Dizionari de Lenghe Furlane

gjernazie  /-nà-/  gjer|na|zi|e  [AF]

1. s.f. grup di personis che a àn une divignince in comun, che a son in parintât tra di lôr:  done Menie Durie e jere stade une femine di coragjo che dopo vê salvade la cjase di so pari, e à tignût drete chê del marît e implantadis cuatri fameis cu la sô gjernazie (Catarine Percude, La mulinarie); "Sta da la bande del fi, tu; sta cuintri di me, tu… […] Mi infoti di te, di lui, di dute la vuestre gjernazie, porche ostrighe. Restarai bessôl! Vait in malore ducj…" (Anute Fabris, A passe la scalmane)
   Sin. cep , cjasade , cjase , çoc , gjenerazion , naie , sanc , semence , dissendence , int¹ , famee , çocje
   Var. gjarnazie
2. s.f. grup di personis nassudis e vivudis sù par jù tai stes agns:  la Saf e je cetant leade ae storie dal Friûl […] jessint stade tal timp la scune di une interie gjernazie di gjeolics e gjeografs no dome furlans (Oscar Puntel, Su la plui alte cime… cu la SAF dal 1874); fâ cressi une gnove gjernazie di autonomiscj furlans (Redazion La Patrie dal Friûl, A tornin lis "Lezions di Autonomie", mai cussì necessariis come in chest periodi storic)
   Sin. gjenerazion , naie , ete
3. s.f. grup di personis che a àn in comun origjins, lenghe e tradizions, che a formin une comunitât etniche, linguistiche, nazionâl:  devant di ducj i popui da la Europe, de gjernazie latine, slave, ongjarese e todescje, Bugat al concludeve: "Se ducj nus bandonin, nus judarìn bessôi. Dio che fedi il rest. No vuarìn che nissun disponi di nô, senza di nô" (Angelo Floramo, 1914-2014 Cuintristorie de Grande Vuere)
   Sin. cep , çoc , int¹ , sanc , semence , raze² , popul¹ , nazion , naie , çocje
4. s.f. categorie di personis distintis par un ciert caratar:  scuelaruts e pastoruts è la piês gjernazie che a si po cjatâ pardut (Luigi Gortani, La fie e la fiastre); chest implant al à durât cuatri secui e al à butât fûr centenârs, miârs di predis, une gjernazie par cont so, dute compate, dute compagne, dute diferente e alternative a la int normâl (Antoni Beline, La fabriche dai predis)
   Sin. raze² , fate , çocje , int¹ , plante , çoc