Dizionari de Lenghe Furlane

zovin  /zò-/  zo|vin  [FO]

1. adi., s.m. che, cui che al è tai agns che a van de fin de adolessence al inizi de maturitât:  un om zovin e ridint, inamorât de vite e dal aiar garbin, fuart e sigûr de sô zoventût (Cristina Noacco, Faliscjis); une zovine si jere sentade dongje di lui e e veve tacât a tabaiâi di scuele (Checo Tam, Il dì celest); di siums a 'nd àn la anime plene i zovins (Alviero Negro, Int di masnade); lis feminis a jerin zovinis, ben vistudis, cul bonodôr di ciprie intorsi che al lassave une ferade daûr (Dino Virgili, La aghe da pît la cleve); "[…] Buine gnot, la mê int!" "Buine, chel zovin." (Dolfo Zorzut, La furlane)
   Var. zoven , zovent
   Cfr. frut¹ , frutat , fantat , puem
   
   1. ancje di animâl o plante, ancjemò no te maturitât:  [lis fueis a son] tenaris se la plante e je zovine (Giorgio Pascoli, Il Litum: jerbis salvadiis te cusine); Jacum al decidè di comprâ un mussut zovin e di tacâlu dongje il vecjo par usâlu (Angelo Covazzi, A tîr di doi)
   2. ancje riferît a alc di inanimât o astrat, nassût, formât di avonde pôc:  teren di aluvion avonde zovin (Rino Gubiani, Studi da la evoluzion dal paisaç mediant i toponims); la linguistiche computazionâl aplicade ae lenghe furlane e je ancjemò une dissipline zovine (Sandri Carrozzo, Jentrade dal DOF)
2. adi. che al è de zoventût, che al è espression, consecuence, carateristiche e v.i. de etât ancjemò no madure:  par siore Lise e jere avonde la presince di Meni in cjase sô, parcè che la fuarce zovine di lui e tignive sot teme cualchi dindiat tegnôs dal borc (Maria Forte, Cjase di Dalban)
3. adi., s.m. che, cui che al à pôcs agns rispiet a une cierte azion, situazion e v.i.:  Meni [restât vedul] al jere ancjemò zovin par no pensâ di tornâ a sposâsi (Pieri Menis, Chei di Muraie)
4. s.m. morôs:  al è gnot e scûr di ploie / e jo torni jù in paîs / par lâ a viodi dal gno zovin / se al è muart o se al è vîf (Popolâr, Al è gnot e scûr di ploie)
   Sin. morôs , fantat , puem , frut¹
5. adi. plen di salût, di fuarce, di bon umôr e v.i.:  al començave a visâsi di jessi leât a chê tiere cun dute la fuarce di un istint rabiôs che lu faseve tornâ zovin (Pieri Menis, Sul agâr); [ancje se tancj di nô a àn otante agns] nô o sin simpri zovins! E la ligrie (e dîs la vilote) e je dai zovins! ( (Danilo Vezzio, Festeggiati i 20 anni del Fogolâr di Chambéry)
6. adi. pensât, fat di personis zovinis o par personis zovinis:  al è rivât une altre volte il moment di SunsEurope,il Festival european des arts performativis in lenghe minoritarie dedicât ae prose, ae poesie, al teatri, aes produzions cinematografichis e a tancj stîi di musiche zovine (Cooperative di Informazion Furlane, 2016 SUNS EUROPE); ideis zovinis par salvâ l'ambient (Redazion il Diari, Il Diari 2/3/2012)
7. adi. di robe di mangjâ o di bevi, pôc stagjonade:  la cubie «bueriis e ribuele» e je proverbiâl. Ma tocje rimarcâ che cun «ribuele» no si intint chê «zale», […] ma ben il vin zovin, il prin blanc (amabil e turbit) che al jes de cantine (Margherita Timeus, Cjastinis)
   Sin. gnûf , resint
   Cfr. fresc¹
8. s.m. persone cun pocje esperience professionâl, cjapade a vore par che e impari o cun mansions gjenerichis e nivel jerarchic bas:  [fevelant al barbîr] "Insegne un pocje di creance al to zovin ve!" (Pieri Somede dai Marcs, La buteghe dal barbîr)
   Sin. garzon , fantat

Polirematichis e espressions idiomatichis

• zovin di lune loc.s.m.

Proverbis:

• bêf che plui zovin di vuê no tu bevis altri
• bisugne pleâ l'arbul co al è zovin
• cali vieri e lat zovin
• ce che al è permetût di zovin, no si po fâlu di vieli
• ce che si impare di zovin no si dispare di vieli
• colomp zovin, gjaline viele
• consei di vieli, aiût di zovin
• conseis di viei a judin i zovins
• cuant che il gjal zovin al cjante, il vieli al à za cjantât
• cuant che il vieli al duar e il zovin al vegle, il mont nol va plui ben
• cui che al gjolt di zovin al stente di vieli
• cui che al stente di zovin al gjolt di vieli
• cui che al va a cjaval di zovin al va a pît di vieli
• cui che di zovin si fâs mangjâ, di vieli al scuen lâ a pitocâ
• cui che no lis fâs di zovin lis fâs di vieli
• cui che no si inamore di zovin si inamore di vieli
• cui che nol sa comprâ che al compri zovin
• cui che nol sparagne di zovin al stente di vieli
• dâi une femine zovine a un vieli al è tant che dâi une cocule a un frut
• dreçâ l'arbul fin che al è zovin
• femine zovine, vin vieri
• i viei a vuelin che ancje i zovins a fasin come lôr
• il cali vieri e il lat zovin
• inte robe zovine no si piert mai
• la fiere terçane il zovin lu risane e al vieli i fâs sunâ la cjampane
• lis feminis ogni an a deventin plui zovinis
• mat di zovin, om di grant
• miedi vieli e barbîr zovin
• miedi vieli e ciroic zovin
• o murî zovins o vignî viei
• sclope di zovins, miserie di viei
• un matrimoni fra doi zovins al è un matrimoni dal Signôr, un matrimoni fra doi viei al è un matrimoni di mierde, un matrimoni fra un zovin e un vieli al è un matrimoni dal diaul