Dizionari de Lenghe Furlane

gnûf  gnûf  [FO]

1. adi. a pene finît, fat di pôc timp o ancje che si è daûr a fâ:  ogni tant al si inacuarzeve che a vevin fate sù une cjase gnove, o pûr stabilide une di chês vecjis (Carlo Sgorlon, Prime di sere); sot e passave la strade gnove, che e lassave fûr il paîs (Carlo Sgorlon, Prime di sere)
   Sin. crei , di scree , resint
   Var. gnôf , nûf² , nôf¹
   
   1. sucedût di pôc timp, o ancje che al à ancjemò di sucedi:  cheste tindince […] e vierç la strade par gnovis scuviertis ai ricercjadôrs (Lorenzo Marcolini, Recension di La scienza non ha bisogno di Dio)
   2. nassût di pôc timp, o ancje che al à ancjemò di nassi:  un trop di personis si da adun par fondâ la Associazion teatrâl furlane. Par cualchi mês la sede de gnove associazion e je propit in vie Volturno (Max Mauro, Un Friûl difarent: i 90 mhz di Onde Furlane)
2. adi. comprât di pôc timp:  cu la mude e lis scarpis gnovis che a criçavin a ogni pas (Roberto Ongaro, Cretevierte); Eliseo al vignì jù a misdì in pont cu la cjamese gnove (Carlo Sgorlon, Prime di sere)
   Sin. crei , di scree , resint
3. adi. no fruiât, doprât pôc, tignût ben:  i libris a son li di agns ma a son ancjemò gnûfs, cualchidun ancje cu lis pagjinis di taiâ
   Sin. crei , di scree
4. adi., s.m. di un prodot agricul, de ultime produzion:  Sant Martin, odôr di vin gnûf, fieste de racolte (Dino Virgili, La aghe da pît la cleve); plats di patatutis gnovis e di vuaìnis frescjis, tenaris come spongje (Riedo Pup, I furlans e lis feriis)
   Sin. crei , novel , resint
5. adi. che al è li par scomençâ, o a pene scomençât:  al rive il gnûf an e o sin ca a spietâlu cul cûr ingropât e il flât ingussît (Josef Marchet, Il cîl nulât)
   Sin. che al jentre , che al ven , crei
   
   1. che al è li li par tacâ une ativitât o che le à tacade di pôc:  no cjatà nissun che al ves vonde lavôr par dî di cjoli un gnûf garzon (Roberto Ongaro, Il muc); al vignarà a fâ servizi regolâr un predi gnûf, rivât vuê in plêf (Josef Marchet, Lis predicjis dal muini)
   2. che al à pocje esperience:  no stâ a domandâmi a mi che o soi gnûf ancje jo
6. adi. di pôc timp intune determinade cundizion o ancje che in curt al à di tacâ a jessi intune cierte cundizion:  te Union a son jentrâts dîs stâts gnûfs, al 1n di Mai dal 2004 (Marc Stolf, Minorancis linguistichis)
7. adi. che al à caratars diferents rispiet a alc che al jere prime o che al è simpri stât:  cu la aprovazion de leç regjonâl n. 15 dal 1996 si vierç une situazion gnove par Onde Furlane e par dutis lis realtâts che si interessin de promozion dal furlan (Max Mauro, Un Friûl difarent: i 90 mhz di Onde Furlane)
   
   1. che al da une impression diferente:  il colôr dal cîl al jere gnûf par je, plui font (Agnul di Spere, Te grande place)
8. adi. che al cjape il puest o cualchi funzion di cdn. o di alc che al jere prime:  comunitâts [di emigrants] che a àn tignudis vivis lis lidrîs, ma no àn ostacolade une integrazion di sucès, fate di rispiet vuadagnât e ufiert aes gnovis patriis (Toni Capuozzo, Su la cuarde de imigrazion)
   
   1. che si zonte a alc o a cdn. che al jere prime:  tes ultimis setemanis dut chest al à cjatât gnovis confermis (Marc Stolf, Italicum: simpri plui «nomen omen»)
      Sin. altri
9. adi. che si somee cun cdn. o cun alc che al jere za stât famôs intal passât o che al è une sô version inzornade o mudade:  al pense di jessi un gnûf Zico
   Sin. altri
10. adi. no cognossût, che si viodilu pe prime volte:  cetancj di lôr […] che a vignivin a cognossi li [in ostarie] gnove int (Riedo Pup, I furlans e la ostarie); il so sens dai afârs no le bandonave mai, nancje intune situazion gnove, intun gnûf paîs (Franca Mainardis, Il sium di Lissandri)
    Sin. discognossût , no cognossût
    
    1. che prime no si saveve:  fadie di inserîsi, di cjatâ cjase e lavôr, di imparâ une lenghe gnove (Margherita Timeus, Mangjâ furlan tai siums dai emigrants)
11. s.m. dome tal sing., robe a pene fate, preparade, inventade e v.i. o che e compuarte une diference rispiet a ce che al jere:  il gnûf e il grant nol è simpri e dut progrès (Riedo Pup, I caratei des scovacis); Gnotui? Achì tal gnûf? Forsit e sarà une viertidure intes trâfs (Checo Tam, X-Reihen)
12. s.m. dome tal sing., robe in vendite o setôr di robe in vendite no doprade:  "Vêso bicicletis di seconde man?" "No mi displâs, o lavorìn dome cul gnûf"

Polirematichis e espressions idiomatichis

• da gnûf loc.av.
• di gnûf loc.av., loc.inter.
• gnûf di lune loc.s.m.
• gnûf testament loc.s.m.
• meti a gnûf loc.v.

Proverbis:

• cualchi volte e dure plui une vite viere che no une gnove
• cui che al lasse la strade viere pe gnove al sa ce che al lasse ma nol sa ce che al cjate
• cui che al romp di vieri al paie di gnûf
• di gnûf dut al è biel
• e dure plui une cite sclapade che no une gnove
• e vâl plui la cite viere che no la gnove
• il claut vieri al sparagne chel gnûf
• mai bandonâ la strade viere par chê gnove
• no bisugne lassâ la strade viere par chê gnove
• pecjât vieri e pinitince gnove
• scove gnove a scove ben, viodarìn chest an cu ven
• scove gnove e scove ben
• scove gnove e scove ben, e je la viere che e manten