Dizionari de Lenghe Furlane

vierzi  /-è-/  vier|zi  [FO]

1. v.tr. fâ che alc nol sedi sierât, permetint di lâ dentri e fûr o di meti alc dentri o gjavâlu fûr:  content di tornâlu a viodi, o vierzei une butilie di refosc di Nimis pe ocasion (Adrian Cescje, Memoriis di politiche linguistiche); l'ombrenâr al vierç la sô cassute, al cjol lis tanaiis e cualchi fier, al si sente e al si met a justâ une ombrene (Pieri Somede dai Marcs, L'ombrenâr)
   Var. avierzi , davierzi , avrî
   
   1. in riferiment puartis, barcons e v.i., meti intune posizion o cundizion che e lasse libar il passaç:  Gjovanin al va a vierzi la puarte e in chel al jentre il miedi (Pieri Somede dai Marcs, Il prossim); o ai viert il balcon par che al jentri un freghenin di aiar (Costantino Smaniotto, Co l'amôr al cimie)
   2. (ass.) ancje sotintindint l'obiet, vâl a dî la puarte o il puarton o sim.:  al rivà su la puarte e al batè, malsigûr. E ven a vierzii la mari de Bete (Meni Ucel, Rosaris); "Misericordie, cui saraial cumò? Aio di vierzi?" (Pieri Somede dai Marcs, Ursule)
   3. regolâ un dispositîf di mût che al permeti a alc di passâ:  al implenà di aghe il bussulot parsore la muele e al vierzè il rubinet par fâ colâ jù une gote a la volte (Carlo Sgorlon, Prime di sere)
   4. fâ che un passaç al sedi libar o al torni a jessi libar:  bisugnave pûr vierzi lis stradis [plenis di nêf], e alore a la svelte o vin scugnût dâ dongje par ogni paîs de Comune scuadris di operaris (Pieri Somede dai Marcs, 11 di Fevrâr 1929)
2. v.tr. liberâ di alc che al siere, che al involuce:  al vierç la letare, al lei e si grate il cjâf (Pieri Somede dai Marcs, Vilie di Nadâl (teatri)); tes cjasis si spiete, / al è il dì zaromai, / di stâ ducj insieme / e vierzi i regâi (Stiefin Montel, Un biel Nadâl)
3. v.tr. [TS] inform. fâ che un file al sei visualizât ancje par podêlu modificâ, o che al partissi un program:  te forme eletroniche chestis tabelis associadis si podaressin vierzi clicant dome su la peraule che e interesse (Adrian Cescje, Memoriis di politiche linguistiche)
4. v.tr. fâ alc che al permet di passâ:  a sielzevin cun impegn il cjantonut plui adat pal camarin, a tramontan o a buere; ti studiavin la corentie di aiar; ti vierzevin un barconut o doi, di misure (Riedo Pup, I furlans e il camarin)
   
   1. fâ alc che al è ingjavât, che al permet di meti dentri alc o di gjavâ alc:  tal cimitieri di Rivuinis, là sul cuel dal Menîr, no stavin plui [i cadavars], e alore a vevin viert un fossalon dilunc dal mûr (Dino Virgili, La aghe da pît la cleve); «Il vecjo çoc nol da plui arzile buine» al continuà Min «Tocjarà vierzi e screâ une gjave plui insù» (Maria Forte, La tiere di Lansing)
5. v.tr. (fig.) mostrâ, permeti di viodi, capî, pensâ, imagjinâ e v.i.:  ciertis peraulis misteriosis e inmagadis a àn un significât precîs, ma istès a dismovin inmò curiositâts seneosis; a vierzin veretâts mai pensadis (Dino Virgili, La aghe da pît la cleve)
   Sin. mostrâ , pandi
   
   1. meti a disposizion:  si è cirût di studiâ lis oportunitâts che une prospetive plurilengâl al insegnament de matematiche e pues vierzi (Carlo Cecchini, Matteo Fogale, Une esperience di plurilinguisim inte didatiche de matematiche)
6. v.tr. fâ un tai, une incision, une feride e v.i.:  la lame e vierç la gose, il prin sanc al si intarde un moment, nol sa ben dulà sporcjâ, ma in curt la nêf si colore intor, i voi dal sassin a ridin (Carlo Tolazzi, La salamandrie tal fûc)
   
   1. (fam.) fâ une operazion chirurgjiche:  lu àn viert ma nol jere nuie ce fâ e lu àn tornât a sierâ come che al jere
7. v.tr. distanziâ i elements di alc o fâ che alc che al à doi o plui elements ju vedi distanziâts, displeâts e v.i.:  el predi al torne a viarzi el libri, al lei e mi spieghe (Arturo Feruglio, Viaç a Vignesie); par viodi ducj adun la partide […] a àn decidût di picjâ un linzûl tal mûr de cjase di Nanin e di vierzi intal curtîl lis bancjis e lis taulis de vecje sagre (Cristina Noacco, Faliscjis)
   
