Dizionari de Lenghe Furlane

valôr  va|lôr  [FO]

1. s.m. ecuivalent in bêçs di un ben:  il vescul Paulin di Aquilee al si ritirà a Grau cun dut ce che al veve di plui valôr (Josef Marchet, Cuintristorie dal Friûl fin sot la Italie); il turisim internazionâl al contribuìs cun cuasi il 30% al valôr des esportazions dai servizis mondiâi (Attilio Celant, Il rûl economic dal turisim in Italie)
   Cfr. cost , presit
2. s.m. [TS] econ. carateristiche di un ben che e fâs che si puedi cambiâlu cuntune cierte cuantitât di altris bens o pûr che al puedi sei util tal sodisfâ ciertis bisugnis:  i bens che a son vendûts e comprâts sul marcjât a puedin jessi valutâts tal lôr valôr su la fonde di presits che a nassin di une negoziazion (Marzi di Strassolt, Dal Prodot Interni Lort aes misuris dal benstâ)
3. s.m. [TS] econ. dut ce che si pues comprâ e vendi, p.e. monedis forestis, azions, obligazions e v.i.:  vie dilunc dal ultin cuart di secul dal Votcent, a sucedin bruts fats inte economie mondiâl. Tal 1873 e va jù la Borse dai valôrs di Viene (Elio Varutti, Il Risorziment a Martignà)
4. s.m. tal pl., robe preziose:  la casse di nuvice adulà che a jerin i valôrs (Alan Brusini, Amîs come prime)
   Sin. preziôs , zoie
5. s.m. complès di cualitâts personâls:  «Se le à cjolte Mirco» a disevin, «al vûl dî che e à il so valôr» (Alan Brusini, Par stradis lungjis)
6. s.m. domini de pôre o mancjance di pôre tal frontâ i pericui:  cualchidun lu clamave un «eroi» pal valôr e pal coragjo che al veve vût plui di une volte (Pieri Menis, Sul agâr); i soldâts lu àn fat saltâ [il puint] cun dut ce che al veve parsore: int cu la cosse, cjaruçs cjamâts di fruts e di viei […]. Cui che al fevele di valôr militâr e di patrie, prime al à di fâ i conts cun chestis robis (Alan Brusini, Amîs come prime)
   Sin. baldance , eroisim , fiât , olse
7. s.m. complès di dotis morâls e inteletuâls che a fasin di riferiment tal compuartâsi, tal vivi, tal judicâ:  il nestri mût di vivi, di lavorâ e di pensâ: cualitâts e difiets, virtûts e vizis, valôrs e sperancis (Riedo Pup, Fûr che al vegni cui che al è stât); la onestât, la peraule e il lavôr fat ben a jerin valôrs fûr di discussion (Franc Fari, Il cjâf dai furlans)
   Sin. principi
8. s.m. capacitât professionâl di cdn. o cualitât di alc:  sienziâts dal valôr di Darwin, Mendel, Muller, Schröedinger (Lorenzo Marcolini, Recension di La scienza non ha bisogno di Dio); une des plui bielis publicazions di grant valôr didatic (Adrian Cescje, Memoriis di politiche linguistiche)
   Sin. braùre , capacitât , sgrimie , snait
9. s.m. impuartance di une cjosse, di une situazion, di une cundizion e v.i.:  l'interès dal mont universitari viers de emitente udinese al è conferme dal valôr che e veve cjapade la sô ativitât (Max Mauro, Un Friûl difarent: i 90 mhz di Onde Furlane)
   Sin. afâr , pês¹ , puartade , significance
10. s.m. capacitât, ancje legâl o impositive, di vê efiet:  i ordins che a jerin partîts di chenti a vevin vût valôr par dute la Europe (Agnul di Spere, Un cidinôr todesc); lis leçs [de Contee di Gurize e Gardiscje] a jerin in funzion dome dal teritori, ma a vevin valôr tant che chês statâls (Ferruccio Tassin, Autonomie tal Friûl austriac)
    Sin. eficacie , validitât
11. s.m. significât:  te sô definizion di dialet […] «nol è un valôr semantic univoc, ni a nivel di ûs comun, ni a nivel vocabolaristic, ni a nivel sientific» (Marc Stolf, Minorancis linguistichis); il visc al à ancje altris valôrs simbolics parcè che no dome al reste vert su plantis che invezit a pierdin lis fueis ma ancje parcè che al vîf cence bisugne di tocjâ tiere (Sandri Carrozzo, Nadâl)
    Sin. significance , significât , sens
12. s.m. di segns, simbui e v.i., informazion che e ven comunicade:  o pensìn, par esempli, al x dal portughês, che al à valôrs diferents seont la storie de peraule dulà che si lu cjate (Xavier Lamuela, La grafie furlane normalizade)
13. s.m. nivel, cuantitât, intensitât e v.i. che si puedin misurâ:  Dogne, Resie e Scluse a mostrin valôrs di dispopolament dongje dal 70% (Mauro Pascolini, Andrea Guaran, La mont furlane); doprant i modei […] al è pussibil valutâ i impats di gnûfs implants industriâi […] cussì come sudividi i valôrs dal incuinament tes diviersis tipologjiis di sorzints (Daniele Goi, Dario Bianchini Giaiotti, Fulvio Stel, Modelistiche numeriche pe valutazion e gjestion de cualitât dal aiar)
14. s.m. [TS] fis., mat. determinazion che une variabile e cjape sù:  la probabilitât par un dât valôr di A o u e risulte indipendente di ducj chei altris valôrs di A e a (Lorenzo Marcolini, L'articul di Einstein dal 1905 sul efiet fotoeletric. Un lavôr plurilengâl voltât in lenghe furlane); Shannon al à definît la capacitât dal canâl come massim de informazion che o rivìn a ricevi, di un valôr de probabilitât di erôr p (Valentino Castellani, La societât de informazion: cirint lis origjins)

Proverbis:

• si cognòs il valôr de salût co si è malâts