Dizionari de Lenghe Furlane

frut¹  frut  [FO]

1. s.m. persone che e à pocs agns, te etât de infanzie:  il frut mi domande di zuiâ a bale cun lui e mi bute il balon su la taule (Max Mauro, Un Friûl difarent: i 90 mhz di Onde Furlane); nostalgjie misturade a felicitât… i vignivin iniment i biei moments di cuant che al jere frut (Checo Tam, Gjoldiments forescj); la mestre Lene tal so tinelut e stave corezint i cuaders dai siei fruts di scuele (Pieri Menis, Sul agâr); Ma benedet, lui al è piês dai fruts… al vûl savê dut! (Arturo Feruglio, Viaç a Vignesie)
   Sin. bambin , canai , creature , fantuç , frutin , mamul , nin¹ , nini , pin² , pipin
2. s.m. persone, di cualsisei etât, rispiet a sô mari e so pari, fi:  il so voli si impegnave, plui dispès su la rie ferme dal mâr a tramontan, là che al jere il so frut in pericul (Maria Forte, Cjase di Dalban); [ai siei fîs impegnâts tune tratative] «Cjalait, fruts, tornait dentri e disêt che plui sot di chel impuart no podìn lâ» (Oscar Puntel, Mario Collavino: une bandiere furlane parsore il gnûf World Trade Center di New York)
3. s.m. tant che apelatîf, di afiet o ironie, ancje riferît a zovins o oms:  a beverin un got insiemi e po Tite al tacà: "Sint mo frut: jo o sai che tu, cul cjapitani muc, tu âs un pocje di confidence […]" (Roberto Ongaro, Il muc)
   Sin. canai , mûl , fantat , fion
4. s.m. om une vore zovin:  si po dî che al jere ancjemò frut cuant che e sclopà la vuere, e lui, alpin, al è stât un dai prins a rivâ sul Mont Ros (Pieri Menis, Tinut di Libro)
   Sin. fantacin , fantat , mûl
5. s.m. (fig.) persone imadure, che e refude responsabilitâts o che e à compuartaments capriçôs:  «Sù mo sù, no stin a sei fruts!» (Meni Ucel, Messe a straoris)
   
   1. persone che no je buine di resonâ e di rangjâsi:  il vieli al è pierdût, al è tornât un frut (Alan Brusini, Come tai romançs)

Polirematichis e espressions idiomatichis

• di frut insù loc.av.
• pierdi il frut loc.v.
• vê un frut parsore filâ loc.v.
• vê un frut sore filâ loc.v.

Proverbis:

• a impaçâsi cui fruts, si fâs lis mans di mierde
• a ingomein i fruts che a fasin di umign, a ingomein i umign che a fasin di fruts
• colomps e fruts a sbitiin la cjase
• cuant che i fruts a fevelin, i grancj a àn za biel fevelât
• cuant che i fruts a stan cuiets, al è cjatîf segn
• cuant che i fruts a stan cuiets, brut segn
• cuant che i fruts a stan cuiets, segn che a son malâts
• dai fruts no si po sperâ nuie
• dâi une femine zovine a un vieli al è tant che dâi une cocule a un frut
• fruts cun fruts e frutis cun frutis
• fruts e colomps a puartin dongje simpri alc
• fruts e colomps a scuintiin lis cjasis
• i fruts a àn gust di dî: pari gno bon e no pari gno biel
• i fruts a son tant che la sponze di mâr
• i fruts ce che a sintin a ripetin
• i fruts e i mats a àn simpri l'agnul custodi a vuardâju
• i fruts no disin papà biel e mame biele ma a cjalin se a 'nd è te scudiele
• i fruts no disin: pari biel, mari biele; ma: dami alc in te scudiele
• i viei a tornin fruts
• l'uciel in man al frut, la surîs in bocje al gjat, lis disgraciis in man al avocat
• lasse lis feminis che a fasin pan, fruts e lissie
• lis pomis ai fruts e la corone ai viei
• malatiis di fruts, anade di bondance
• mats e fruts a puedin dî ce che a vuelin
• no stâ lâ daûr di peçots di fruts
• ogni cjan al laude la sô code, ogni femine il so frut
• passâts i sessante agns si torne fruts
• se il Signôr al mande il frut, al mande ancje il pagnut
• trê robis impussibilis: fâ stâ fers i fruts, fâ cori i viei, fâ tasê lis feminis