   1. (ancje fig.) ancje di parts dal cuarp:  alore e vierzè i braçs de bande de lûs (Dino Virgili, Pôre tal nuie…); "Oh ce tant che o ai durmît" e dîs la frute e e vierç i voi (Andreina Nicoloso Ciceri, La sentence de regjine - Racconti popolari friulani I)
   2. (pop., volg.) penetrâ tun rapuart sessuâl
      Sin. doprâ , disniçâ
8. v.tr. fâ acessibil al public, spec. scomençant une ativitât gnove:  il lôr sotet di cumò al jere il "Bacaro" […]. La ostarie e veve chel non par vie che, a vierzile, al jere stât un marcjadant di vin e di vueli puliês (Amedeo Giacomini, Tal ospedâl); Stiefin al jere rivât […] a studiâ chel tant che al jere bastât par diplomâsi perît e par vierzi un piçul studi in societât a Udin (Franca Mainardis, Il sium di Lissandri)
   
   1. fâ acessibil al public intun ciert orari:  Meni Fari al tornà a vierzi il so negozi (Luigi Gortani, Meni Fari)
9. v.intr. tacâ a funzionâ, a fâ servizi al public:  cul 1867 e vierç a Udin la filiâl de Bancje Nazionâl (Elio Varutti, Il Risorziment a Martignà)
   
   1. jessi acessibil al public intun ciert orari:  la becjarie e vierç a vot (Zorç Cadorin, Furlan di Praghe)
10. v.tr. començâ une cualsisei ativitât, azion, situazion e v.i.:  si scugnarà par fuarce vierzi tratativis tra chescj e chei par evitâ barieris doganâls che e causaressin il spopolament e la muart di chei paîs (Josef Marchet, In cercje di democrazie); su lis variabilis si podarès vierzi une discussion, ma i dâts a son incontestabii e il risultât, par dîle juste, une vore dongje de veretât (Attilio Celant, Il rûl economic dal turisim in Italie)
    Sin. tacâ , scomençâ , inviâ
    
    1. inviâ un rapuart economic:  si po condividi la realtât di Bancje Etiche […] vierzint un cont corint o un librut di sparagn (Buteghe dal Mont, Luche Nazzi, Guide par un consum just e solidâl); vierzi une linie di belanç (Marc Stolf, Minorancis linguistichis)
    2. (ancje ass.) scomençâ a fevelâ:  tal vierzi il so discors il deputât gurizan al dopre peraulis che a son un at di acuse pal compuartament dal Ream di Italie tes gnovis provinciis (Carli Pup, La seconde Irlande)
    3. screâ une cunvigne, une mostre, un conciert, une iniziative culturâl e v.i. fasint il prin discors, la prime esecuzion, proiezion e v.i.:  a vierzi la manifestazion [la Mostre dal Cine] al sarà il film galizian Pradolongo di Ignacio Vilar (Fabian Ros, La Mostre dal Cine e devente europeane)
11. v.tr. [TS] zûcs (ass.) di un zûc di cjartis, tacâ a zuiâlu o podê fâ un passaç previodût des regulis
12. v.tr. [TS] polit. (ass.) tacâ a vê disponibilitât a intindisi:  oposizion interne che e vûl vierzi ai furlaniscj esternis che a stan ducj intor dal Mf par assaltâlu (Adrian Cescje, Memoriis di politiche linguistiche)
13. v.tr. [TS] sport (ancje ass.) puartâ il zûc viers une part laterâl dal cjamp

Polirematichis e espressions idiomatichis

• vierzi bec loc.v.
• vierzi bocje loc.v.
• vierzi i braçs loc.v.
• vierzi i voi loc.v.
• vierzi il bec loc.v.
• vierzi il cûr loc.v.
• vierzi il troi loc.v.
• vierzi la bocje loc.v.
• vierzi la strade loc.v.
• vierzi lis gjambis loc.v.
• vierzi puartis e barcons loc.v.

Proverbis:

• bisugne bati par che a vierzin
• cuant che a scomencin lis disgraciis bisugne vierzi puartis e barcons
• cuant che si vierç il fassinâr, si cognòs cemût che a àn filât i cavalîrs
• cui che ben al siere ben al vierç
• il Signôr al siere une puarte e al vierç un barcon
• in chê dì che si paie un debit si vierç un credit
• la clâf di aur e vierç ogni puarte
• la poltronarie i vierç la puarte a la miserie
• lis clâfs di aur a vierzin dutis lis puartis
• no vierzi bocje se no ti tocje
• se il Signôr al siere une puarte, ind vierç cent
• se il Signôr al siere une puarte, ind vierç dôs
• se Sant Pieri nol vierç la puarte, no si po lâ in paradîs
• se si siere une puarte, si vierç une altre