voli
/-ó-/
vo|li
[FO]
-
s.m.
ognidun dai doi, o plui in cierts invertebrâts, orghins che a permetin di viodi, sedi in riferiment a dut l'orghin, sedi dome in riferiment ae part che si viôt o ancje dome ae part colorade:
a son cetantis bestiis, come lis furmiis o lis âfs, che a àn i voi fats a pueste par ricognossi la polarizazion de lûs (Marisa Michelini, Alberto Stefanel, La polarizazion de lûs);
e cjalave adalt, parantsi i voi cuntune man par no restâ inceade (Gianni Gregoricchio, Trê feminis);
il malât al veve la muse zale e dute un sudôr, i voi tirâts che si viodevii dome che il blanc (Amedeo Giacomini, Tal ospedâl);
a Nene, dibot che i vignirin lis lagrimis tai voi, pal ingropament (Roberto Ongaro, Cretevierte);
un agnulin di sium, biont, cui biei voi celescj e une bocje ridinte (Dino Virgili, La massarie);
benedet chel voli neri / benedet chel voli grîs / mi somee une bambinute / che e ven fûr dal paradîs (Popolâr, Benedet chel voli neri)
Cfr. cee
, palpiere
, pipine
, blanc dal voli
, neri dal voli
-
chê part dal cuarp tant che spieli, espression des emozions, dai pinsîrs, de anime e v.i.:
al restave fer tal so cjalâ sfaçât e cuntun ridi tai voi che al jere scuasit un cjoli vie (Maria Forte, La rive di Sant Pieri);
un om brut... ma nol veve il voli trist no, no (Pieri Somede dai Marcs, Resurezion a Pontinie)
Cfr. muse1
-
facoltât, capacitât, pussibilitât e azion di viodi:
denant vie, fin dulà che al rivave il voli, si slargjave il parc (Amedeo Giacomini, Tal ospedâl)
Sin. viste
-
capacitât di viodi ben, di smicjâ:
al veve voli e snait di sforeâ ancje il balìn, come se al fos stât cu la man a fâlu saltâ (Maria Forte, La tiere di Lansing)
-
plasê tal viodi, gust estetic:
i plaseve fâ lis robis cun ordin, e in mût che a contentassin ancje il voli (Carlo Sgorlon, Prime di sere);
e met intor cualchi peçot furnît de parone, peçots di lavôr e robe ordenarie, ma che a judin di istès a sclarîi e ricreâi un fregul il voli (Ivano Urli, Storie di Vera)
-
s.m.
(fig.)
il stâ atent, il tignî sot control, il visâsi, il capî:
lis paronis a àn di vê il voli pardut (Pieri Somede dai Marcs, Ursule);
tantis voltis a àn voi pai ôcs, pai dindiats, pai cunins, par dute la prole dal gjalinâr e dal cjôt, ma no pe lôr canaie (Josef Marchet, Lis predicjis dal muini)
-
capacitât di judicâ, valutâ:
al cirive plui di dut mobilie antighe, e par chê si jere fat il voli e la man (Carlo Sgorlon, Prime di sere)
-
s.m.
(fig.)
persone che si vuelii tant ben:
"Mandi voli!" (Ercole Carletti, Mariute)
Sin. cûr
, vite
, amôr
-
s.m.
barcon taront o ovâl:
[la glesie di Sant Francesc a Udin] si presente plui slançade, cuntune façade elegante cul voli inserît intun cuadrât in mieç a dôs arcadis a balconade (Bepi Agostinis, Storie de art in Friûl)
-
s.m.
cualsisei viertidure o element plui o mancul taront:
i voi dal cjadenaç;
i voi des fuarpiis;
i voi dal ferâl;
el cempli, bastît cun doi filistrins tor i voi dal podin, al ciulave clop sot el pês de colme (Paolo Bulfone, Nainis)
-
s.m.
piçule gote di gras che si forme su la superficie di un licuit:
un brût cui voi di ont che a nadin parsore
-
s.m.
(fig.)
viôt voli dal cjâf
:
armis modernis, compradis tal forest, e che a costavin un voli (Carlo Sgorlon, Ombris tal infinît)
-
s.m.
[TS]
gastr.
bûs dal formadi o di preparazions fermentadis o jevadis
-
s.m.
[TS]
agr., bot.
piçule butade a pene nassude di une plante, che si pues doprâ ancje par insedâ:
distaca da altra planta il voli e po / in chê fissura tu lu insedarâs (Zuan Josef Busiç, La Gjeorgjica di Virgjili);
badait di sielzi i voi da chei morârs, che si viestin di miôr fuee (Giuseppe Ferdinando del Torre, Il contadinel. Lunari par l'an 1871)
Sin. impulin
-
s.m.
maglute dai liùms che e corispuint al pont li che a jerin tacâts tal didentri de vuaìne o dal cosul:
il voli dai fasûi (Giulio Andrea Pirona, Ercole Carletti, Giovanni Battista Corgnali, Il Nuovo Pirona)
Polirematichis e espressions idiomatichis
Proverbis:
- a viodin plui cuatri voi che no doi
- a vuelin trê robis par salvâsi: bon voli, buine gjambe e puarte vierte
- ancje il voli al vûl la sô part
- cuant che la bolp e predicje, voli a lis ocjis
- cuatri voi a viodin plui di doi
- cui che al sofle te cinise si jemple i voi
- fin al zenoli ogni voli, dal zenoli insù nome jo e tu
- fortunât cui che al à un voli tal paîs dai vuarps
- i voi a son fats par cjalâ
- il barcon al à i voi e la cise lis orelis
- il voli al è il spieli dal cûr
- il voli dal paron al ingrasse il cjaval
- la tristerie a mene miserie, la miserie a mene pedoi e i pedoi a mangjin ancje i voi
- lis personis si cognossilis tal voli
- lontan dai voi, lontan dal cûr
- nuie al è bon pai voi
- ognidun al viôt cui siei voi
- par salvâsi a vuelin trê robis: bon voli, buine gjambe e puarte vierte
- par vendi al baste un voli, par comprâ no 'nd bastin cent
- spalancâ i voi parsore il ben, sierâ un voli parsore il mâl
- tal paîs dai vuarps al è fortunât chel che al à un voli sôl
- tal paîs dai vuarps beât cui che al à un voli
- tu âs plui grancj i voi che no la bocje
- voli in tane, raze putane
- voli in tane: se no ti à ingjanât, ti ingjane