Dizionari de Lenghe Furlane

gjenerazion  /-òn/  gje|ne|ra|zi|on  [FO]

1. s.f. il gjenerâ, il gjenerâsi e il lôr risultât:  intal sium REM si è viodude une ativazion dal tronc dal encefal, dal talam e di struturis colegadis a la gjenerazion des emozions (Eric Pascul, Franc Fari, Neurosiencis dal sium e dal insium intai vertebrâts)
   
   1. procès di riproduzion dai vivents:  lis sporis a permetin aes plantis la gjenerazion asessuade
      Sin. procreazion , riproduzion
   2. procès par produsi alc:  la gjenerazion di rais catodics par iluminazion dai solits (Lorenzo Marcolini, L'articul di Einstein dal 1905 sul efiet fotoeletric. Un lavôr plurilengâl voltât in lenghe furlane)
2. s.f. [TS] filos. te filosofie aristoteliche, mudament che al puarte ae formazion di une sostance cul partî de rude materie:  la gjenerazion dai insets e je spontanie
   
   1. mudament che intune sostance al puarte al produsisi di une cualitât
3. s.f. [TS] teol. tal catolicisim, il mût che il Fi al ven dal Pari:  il Fi al ven par gjenerazion e no par creazion
4. s.f. complès di membris di une famee che a àn il stes grât di divignince di un progjenitôr:  la sô famee e viveve là dentri di centenârs di agns; gjenerazions e gjenerazions nassudis e muartis in chê cjase (Pieri Menis, Lis çuculis dal Gjigjo)
   
   1. complès di prodots che a apartegnin ae stesse fase di progrès tecnologjic:  tai sistemis fotochimics di plui gnove gjenerazion, i risolutôrs dinamics e chimics a puedin sei dal dut cubiâts (Daniele Goi, Dario Bianchini Giaiotti, Fulvio Stel, Modelistiche numeriche pe valutazion e gjestion de cualitât dal aiar)
5. s.f. complès di personis che a àn plui o mancul la stesse etât:  o soi convinte che lis gnovis gjenerazions dai Furlans dal Canadà a àn di cognossi il furlan e il Friûl di vuê (Christian Romanin, Sandra Pizzolitto Pupatello: «Furlan is better! Il Friûl? La puarte de Europe pal Canadà»); par ordin che la gjenerazion viele si srarìs, ancje la glesie si disvuede (Josef Marchet, Lis predicjis dal muini)
   Sin. classe , jeve² , naie , vualece , gjernazie
   
   1. grup di personis che a partegnin ae stesse fase di un cualchi fenomen:  [ciertis intuizions di Fausto Schiavi] no jerin stadis capidis nancje de prime gjenerazion di autonomiscj dal so partît (Adrian Cescje, Tal non di Fausto Schiavi)
6. s.f. timp jenfri la nassite di un individui e chê dai siei fîs:  i pareve un pôc come tornâ a vivi in trincee, tal pericul, daspò di une gjenerazion di trancuilitât (Carlo Sgorlon, Ombris tal infinît)