biel
/-èl/
biel
[FO]
-
adi.
che al à un aspiet gradevul, che al plâs:
une fantate bielonone, alte, fate ben, rosse di cjavei (Gianfranco Pellegrini, Evelin);
il dissen dal puint di trê arcadis su la Save al spiche mai tant biel e lizêr tal sflandôr dai lusôrs (Ivano Urli, Storie di Min);
une motociclete di no si sa tropis mans, ma biele e sflandorose (Antescûr, Il svol dal Falcone)
Sin. deliziôs
, di incjant
, gradevul
, ninin
, plasevul
-
adi.
che al da o che al à dât buinis sensazions:
e je une biele serade parcè che i vecjos a son lâts a durmî e jo e gno cusin o podìn viodi bessôi la tele (Checo Tam, Eurocontest);
la mê veture e je modeste, ma e sarà une biele gjite (Alan Brusini, Gian Paolo Linda, I forescj);
i vignivin iniment i biei moments di cuant che al jere frut (Checo Tam, Gjoldiments forescj)
Sin. plasint
, plasevul
-
adi.
positîf, bon:
sêstu content parcè che tu âs cjapât un biel vôt a scuele? (Erika Adami, Il zûc de emozions)
Sin. bon
, positîf
, favorevul
-
ironic o par dî il contrari:
scomencistu za a comandâmi, ancjemò prin che ti cjoli? Ah, biel afâr o soi daûr a fâ! (Roberto Ongaro, Il muc);
insom de pagjine al jere metût un biel cuatri scrit in ros (Pieri Somede dai Marcs, Un cuatri in italian)
Sin. bon
-
adi.
dal timp atmosferic, seren, bon:
"Il tramontan al à puartât biel timp" mi dîs cjalant par aiar (Alan Brusini, Gian Paolo Linda, I forescj);
la Primevere sul principi biele, / darà fûr sul sierâ cualchi schinele (Pieri Çorut, Pronostic del 1836)
Sin. bon
, seren
-
adi.
grant di cuantitât, intensitât, cualitât e v.i., ancje di robis no positivis:
a mangjarin in presse un biel plat di macarons parom (Meni Ucel, I macarons);
une biele sume (Fabian Ros, Eivissa mon amour);
al po puartâ a cjase biei bêçs (Maria Forte, Mabile la Lunghine);
e à di vê fat une biele fadie a tirâle sù (Franco Marchetta, Madalene)
Sin. grant
, grues
, bondant
, notevul
-
adi.
(fig.)
caraterizât di robis buinis, di prosperitât, di fortune:
i gjenitôrs a progjetavin par lui un biel avignî (Gianfranco Grion, I biei voi di Baldin)
Sin. di buine vignude
, favorevul
, fortunât
, gaiôs
, gjubiâl
, positîf
, propizi
, seren
-
adi.
zentîl, creançôs:
jo mi soi contentade di fâti une cualchi osservazion cun biele maniere (Pieri Piçul, Vieri e gnûf)
Sin. bon
, cortês
, cortesan
, creançôs
-
adi.
bon, nobil daûr de morâl:
l'amôr al è il sintiment plui biel di chest mont (Gianni Gregoricchio, Trê feminis);
i lavôrs a tornaran a vuestre utilitât, e o varês dât un biel esempli di solidarietât e di patriotisim (Dino Virgili, La aghe da pît la cleve)
Sin. bon
, just
, nobil
-
adi.
cun valôr enfatic e infuarcitîf, ancje in costruzions che a puedin valê di superlatîf:
Pre Checo al veve zirade la letare a pre Antoni Beline, che i rispuindeve cuntun document biel lunc (Adrian Cescje, Memoriis di politiche linguistiche);
Par me la rispueste e je un biel no! (Franc Fari, Il cjâf dai furlans);
un cartel scrit in stampatel, biel in grant (Angelo Covazzi, Il dint)
-
adi.
prime di un infinît sostantivât, par dî che al è dibant o che al domande fadie:
tal doman so pari al veve un biel clamâlu par puartâlu cun se (Alan Brusini, Par stradis lungjis)
-
adi., av.
