Dizionari de Lenghe Furlane

ben  ben  [FO]

1. av. in gjenerâl in maniere buine, positive, juste
   
   1. cemût che si à di fâ intune cierte ocasion:  se tu mi prometis di compuartâti ben […], ti puarti cun nô (Fabian Ros, Il lôf)
      Sin. pulît , cemût che si dîs , come che i vûl , come che Diu comande
   2. in mût coret, funzionâl, cence erôrs o difiets:  il furlan al è une lenghe e si varès di scrivile ben (par talian scrivaressiso ‘aqua’ o ‘portafogio’?) (Marc Stolf, Keep calm e freìnsi de Nutella!); tal ultin, fasint ben i conts, si sparagne (Riedo Pup, I furlans e i prâts)
      Sin. pulît , just
   3. cun cure, cun atenzion, cun impegn:  al lavore ben e al coste pôc (Carlo Sgorlon, Prime di sere)
      Sin. pulît
   4. in mût plasevul:  âstu passât ben la domenie?; al è l'unic ambient che si bêf un vin di sest e che si mangje ben (Alan Brusini, Gian Paolo Linda, I forescj)
   5. intune maniere o situazion vantazose, produtive e v.i.:  «Cemût la braide?» al veve ancje domandât. «E rint ben. Mondo le ten come une pipine» (Maria Forte, La tiere di Lansing); la prime fase de […] operazion si jere sierade e si jere sierade ben, te maniere che mi spietavi (Adrian Cescje, Memoriis di politiche linguistiche)
   6. cun intensitât o bondance:  rivât a Mortean, al à scugnût fermâsi, li al à scomençât a plovi ben (Angelo Covazzi, Colpe de aghe)
   7. in buine salût, di bon umôr:  ""Cemût stâstu?" i domandi. "Ben, gracie" (Alan Brusini, Gian Paolo Linda, I forescj); une alimentazion corete nus permet di deventâ vecjos ben e nus jude a mantignî un pês inte misure juste (Guglielmo Pitzalis, Mangje san 1)
   8. in maniere favorevule, positive:  o sarès in dovê di fevelâ nome ben dai miei paisans (Josef Marchet, Lis predicjis dal muini)
   9. cun abilitât:  la sô mestre e à di vêi insegnât jê a dissegnâ cussì ben (Barbara Battel, Nassite di une opare mestre)
      Sin. pulît
   10. in maniere clare, precise, complete:  al disè alc che no si capì ben (Dino Virgili, La strade come un destin); o jeri masse lontan par viodile ben (Carlo Sgorlon, Il dolfin)
   11. cence problemis, cence dificoltâts:  ancje pe Macedonie lis tratativis a van indevant ben e in curt a partissaran tratativis gnovis par Serbie, Albanie e Bosgne (Luche Nazzi, Riunificazion europeane)
   12. in funzion enfatiche:  tu viodarâs, tu vegnis ben vecjo ancje tu (Alan Brusini, Par stradis lungjis); e vignarà ben ancje la sô che e smetarà dute chê creste… (Pieri Menis, Un muart su la strade); tiriti in bande, tu, che o lu cuinci ben jo! (Meni Ucel, Rispiets)
       Sin. pûr¹ , lafè , fintremai
   13. se riferît a un adietîf o a un altri averbi al à in sostance funzion di superlatîf:  la pesantece dai vincui militârs sul teritori furlan e je dal sigûr ben grande (Adrian Cescje, Memoriis di politiche linguistiche); al è ben strani l'efiet che a mi fâs tornâ a viodi i miei lûcs daspò tant timp (Franca Mainardis, Il sium di Lissandri); [i stâts nazionâi] cuant che a vevin podê sovran lu àn doprât ben dispès in maniere injuste cui lôr popui e violente cun chei altris stâts (Sandri Carrozzo, La fin dal Stât Nazionâl jenfri ilegjitimitât, inutilitât e paradòs, tal spieli de ipotetiche Riforme Costituzionâl taliane dal 2016)
       Sin. tant , cetant , un grum , une vore , pardabon
2. inter. espression par rompi o par tacâ o par tornâ a cjapâ un discors:  viodêso chel cret là sù? Ben, al è il «Cret de Bafe» (Josef Cjargnel, I maçarots di Trep); "[…] Sâstu ce biel!" "Ben, a mi no mi va […] o soi pe robe semplice, jo." (Roberto Ongaro, Il muc)
   Sin. ben po , bon , po ben , ve¹ , cjo , beh
3. inter. par introdusi une conclusion o par invidâ a dî alc:  al jentre, […] e, pôc salt in gjambe, al ponte i braçs sul mio scritori (oh! ce flât di bevaçone!). - Ben disimi, ce vûstu! - Ai di dîi une robe… (Pieri Somede dai Marcs, Strambariis)
   Sin. alore , beh
4. av., inter. tant che rispueste positive:  "Podìno viodisi tor cinc dopomisdì?" "Ben!"
   Sin. sì , bon , va ben , sigûr
   
