cûr
cûr
[FO]
-
s.m.
orghin vitâl che al pompe sanc intal cuarp:
masse sâl al fâs alçâ la pression e cressi il pericul di malatiis dal cûr e de circolazion (Guglielmo Pitzalis, Mangje san 2);
Eve e sintì il cûr a cori plui svelt (Carlo Sgorlon, Ombris tal infinît);
secui di vite ferme disgotâts moment par moment, respîr par respîr, batude par batude di cûr, un compagn di chel altri (Dino Virgili, La aghe da pît la cleve)
-
s.m.
chel orghin di animâi macelâts, tant che aliment o ingredient:
comprâ doi cûrs di purcit in becjarie
-
s.m.
part dal pet in corispondence di chel orghin:
al veve metude une man sul cûr che al sbalçave e lui sal sintive a sbalçâ come un crot dentri de cjamese (Dino Virgili, La aghe da pît la cleve)
-
s.m.
forme plui o mancul triangolâr, a ponte sot e cun doi lobis parsore, che e somee un cûr:
al curiosave fra i ex voto picjâts sù pal mûr di un altâr, cruchiis, gjambis e braçs di len, cûrs di arint, cuadruts piturâts a vueli (Pieri Somede dai Marcs, Ta la ombre dal santuari);
a plante [di lavaç di cais] e à fueis in forme di cûrs cun pecol, chês da pît une vore grandis (a rivin fintremai a 40 o 50 cm. di largjece) (Giorgio Pascoli, Il Litum: jerbis salvadiis te cusine)
-
s.m.
[CO, TS]
zûcs
tal pl., un dai cuatri pâi des cjartis di zûc francesis:
regjine di cûr
-
s.m.
(fig.)
sît dai afiets e des emozions, part emozionâl de persone:
cun lôr, il gno cûr nol à plui segrets (Gianni Gregoricchio, Trê feminis);
in cûr un sens di vite plene, di ligrie profonde che a i faseve dismenteâ la strade, il frêt che i taiave la muse, il troi di clapigne (Pieri Somede dai Marcs, O sielç lis stelis);
l'è ben vêr che jo mi slontani / dal paîs ma no dal cûr. / Sta pûr salde tu ninine / che jo o torni se no mûr (Popolâr, L'è ben vêr);
«A na è biela mê fia, ma a à cjâf e cour e na buna dota che a na è mai massa» (Novella Cantarutti, Li streci rossi)
Sin. anime
-
s.m.
(fig.)
capacitât, disposizion e sintiment di volê ben o inamorament:
tancj pinsîrs e suposizions e un tremaç di zenoi tant che in chê dì che lui le veve bussade pe prime volte. Il cûr, e pensave, nol ven mai vieri (Roberto Ongaro, Il muc);
al cûr no si po comandâ (Pieri Somede dai Marcs, Vilie di Nadâl (teatri))
Sin. amôr
, afiet
, ben
-
tant che titul di afiet par cui che i si vûl ben:
cûr gno, no stâ a vaî, / al cjante il gjal, mi tocje partî (Popolâr, Al cjante il gjal)
Sin. amôr
, ben
, nin1
, ninin
, stele1
, vite
, vissare
, anime
-
s.m.
(fig.)
fuarce di spirt, mancjance di pôre:
al scugnì zirâ i voi di une altre bande, Berto, par cjatâ il cûr di meti fûr ce che i pesave sul stomi (Gianni Gregoricchio, Trê feminis)
Sin. coragjo
, ardiment
, amit2
, olse
, fiât
, coraç
-
s.m.
(fig.)
part centrâl:
il cûr de citât, di dimensions vivibilis come grandece e come int, al à la basiliche, il palaç dal vescul e chel dai cjalunis, la universitât, il palaç de aministrazion civîl, il 'seminari, il convent di Sant Francesc, l'ospizi pai pelegrins, trasformât in albierc di lus, l'istitût pe lenghe e pe culture galiziane, i cuartîrs dal marcjât, dai mistîrs, lis stradis che a rivavin i pelegrins, lis glesiis, lis buteghis, ma dut armonizât, cence contrascj e cence sfuarçaduris (Antoni Beline, Sant Jacum, là che al finìs il mont)
Sin. centri
, mieç
, nucli
, nusel
, plen
-
part plui interne di alc:
il cûr de verze;
il cûr de angurie;
mangjâ cûrs di articjocs (Giorgio Pascoli, Il Litum: jerbis salvadiis te cusine)
-
moment centrâl di une dade di timp:
al jere tal cûr de gnot, al sglavinave a selis (Catarine Percude, La mulinarie);
ur pareve di strani, lôr cussì vîfs, a sintîsi chê cjosse, come une cagnate, un colament di vite, une siumate di vie pal dì, che nancje tal cûr dal Istât no lavin a polsâ sul misdì se ancje il mont al someave fer e dut fer e cidin tal soreli fer (Dino Virgili, La aghe da pît la cleve)
Sin. mieç
, plen
-
s.m.
part essenziâl, plui impuartante:
i nestris paris fondatôrs a àn savût lâ al cûr de cuistion furlane, la autentiche e uniche cuistion, che e segne la diference fra il sucès e il faliment di ogni nestre iniziative (Antoni Beline, Sessante agns di profezie )
Polirematichis e espressions idiomatichis
Proverbis:
- a Pasche Tafanie, il râf al piert il cûr e la anime
- al è râr di cjatâ une frute che di cuarp e di cûr e sedi sane dute
- al nûl e al cûr nissun no i comande
- al timp e al cûr nissun no i comande
- al timp, al cûr e al cûl nissun no i comande
- al vâl plui il cûr content che no dut l'aur di chest mont
- al vâl plui il cûr content che no pan di forment
- ce che no si à in cûr, si à in gjambis
- ce che no si à in cûr, si à in lenghe
- ce che si à in cûr si à di vê in lenghe
- cjantâ no si po ben se dal cûr nol ven
- cuant che dal cûr nol ven, cjantâ no si po ben
- cui che al à in cûr al à in lenghe
- cui che si lasse cridâ al è paron dal so cûr
- cui che si lasse vuidâ al è paron dal so cûr
- dispès la bocje a spude fûr cemût che al judiche e che al sint il cûr
- dulà che il cûr al tire lis gjambis a puartin
- il cûr al resone a so mût
- il prin amôr nol scjampe mai dal cûr
- il segret al è la clâf dal cûr
- il voli al è il spieli dal cûr
- l'om nol cognòs il cûr e la ment dal altri om
- la femine e à il cûr a fetis e, se lis da, no son mai netis
- lis gjambis a puartin là che il cûr al tire
- lontan dai voi, lontan dal cûr
- man frede, cûr cjalt
- nissun om nol cognòs il cûr dal altri om
- no si po ridi ben co dal cûr no ven
- no si po volê ben cuant che dal cûr nol ven
- ogni cûr il so misteri, ogni cjase il so costum
- plui piçul al è il cûr des feminis, plui lungje la lenghe
- une idee e nas tal cjâf ma e cres tal cûr
- une nuviçute co a va a marît cu la bocje e vai e cul cûr e rît