prime un participi, in câs ancje in costruzion cun "che", al pues pandi o dâ plui enfasi ae conclusion di une azion:
mi jeri biel rassegnât a fâ la mê talpinade dopo di vê cjapât cumiât definitîf de mê tiere e de mê int (Antoni Beline, Sant Jacum, là che al finìs il mont);
ta chel soreli che al nase di Viarte, cun chei morârs di fuee za biel che nassude (Dolfo Zorzut, La furlane)
Sin. za
, bielzà
, benzà
, aromai
, zaromai
Var. bel
-
cun daspò un participi, par segnâ che la azion e je sucedude di pôc:
in chel an, biel tornât de Gjermanie, sot Sants, al pensà di lâ in cjase de pueme, a fermâle (Meni Ucel, Rosaris);
la bandiere de patrie, che biel che fermade in alt si jere metude a svintulâ parsore di dutis lis cjasis (Pieri Somede dai Marcs, A jerin lagrimis)
Sin. a pene
, juste
-
te stesse secuence al pues ancje jessi dome enfatic o che la azione je fate cun cure:
dut colpe des disgraciis che mi àn biel finide chest an (Luigi Gortani, La ospitalitât)
Sin. ben
, propit
-
adi.
che al è muart:
tal armâr a son ancjemò duj i vistîts di biel so fi, no je rivade a dâ vie nuie
Sin. puar2
, biât
-
s.m.
dome sing., ce che al à valôr dal pont di viste estetic, cualitât di ce che al vâl dal pont di viste estetic:
Zuan al infondà i stivai in chel fof cence sintî dut il biel di chê mondisie e cussì al segnà la prime ferade (Maria Forte, La tiere di Lansing);
si smaraveà che une frutate cussì biele, di un biel che al resisteve ancje ai vistîts taiâts mâl e cence l'aiût di un bordin, i fos passade dongje par tant timp cence che lui, scuasit, si fos inacuart di jê (Maria Forte, Cjase di Dalban)
Sin. bielece
-
[TS]
filos.
la bielece tant che ogjet estetic e teoretic
-
robe biele:
cheste è fatalitât di uman destin, / che ogni biel à ca jù curte durade, / e un piçul pas è dal principi al fin (Ermes di Colorêt, I, 3)
-
s.m.
dome sing., aspiet positîf:
il biel dal caratar di Nedo al jere propit chest so rivâ a gloti ogni marum (Gianni Gregoricchio, Trê feminis)
Sin. bon
-
cun valôr fraseologjic:
ce leistu di biel? (Alan Brusini, Gian Paolo Linda, I forescj)
-
aspiet plui interessant:
ma il biel al è che propit te scuele di Cromazi, in chei agns li, al è stât un dai plui grancj paris de Glesie, di dute la Glesie di Ocident: Sant Jaroni (Francesc Placerean, La nestre storie)
-
iron. o antifrastic, aspiet plui dûr, dificil, negatîf e v.i.:
invezit di pensâ che no podeve jessi finide e che il biel al veve di vignî, si bandonarin a une mate baldorie (Josef Marchet, Cuintristorie dal Friûl fin sot la Italie)
Sin. biele1
-
s.m.
persone di aspiet gradevul:
il biel di borc (Dino Virgili, La aghe da pît la cleve)
-
(pop., fam.)
apelatîf confidenziâl par une persone che si è in amicizie:
oh, bundì biel, o soi propit content di vioditi
Sin. bielece
, amôr
, nini
, ninin
-
s.m.
la persone che si ame:
e cîr ogni pretest par cjatâsi cul so biel (Costantino Smaniotto, Co l'amôr al cimie);
no viodevi la ore di viodi la mê biele e bussâle (Mario Beltramini, Jo e Graziella)
Sin. inamorât
, morôs
, zovin
, fantat
-
(fam.)
apelatîf ancje par fruts o bestiis di cjase:
ven, ven ca, il gno biel, che ti doi un goloseç
-
s.m.
dome sing., timp meteorologjic cun soreli e cence perturbazions:
a son stâts doi dîs di biel e daspò e je tornade la ploie
Sin. biel timp
, bon timp
, seren
-
av.