   1. ancje tant che rispueste e tal stes timp domande interlocutorie cuant che si ven clamâts, par pandi atenzion e disponibilitât:  «Miute, o Miute!…» «Ben!?» jê e veve rispuindût e, jevade sù dal jet e spalancât il barcon, e domandà: «Cui isal che al clame?…» (Pieri Menis, Une cotule pal dì de sagre); "Oe, parone?" "Ben?" "Nus fasaressiso la caritât di dânus alogjo par usgnot?" (Luigi Gortani, La ospitalitât); a clamà «Nene, Nene» «Ben!» e rispuindè la femine stant dentri, po e comparì sul barcon «Ah, sêstu tu?» (Maria Forte, La tiere di Lansing)
      Sin. sì , ce¹
5. s.m. ce che al è bon e just, soredut in sens morâl:  'Sefut, che nol saveve confins jenfri il ben e il mâl, parcè che al jere un cerviel cence lûs, i lave daûr come un cjan cence paron (Maria Forte, Chel svampît di 'Sefut)
   Sin. bon
   
   1. robe, cundizion, situazion che e zove, che e conven, che e da un vantaç:  il produtôr al lavore pal profit. E plui alt al è il profit e plui al è incentivât a produsi pal ben di ducj (Riedo Pup, La sflacje e merte un premi)
   2. buine cundizion di salût:  daspò chê domenie al fo finît il so ben. E scomençà a smarîsi di colôr, une fierisine i jere jentrade tai vues (Catarine Percude, L'ucielut de Mont Cjanine); «Scjampe vie, pal to ben. Mars!» e mi à molât un sburton (Pieri Menis, Il burlaç)
   3. [TS] filos. principi di fonde dal compuartament etic:  Diu e il Sant Spirt a son il Ben e la Lûs, l'Aversari al è il Mâl, la distruzion, la bausie e il Scûr plui neri (Franc Fari, Il cjâf dai furlans)
6. s.m. cun valôr neutri, robe buine, juste, positive, che e zove e v.i.:  al sarès ben che tu lassis a durmî (Gianni Gregoricchio, Trê feminis); pal sucès e la difusion de grafie uficiâl nol jere un ben di vê la socie furlane plui gruesse contrarie e rabiose (Adrian Cescje, Memoriis di politiche linguistiche)
   Sin. bon
7. s.m. sintiment bon:  ur volìn un ben trement a chei cuatri claps e a chês cumieris, a cheste tiere come a nissune altre (Francesc Placerean, Nadâl nus fâs capî che la storie e je plui profonde e biele di chel che e somee)
   Sin. amôr , bon
   
   1. persone che si à afiet par jê, che si è inamorâts:  ai preât la Bielestele / ducj i Sants dal Paradîs / che il Signôr fermi la vuere / e il gno ben torni in paîs (Popolâr, Ai preât la Bielestele)
      Sin. cûr , vite , stele¹ , vissare , anime
8. s.m. spec. tal pl., robe che si pues gjoldi, e dispès vê in possès, comprâ, vendi, passâ di proprietât:  lis impresis a funzionin su la fonde des jentradis che a vegnin de vendite dai bens e dai servizis produsûts e metûts sul marcjât (Marzi di Strassolt, Dal Prodot Interni Lort aes misuris dal benstâ); un fat avonde grâf al capite a Sant Denêl tal 1841. La int si rivolte cuintri la vendite dai bens comunâi (Elio Varutti, Il Risorziment a Martignà)
   Sin. avê , patrimoni , possediment , proprietât , ricjece , sostance , valôr
   
   1. [TS] dir. proprietât tant che ogjet dal dirit
9. coniun. intrudusint une costruzion cul gjerundi al rint la contemporaneitât cuntune azion continuade:  il Moro dal Blanc une dì ben insacant il forment al à pierdût la sô curtisse e no son stâts sants, nol à podût cjatâle (Pieri Somede dai Marcs, Vilie di Nadâl (teatri))
   Sin. biel
10. coniun. intrudusint o rinfuarçant une costruzion concessive:  ben capint che sô mari e veve reson, nol voleve dâi la sodisfazion di dîjal; ben cun dute la stime che o ai di lui, cheste volte o ai di criticâlu
    Sin. pûr¹ , cundut che , cundut di , a ben che , si ben

