Dizionari de Lenghe Furlane

classe  cla|sse  [FO]

1. s.f. complès di personis che dentri de societât a son caraterizadis di elements in comun, tant che la ricjece, la profession, il nivel te scjale jerarchiche e v.i.:  il Parlament [sot Vignesie] nol rapresentà plui il Friûl, ma nome une classe, une minorance privilegjade e cjalade di neri dal alt e dal bas (Josef Marchet, Cuintristorie dal Friûl fin sot la Italie); a viodi cun favôr il procès di formazion dal stât cu lis sôs misuris centralistichis, e jere soredut la classe dai marcjadants, dai banchîrs par vie che regulis unificadis e control dal teritori a favorivin la lôr ativitât e la lôr sigurece (Fabian Ros, La invenzion dal stât); la disgracie te disgracie e je che nô furlans no vin une classe politiche nostrane, autonome, libare, cussiente (Antoni Beline, La eterne lote dai furlans)
   Sin. categorie , fasse , ordin , ranc , stât² , strât , grup¹
   Var. clas
   
   1. [TS] stor. te Rome antighe, fasse di popolazion, cun dirits e dovês specifics, definide daûr de ricjece
2. s.f. categorie di robis, di marcjanzie che e à carateristichis in comun:  eletrodomestics di classe energjetiche no inferiôr a A+ (Mariannina Rocco, Novitât istât 2013: incentîfs fiscâi par lavôrs di ristruturazion e par intervents di miorament de eficience energjetiche)
   Sin. categorie
3. s.f. [TS] gram., ling. grup di elements linguistics individuâts su la base des lôr carateristichis formâls:  sostantîfs che a vegnin di chê che e jere la tierce declinazion latine e adietîfs deseconde classe latine (Sandri Carrozzo, Repertori di regulis pal nivel C)
4. s.f. [TS] biol., bot., zool. categorie sistematiche plui grande dal ordin e plui piçule dal phylum:  i animâi a son dâts dongje in fameis, ordins, classis, sottips e tips, seont i criteris de zoologjie sistematiche (Franca Mainardis, Dindi, il vêr non dal "tachin")
5. s.f. jeve dai soldâts nassûts tun ciert an:  - Pardabon crodêso che e vignarà la vuere? - [...] - No si sa. - al disè cuntune vôs delicade - fat al è che a riclamin ancje lis classis prime de mê. Nol somee un bon segnâl... (Gianni Gregoricchio, Trê feminis); e je reclamade la mê classe, îr di sere mi àn puartât la cartuline rosse i carabinîrs (Pieri Somede dai Marcs, Vilie di Nadâl (teatri))
   Sin. an , jeve
   
   1. complès des personis nassudis tal stes an:  Nicole Coceancig. Cjantautore di classe 1998 di Premariâs (Moira Pezzetta, "Aspettando il sole" di Nicole Coceancig)
      Sin. an
   2. persone nassude tal stes an di une altre, massime rispiet a cui che al fevele:  cun Mirco si cjapavin cualchi libertât, i batevin la man su la spale, i disevin: «Cemût vadie, classe» (Alan Brusini, Par stradis lungjis)
      Sin. coscrit
6. s.f. an di scuele:  finît l'an di scuele, mi veve passât ae seconde classe, e cussì l'an dopo mi soi presentât al mestri Bastian (Pieri Menis, A scuele); si preparin i tescj e materiâi multimediâi par ogni materie e par ogni classe des scuelis mediis (Adrian Cescje, Memoriis di politiche linguistiche)
   
   1. aule di scuele:  il Diretôr al vosarà che al è tart e jo no soi in classe a fâ lezion (Jolanda Mazzon, Fûr di timp)
      Sin. aule
   2. complès di arlêfs che a son te stesse aule e cul stes insegnant:  al jere un bon frut e ancje inteligjent, dai miôr de classe (Roberto Ongaro, Il muc); il numar di docents iscrit te Liste nol jere suficient a cuvierzi dutis lis classis che a vevin fat richieste (Patrizia Pavatti, La tutele de lenghe furlane a scuele)
7. s.f. tai traspuarts, distinzion di puescj e servizis pai viazadôrs, cun presits diviers:  a jerin dôs poltronis, simpri dal model dal sofà: cul vilût vert cuadretât di neri, come chel dai vagons di prime classe (Roberto Ongaro, Il muc)
8. s.f. maniere di fâ e di vistîsi fine:  savê vistîsi cun classe
   Sin. distinzion , elegance , finece , rafinatece , stîl¹
   
   1. spec. tal sport, grande abilitât:  un zuiadôr di classe
      Sin. abilitât¹ , valôr