Dizionari de Lenghe Furlane

anel  /-èl/  a|nel  [AF]

1. s.m. zoie in forme di cercli che si met tor dai dêts:  Zorç i regalave a Rite l'anel cul brilant grant come une nole che al jere stât di sô none Mariane dai Mantiei, un anel che al valeve un Perù (Alan Brusini, Come tai romançs); e veve viodût a slusî un anelut su la man blancje di Anzuline (Maria Forte, Cjase di Dalban)
   Sin. vere ipon. , fede¹ ipon.
2. s.m. ogjet circolâr di metal, ancje cence funzion di zoie, dispès tant che element di une cjadene:  lu resentà [il cjadenaç] cuatri cinc voltis, lu tirà sù, lu spacà e lu viodè a lusî par ogni anel (Riedo Pup, Vergjilio); difûr de ostarie a jerin inmurâts dai anei di fiar, di pueste par peâ lis bestiis in polse (Dino Virgili, La aghe da pît la cleve)
   Sin. rinc , rincje
   Cfr. voli
   
   1. (fig.) singul element, passaç o persone intune dinamiche:  une logjiche che e voleve che pes capeladis dai grancj, a paiâ a fossin simpri i plui piçui e lui, come ultin anel, cence colpe, di chê insopuartabile cjadene (Roberto Ongaro, Il muc); i falsaris a jerin sot da la Austrie, e che fra di lôr a vevin formade une cjadene lungje e fuarte che e veve i siei anei tal cûr dal Imperi (Pieri Menis, Lis leiendis di Buie)
3. s.m. cualsisei robe o struture di forme circolâr o plui o mancul circolâr:  a jerin scjampâts di buride pai cjamps a dute gnot, prin che l'anel de cente dai mucs si sieràs (Roberto Ongaro, Il muc)
   Sin. cercli , zîr , corone
   
   1. circuit o percors cul principi che al corispuint cu la fin:  al è stât facil ambientâ une storie picjade intor di chest anel lunc pôc plui di trê chilometris di trois, olis, roiuçs e puintuts di len (Raffaele Serafini, Soreli jevât a mont)
4. s.m. [TS] micol. in cierts foncs, part residuâl de membrane sot dal cjapiel che e reste tacade te gjambe
5. s.m. [TS] chim. compost dulà che i atoms a formin une struture sierade

Polirematichis e espressions idiomatichis

• copari dal anel loc.s.m.
• dêt dal anel loc.s.m.

Proverbis:

• se al sta ben l'anel, marît biel