Polirematichis e espressions idiomatichis

• a cjalâ ben loc.av.
• a fin di ben loc.adi.inv., loc.av.
• a viodi ben loc.av.
• ancje ben che loc.coniun.
• ben che loc.coniun.
• ben di Diu loc.s.f., loc.s.m.
• ben e no mâl loc.av.
• ben fate loc.inter.
• ben imobil loc.s.m.
• ben intindût loc.inter.
• ben jodût loc.adi.
• ben o mâl loc.av.
• ben petade loc.inter.
• ben planc loc.av.
• ben planchin loc.av.
• ben rivât loc.adi., loc.s.m.
• ben sgnacade loc.inter.
• ben si intint loc.av.
• ben tornât loc.adi., loc.s.m.
• ben vignût loc.adi., loc.s.m.
• ben viodût loc.adi.
• che ben si intint loc.av.
• dî ben loc.v.
• di ben in miôr loc.av.
• fâ ben loc.v.
• fâ dal ben loc.v.
• fâ plui mâl che ben loc.v.
• in ben loc.av.
• juste ben loc.av.
• lâ ben loc.v.
• lâ ben di rime loc.v.
• mai tant ben loc.av., loc.inter.
• no vê ben loc.v.
• no vê ore di ben loc.v.
• o ben loc.coniun.
• o ben o mâl loc.av.
• par ben loc.av., loc.adi.inv.
• po ben loc.inter.
• poiâ ben loc.v.
• poiâsi ben loc.v.
• prometi ben loc.v.
• rivâ ben loc.v.
• se ben che loc.coniun.
• si ben loc.coniun.
• si ben che loc.coniun.
• sta ben loc.inter.
• stâ ben di cjase loc.v.
• stâ pôc ben loc.v.
• tant ben che mai loc.av., loc.inter.
• volê ben loc.v.
• volê un ben di vite loc.v.
• volêsi ben loc.v.
• volêsi un ben di vite loc.v.

Proverbis:

