Dizionari de Lenghe Furlane

vierzi i voi    [AF]

1. loc.v. tal sens leterâl, vierzi lis palpieris, fâ che i voi no stedin sierâts:  e siarà i voi e dome chel sens strani di bielece lontane i restave fis tal cjâf, restivît, testart, e al jere come un malstâ. E tornà a viarzi i voi (Dino Virgili, La aghe da pît la cleve)
2. loc.v. sveâsi:  jo no rivavi adore di vierzi i voi: Signôr ce sium! (Pieri Menis, Il burlaç); al sunà il svearin, jê e viarzè i voi (Jolanda Mazzon, Fûr di timp)
3. loc.v. nassi:  cussì, sierade cjase in citât, une zornade e rivà ancje jê in chel cjason scûr là jù dongje il flum dulà che setante agns prime e veve vierts i voi (Pieri Menis, Il tesaur di done Cheche)
4. loc.v. (fig.) stâ ben atent a ce che al sucêt:  "Vuei fevelâigji jo, cumò. Dulà ise?" "No, Meni, lassìn stâ; si podarès fâ piês! Sietìn… viarzìn i voi … Meni" "No, no, vuei fevelâi subite. Dulà ise?" (Bruno Paolo Pellarini, Ninenane)
   Sin. stâ in vuaite
5. loc.v. (fig.) rivâ a capî, a jessi cussient di alc che prime no si capive:  a son vignudis in lûs tantis carognariis, tantis sporcjariis e tantis falsetâts, che ancje i plui grancj dordei a varessin vût di viarzi i voi (Josef Marchet, Il manarin tal cûr); ce che plui i steve a cûr, nol jere che il so pinsîr al fos cognossût lontan di culì, ma che i furlans a vierzessin i voi, a respirassin il lôr aiar culturâl, a cjapassin cussience, a cuistassin dignitât (Glesie Furlane, La Patrie dal Friûl, Par onorâ pre Antoni e continuâ la sô vore tal so spirt)
   Sin. sveâsi , scjalterîsi
6. loc.v. fâ capî:  "E jo ti ringrazii di vêmi viarts i voi su cheste vergogne che sporcje la mê cjase!" (Bruno Paolo Pellarini, Amôr in canoniche); "Jo vuei viarziti i voi, e no vuei che tu vebis di mangjâ pan pentît!" (Vittorio Vittorello, A ogni cost)
   Sin. digjanâ , discjantâ , disincjantâ , scjalterî

Components:

• vierzi v.tr., v.intr.
• voli s.m.