piçul, Vieri e gnûf)
      Sin. dote , presi , pro , virtût
4. s.f. gjenar, sorte, grup o varietât specifiche intun complès plui grant:  [ai sommeliers] ur baste chê lagrime par induvinâ la cualitât e stimâ la bontât di chel vin (Riedo Pup, La civiltât dal fum); il bosc, viers la mont, al jere a covis di colôrs secont la cualitât dai lens: un blancôr di agaç florît, un vert lusint di rôl, un lustri di fueis di cjastinâr che a tornavin a menâ dopo agns di murie, un scûr di pins, un clâr di danis (Alan Brusini, Par stradis lungjis); a àn reson di proclamâ che a Vignesie i canâi a rapresentin une seconde cualitât di stradis (Arturo Feruglio, Viaç a Vignesie)
   Sin. famee , gjenar , gjernazie , raze² , reson , sorte , specie , tip , tipologjie , fate

Proverbis:

• no fâs mâl la cualitât ma la cuantitât
• par che al sedi bon il cafè a vuelin trê robis: cualitât, cuantitât e savêlu fâ