zoie
/-ò-/
zo|ie
[AF]
-
s.f.
corone di rosis e fueis, soredut di meti tal cjâf o tor dal cuel:
lis gnocis si fasin […] balant lu nuviç e la nuviço cun bielis zoiis di virduro (Anonim, Esercizis di version de scuele di nodârs di Cividât);
jê si platà la muse e e scomençà a zigâ, e Fidrì i sbregà vie la blonde, la zoie di rosis, il vistît blanc di nuviçâl (Dino Virgili, La «Bielissime»)
Sin. corone
, ghirlande
-
corone di rosis o di fueis, pal solit di orâr, in onôr di monuments, muarts e v.i.:
ferâi e cjandelis e int che e puartave corot e la zoie dal fi cun tantis di galis e cu lis peraulis in scriture indorade (Roberto Ongaro, Cretevierte);
la figure […] e je ritrate a mieze vite, cu lis mans che e tegnin sù une zoie di orâr, il premi pai soldâts muarts (Pieri Menis, La glesiute dai alpins)
-
s.f.
(fig.)
cualsisei robe che e stedi tor ator, che e fasi un zîr o sim.:
place Sant Jacum cu la sô zoie di sotpuartis un pôc scrofâts e, tal mieç, i colôrs des barachis (Maria Forte, La tiere di Lansing);
intor al era dome monts: na grant zoa cilistina di spiçs che a sbregavin il ciel, di plans verts e, pi abàs, li faldi scuri dai boscs (Novella Cantarutti, La aga di Plan da li steli)
Sin. corone
, zîr
, cercli
, circul
, anel
-
s.f.
piere preziose, soredut lavorade, o altri ornament preziôs:
sot de pleche une buse, e te buse une cassele… […] A jerin i bêçs: napoleons di aur, zoiis, pierutis preseadis, un tesaur! (Dino Virgili, La aghe da pît la cleve);
la cassefuart plene di zoiis e aur e je stade sfuarçade (Raffaele Serafini, Contis sot spirt)
Sin. zoiel
-
(fig.)
robe o persone preziose, maraveose, di grant valôr e v.i.:
chê Isabele / je une stele, / e je un flôr di paradîs, / je la zoie dei nestris dîs (Pieri Çorut, Chê Isabele)