• a dî ben, al è simpri ben
• a lâ nome che a messe nol è ben
• a preâ e altri ben no fâ, a cjadaldiaul no si fâs di mancul di lâ
• a puarton spalancât il ben al po jentrâ e il mâl al po lâ
• a vê pure la cussience, ogni ben si po spietâ
• al ben si sta pôc a usâsi
• al è bon no chel che al fevele ben ma chel che lu fâs
• al è simpri ben di vê te sachete un carantan di stupit
• al è simpri ben di vê te sachete un solt di savût
• al rît ben cui che al rît l'ultin
• al sta simpri il ben vicin dal mâl
• al sta simpri il mâl vicin dal ben
• al vâl plui un porco ben metût che no cincuante pater
• al vâl plui un porco ben metût che no un pater mâl disût
• an di nêf, an di ben
• ancje chest an mâl e po mai plui ben
• ancje vuê mâl, e po mai altri ben
• ardiel vieri al cuince simpri ben
• avonde ben al è avonde prest
• barbe ben savonade e je mieze fate
• ben, ven di ben; mâl, ven di mal
• bisugne cjoli il ben cuant che al ven e il mâl cuant che si scuen
• bisugne fâ ben par mâl
• bisugne savê doprâ il len par nudrî la prole ben
• ce che al è ben al è di gjo, ce che al è mâl al è gno
• ce che al è mâl par un, al è ben par un altri
• cinc ruedis int un cjar no stan ben
• cjavre di fen, cjavre di ben; cjavre di frint, cjavre di vint
• cjoli il ben cuant che al ven e il mâl cuant che si scuen
• cuant che al è ben imbastît, al è ben cusît
• cuant che al è ben, al è ben par ducj
• cuant che al è di fâ ben no son, cuant che al è di fâ mâl no si sparagnin
• cuant che al ven il mâl si cognòs il ben pierdût
• cuant che dal cûr nol ven, cjantâ no si po ben
• cuant che il ben no si lu vûl, il mâl al è preparât
• cui che al è bessôl nol sta mai ben
• cui che al fâs ben al à ben
• cui che al fâs ben al cjate ben e cui che al fâs mâl al cjate mâl
• cui che al fâs ben lu cjate
• cui che al vûl stâ ben une dì, che al mangji ben; un mês, che si maridi; un an, che al maci il purcit; dute la vite, che al ledi predi
• cui che ben al compre ben al vent
• cui che ben al done ben al vent
• cui che ben al lee ben al dislee
• cui che ben al regale ben al vent
• cui che ben al scomence al è a metât de vore
• cui che ben al scomence ben al finìs
• cui che ben al siere al cjate
• cui che ben al siere ben al vierç
• cui che ben al vîf, ben al mûr; cui che mâl al vîf, mâl al mûr
• cui che no i dûl, ben al scortie
• cui che nol vûl il ben, il mâl al è preparât
• cui che si svante dal ben fat al piert il merit
• dai muarts o nuie o ben
• dal ben ducj a àn ben, dal mâl ducj a àn mâl
• di ben al ven ben, di mâl al ven mâl
• di robis a 'nd è une gucje par ducj, par ben che e ledi
• ducj a fevelin ben dal lôr mistîr
• e vâl plui une ore di ben che no cent di mâl
• fâ ben e lassâ dî
• fâ ben par mâl
• fâs il ben cence cjalâ a cui
• fâs il ben e lasse dî
• fevele pôc e ben
• Fevrâr: vuê ben e doman mâl
• il ben al è simpri ben
• il ben al sta cun cui che al fâs ben par mâl
• il ben che si fâs al vignarà ricompensât
• il ben e il mâl al sta leât al pâl
• il ben nol è mai trop
• il forment plui si lu ten e plui ben si lu vent
• il mâl al sta cun cui che al fâs mâl par ben
• il miedi e il speziâr di inzen a puedin fâ gran ben
• il mont nol è ben scompartît
• il plui grant ben e je la salût e la buine volontât parie
• il puar om nol à mai ben: se i mûr la vacje i vanze il fen, se la vacje e campe il fen i mancje
• il vuadagn al sta tal comprâ ben
• in chest mont no si à altri ben che il mangjâ
• la barbe il ben di un dì, la femine il ben di un mês, il purcit il ben di un an
• la robe e dîs di Istât: lavimi ben e stricimi mâl; di Invier: lavimi mâl e stricimi ben
• la vore fate ben nissun domande cetant timp che si à stât a fâle
• lasse che a disin ce che a vuelin e fâs ce che al va ben
• lis madonis a van ben picjadis sù pal mûr e lis brûts inte cite
• mai fâ mâl cu la sperance di vê ben
• mancul si sa e plui ben si sta
• mangjio stran o mangjio fen, ce che mi va in bocje mi sta ben
• miôr spietâ e spietâ ben
• nissun ben e nissun mâl nol dure cent agns
• no fâ mâl cun sperance di vê ben
• no si cognòs il ben che cuant che si lu à pierdût
• no si po cence pinsîr educâ ben i cavalîrs
• no si po volê ben cuant che dal cûr nol ven
• no stâ fâ mâl cun sperance di vê ben
• no stâ fâ mâl se tu vûs vê ben
• no tu sâs il ben, se il mâl nol ven
• nol è mai un mâl che nol puarti un ben
• nol è mai un mâl che nol sedi ancje un ben
• nol è mai un mâl par un che par altris nol sedi un ben
• nol è un ben che nol vedi il so mâl dongje
• ogni mâl par cualchi ben
• pan, gaban e fen a stan simpri ben
• pluitost di fâi ben a un vilan, spuditi te man
• preâ e ben no fâ, al è tant che blestemâ
• prest e ben no si conven
• prin di cognossi ben un, bisugne mangjâ cun lui un stâr di sâl
• scove gnove a scove ben, viodarìn chest an cu ven
• scove gnove e scove ben
• scove gnove e scove ben, e je la viere che e manten
• se e je ben vistude, ancje une colone a pâr une done
• se e je ben vistude, ancje une colone a pâr une matrone
• se no tu vûs insegnâ ben, fâs di mancul di insegnâ mâl
• se o ai ben lu gjolt, se o ai mâl lu zem
• se si po fâ une once di ben, si à di fâlu
• se tu âs ben gjoldût, se tu âs mâl semenât, friditi tal to gras
• se tu vûs sei ben viodût, tenti sort e ancje mut
• se tu vûs vê ben, fasilu
• si cognòs il ben co al è finît e plui nol ven
• si crôt plui facil il mâl che no il ben
• si scomence ben nome dal cîl
• spalancâ i voi parsore il ben, sierâ un voli parsore il mâl
• tal ben si usisi daurman
• tal frêt e sta ben dome la glace
• un ben racomandât, al è ben acetât
• une dì ben e une dì mâl
• une peraule ben dite e juste une malegracie mâl fate
• vuardilu ben, vuardilu dut: l'om cence bêçs tant che al è brut
• zunâ e altri ben no fâ, a cjase dal diaul no si lasse di lâ