Dizionari de Lenghe Furlane

fasse  fa|sse  [FO]

1. s.f. strisse di tele, tiessût, garze par fâ sù, in particolâr robis che a àn di stâ dongje, parts dal cuarp, feridis e v.i.:  Fonso i spalancà une cjalade cence lûs: "O vuei bevi", al disè cuntune calme stranie, puartantsi la man cu la fasse insanganade tal cerneli (Amedeo Giacomini, Tal ospedâl)
   Sin. bende
   
   1. ognidune des strichis di tiessût che si dopravin une volte par fâ sù i frutins, par che no si movessin e no si fasessin mâl e crodint che cussì a saressin cressûts cu lis gjambis dretis:  cjapâ sù il frutin tes fassis (Alan Brusini, Amîs come prime)
   2. [TS] sport intal pugjilât, striche protetive par fassâ lis mans sot des manecis
2. s.f. toc lunc e plui o mancul stret di tiessût doprât tant che element dal vistiari, pal solit tor dal cuel o tor de vite:  il sindic si comedave la fasse ator de panze (Pieri Menis, Il fiâr dal plevan)
   
   1. ognidun dai tocs luncs e strets di tiessût che si dopravin par fâ sù pîts e gjambis sot dal zenoli, in particolâr tant che element de monture militâr:  Beligoi Orfeo di Val di Petrose, no lu ai mai viodût a sudâ. A mi mi coreve la aghe fûr des fassis come cuant che si strenç il turcli (Alan Brusini, I ribei)
   2. toc di tiessût doprât tant che segnâl di autoritât:  chei de "fasse" - int dal paîs, metude sù dai todescs [tal 1917] pal bon ordin e par proviodi aes dibisugnis di ducj - a vevin il lôr dafâ (Alviero Negro, I piavots, Titon e la spagnole); il sindic si comedave la fasse ator de panze (Pieri Menis, La setemane rosse)
3. s.f. robe di forme lungje e strente:  il soreli che al jentrave pai veris sporcs, al jere dome une fasse cenarine che no iluminave (Maria Forte, Cjase di Dalban); la lune e murive jenfri dal bosc, intune fasse di fumate lontane (Dino Virgili, La aghe da pît la cleve); al sintive come une fasse di dolôr dentri tal stomi che i lave jù fin ai rognons (Amedeo Giacomini, Tal ospedâl)
   Sin. bande , curdele , liste , sdrasse , strisse , striche
   
   1. part dulintor di un edifici, di une stanzie, di un ogjet che e risalte par forme, colôr o altri caratar rispiet al rest:  la façade e à fassis che a segnin i solârs dal Votcent e un portâl bugnât (Aministrazion Publiche, Palaç Torian)
      Cfr. abassament
   2. lis breis in curtiel che a dan dongje lis gjambis di une taule
4. s.f. part di superficie de tiere lungje e strete:  in chest timp une largje fasse di teritori disore e disot de Stradalte e scomence a popolâsi di paisuts che a àn un non sclâf (Josef Marchet, Cuintristorie dal Friûl fin sot la Italie)
   Sin. aree , zone
   
   1. [TS] sport bande laterâl di un cjamp sportîf, massime tal balon:  gol di Bittante che al met dentri un biel cross che i rive de fasse diestre (Marc Stolf, Pordenone - Cosenza 1-2)
5. s.f. dade di timp te zornade:  al conte Giorgio Cantoni, condutôr storic de fasse serâl, ex musicist dai Detonazione - Onde Furlane e veve la fame di jessi la radio dulà che si trasmeteve la miôr musiche (Max Mauro, Un Friûl difarent: i 90 mhz di Onde Furlane)
6. s.f. part di un complès plui grant, fate di elements che a àn cualchi caratar in comun:  lis primis dôs fassis individuadis di Tullio De Mauro (FO, vâl a dî lemis fondamentâi, e ÛA, vâl a dî lemis di ûs alt) a son stadis otignudis cuntune osservazion di frecuence statistiche (Sandri Carrozzo, Franz Feregot, La elaborazion di un corpus etichetât de lenghe furlane scrite: esperiments e prospetivis)
7. s.f. comunitât di personis cun cundizions e interès in comun:  vôs che par solit no àn acès al sisteme de informazion: imigrâts, centris sociâi, fassis plui debilis de societât, associazions (Max Mauro, Un Friûl difarent: i 90 mhz di Onde Furlane); lis valutazions a van fatis par fassis di etât e par categoriis sociâls (Adrian Cescje, Memoriis di politiche linguistiche)
   Sin. classe , cuarp , grup¹ , strât , categorie

Proverbis:

• brut in fasse, biel in place; biel in fasse, brut in place
• i parincj si cognossiju a fassis, a gnocis e a cassis
• nissun che al disi mâl in place se in cjase ind à in fasse