devant di un verp tal gjerundi al infuarcìs il sens di contemporaneitât:
biel tornant da la Ongjarie / le cjatai sul lavadôr / bandonai la compagnie / mi metei a fâ l'amôr (Popolâr, Biel tornant da la Ongjarie);
lui al rispuint biel lavorant cence fermâ la scove di sanzit (Maria Forte, Fadie come ale)
-
av.
cun valôr temporâl, cul stes sens di bielzà:
e sintì a sunâ cjampanis, e cjalà l’orloi, al jere biel misdì, e veve di lâ a viodi dal gustâ (Jolanda Mazzon, Fûr di timp)
Sin. bielzà
, benzà
, za
, zaromai
, aromai
, di za
-
inter.
in escl., par pandi contentece:
"O ai propit cjatât il libri che tu cirivis" "Biel! Puedistu prestâmal?"
Sin. ben
, oro
Polirematichis e espressions idiomatichis
Proverbis:
- a fantate biele, brut fantat
- biel il timp; e je la int che e je carogne
- biele la vacje, biel il vidiel
- bielis peraulis e cjatîfs fats a incjanin savis e mats
- brut di piçul, biel di grant; biel di piçul, brut di grant
- brut in fasse, biel in place; biel in fasse, brut in place
- chês che a mangjin crostis e lat, no cjataran un biel fantat
- cu lis bielis peraulis e i bruts fats si ingjane savis e mats
- cu lis bielis peraulis no si jemple la panze
- cualchi volte cui che al à il plui biel tasê, al cjacare
- cui che al à il plui biel tasê, plui al fevele
- cui che al è di biele forme in avrîl al torne
- cui che si conserve al conserve un biel cjistiel
- dal dâ al vê e passe une biele diference
- di gnûf dut al è biel
- di une brute scarpe no vignarà mai fûr une biele çavate
- dulà che si passe la etât biele ogni piere a fevele
- i bêçs siei a son i plui biei
- i fruts a àn gust di dî: pari gno bon e no pari gno biel
- i fruts no disin papà biel e mame biele ma a cjalin se a 'nd è te scudiele
- i fruts no disin: pari biel, mari biele; ma: dami alc in te scudiele
- il biel e il bon a jemplin la bocje
- il biel e il bon al plaseve une volte
- il biel e il bon i plâs a ogni mincjon
- il biel e il bon ur plâs a ducj
- il biel ur plâs a ducj
- il dì plui biel de vite al è cuant che si purcite
- il fûc fin che al è sclâf al è biel e bon, ma vuai a lassâlu deventâ paron
- il fum al va a riviel, al va dongje dal plui biel
- il mont al è biel parcè che al è variabil
- il mont al è biel parcè che al è variât
- il mont al è biel pe sô varietât
- il mont al è simpri biel par cui che lu sa cjoli
- il plui biel tesaur e je la salût
- la femine dal mulinâr e ten simpri un biel gjalinâr
- lauditi cjan che tu âs une biele code
- lavôr mieç fat al è biel finît
- lis belecis a fasin plui biel
- mai laudâ il biel dì prin di sere
- miôr une buine femine che no une biele cjase
- nol è biel ce che al è biel, al è biel ce che al plâs
- nol pâr mai tant biel che a cjase so
- ogni biel bal al stufe, ogni bon pan al fâs la mufe
- ogni biel zûc al stufe, ogni bon pan al fâs la mufe
- ogni biele rose a va in fen
- ogni mincjon al sa lâ pal biel timp
- pan e vin al fâs nassi un biel fantulin
- par che e vegni biele ue e biele blave a vuelin cjantadis lis implorazions de ciale
- par cognossi il biel, bisugne viodi il brut
- par ogni uciel il so nît al è biel
- par vê biele la blave bisugne arâ di bessôi
- piçule magle e ruvine un biel tapêt
- se al sta ben l'anel, marît biel
- sorc biel in jerbe, brut in panole
- su di un biel porton al pâr bon un biel batel
- Tarcint, biel il paîs, triste la int
- un biel predicjâ il dizun a panze plene
- un biel tasê nol fo mai scrit
- une biele scarpe a fâs une biele çavate