Dizionari de Lenghe Furlane

stât²  stât  [FO]

1. s.m. mût di jessi, di stâ:  soredut tal cûr dal Istât, cuant che il teren al è une vore cjalt, i strâts bas a puedin tornâ a jessi avonde cjalts par puartâ la atmosfere intun stât di grande instabilitât (Stefano Micheletti, Marcellino Salvador, Notis di meteorologjie pal Friûl - Vignesie Julie)
   Sin. cundizion , situazion
   
   1. cundizion fisiche o psicologjiche particolâr:  intun stât di disabilitât grivie, il pazient ancje se cun grandis dificoltâts, al pues vê une interazion cul esterni (Christian Romanin, Amato De Monte: Il Friûl, patrie des bataiis di civiltât); si po ben capî in ce stât di pôre e di rabie impotente che al vivès Tite (Roberto Ongaro, Il muc)
   2. situazion di alc o cdn., di integritât, di salût, di aspiet e v.i.:  mantignî un bon stât di salût (Guglielmo Pitzalis, Mole il bevi!); Su la vetrine ancje fotografiis deventadis zalis e restadis li cuissà cemût, ma inmò in bon stât (Enrico Martina, Ricuarts e inlusions)
   3. ancje pl., aspiet che si à, spec. negatîf:  nome cumò lu viodè in ce stâts che al jere, dut sporc di tiere e di pantan, cu la divise a sbrendul, lis scarpis a jerin sporcjis di sanc (Pieri Menis, Sul agâr)
2. s.m. cundizion particolâr di une persone te societât, te famee:  Dele, par altri, e jere bessole, cui siei agns di femine passâts dibant, cence une vite daûrsi, cence un stât ore presint (Dino Virgili, La massarie)
   Sin. cundizion
3. s.m. cundizion juridiche, sociâl o politiche di un individui:  "Zovin! A cui crodistu di insegnâ? E dopo… visiti che tu sês in stât di fer! […]" (Checo Tam, Sense)
   
   1. situazion juridiche coletive, che e compuarte la aplicazion o sospension di cierts principis, garanziis, normis e v.i.:  Jean Arnoux si cjalà ator. A passavin camions plens di milizians. Un fantat si fermà a lei l'avîs. Al fevelave un pôc di inglês, e i disè a Arnoux che i militârs a vevin proclamât il stât di vuere (Agnul di Spere, Messe di misdì a Varsavie)
4. s.m. situazion economiche:  e pative un mont di chel so stât di miserie: un vistît a sbrendul al jere dut ce che si meteve intor (Roberto Ongaro, Cretevierte); […] a mieze predicje l'è l'ûs / che il muini vadi ator cu la cassute, / e il devot par chê buse l'introdûs / chel che il so stât, o la avarizie i bute (Pieri Çorut, Il Strolic furlan par l'an 1821)
   Sin. cundizion
   
   1. buine cundizion economiche, grande cuantitât di bens possedûts:  za cinc mês une gruesse ereditât / i à puartât dongje un stât (Pieri Çorut, Lis fortunis di siôr Nadâl)
      Sin. cundizion , patrimoni
5. s.m. classe sociâl:  ce deliri isal mai chest, che nissun / si puedi contignî dentri il so stât / ma si sfadii ognun di lâ sglonfât / al pussibil di titui e di fum? (Ermes di Colorêt, II, 207)
6. s.m. [TS] chim., fis. cundizion di un element, sostance, cuarp o sisteme individuade di un ciert numar di parametris:  i nûi a son zonis de atmosfere dulà che e je aghe no dome tal stât gasôs, tant che il vapôr, ma ancje tal stât licuit (o solit, se la temperadure e je ancjemò plui basse) (Stefano Micheletti, Marcellino Salvador, Notis di meteorologjie pal Friûl - Vignesie Julie)

Polirematichis e espressions idiomatichis

• fâ stât loc.v.
• in stât di loc.prep.

Proverbis:

• al è miôr un solt in man che no un stât par aiar
• bisugne lâ vistûts daûr dal so stât
• cul mudâ stât si mude usance
• la bocje e mangje stâts
• mudâ stât, mudâ usance
• ognidun al è siôr se al sa contentâsi dal so stât