altri
al|tri
[FO]
-
adi.indef., pron.indef.
diferent, diviers di ce che si veve dite o fat capî(in gjenar te lenghe di riferiment in prime di altri no si cjate l'articul definît, ma il dimostratîf chel):
al butà jù, cussì, une cjarte destinade a un altri dotôr (Fabian Ros, L'om che al pierdeve pinsîrs pe strade);
ma il Signôr vie pe sô strade cence contâlu, cjalant di une altre bande (Catarine Percude, Il voli di chest mont);
trê di lôr a rezin il cjaveç di un mac di cuardis, intant altris doi si pein in vite chel altri cjaveç (Ivano Urli, Storie di Min);
borcs cun cjasis une taco la altre, tune lungje filaine (Roman Michelot, La cjase dai contents)
Var. atri
, ati
-
pron.indef.
tal pl., persone o robe diferente rispiet a ce che si à za dit o mostrât:
[Carli il Grant] al fasè un maçalizi di chei Langobarts che a si jerin rivielâts. Altris a 'ndi mandà vie lontans, altris a 'ndi metè in preson e ur cjolè dut ce che vevin (Josef Marchet, Cuintristorie dal Friûl fin sot la Italie)
-
pron.indef.
tal m.sing., in corelazions:
come dî: altri al è ce che o sin e altri al è ce che o varessin di jessi (Francesc Placerean, La Glesie e à di lassâ i popui come che a son e fâur di levan seont la lôr paste)
-
adi., pron.
par indicâ un element gnûf tune serie:
puartimi un altri cuart di neri, va (Gianfranco Pellegrini, Sium de Vilie dai Sants)
-
adi.
in determinazions temporâls, se prime al à un articul definît o miôr un adietîf dimostratîf, al segne alc dal passât:
cui us cuinçave lis vîts, chei altris agns? (Carlo Sgorlon, Prime di sere);
in chê altre vuere, nol à podût lâ plui indenant di caporâl (Riedo Pup, Che al vadi vie)
Sin. passât
, prin
, prime1
, stât1
-
se prime al à un adietîf indefinît, al segne alc che al sucedarà tal avignî:
e a riviodisi un altri an, un altri an culì (Francesc Placerean, Si savarìn a dî fra dîs agns!)
-
adi.
tant che infuarcitîf, dopo adietîfs o pronons personâi, dimostratîfs, indefinîts:
il Friûl se no si lu drece noaltris, nol è pericul che nissun altri si scomponi a dreçâlu (Josef Marchet, Preambul rusin)
-
pron.indef.
dome m.sing., une altre robe:
nol restave altri ce dî (Meni Ucel, Il discors);
po dopo si sin metûts a fâ altri (Meni Ucel, Gnot di Avost);
se cualchidun al pensàs di denunziâ chest fat aes autoritâts competentis nol fasarès altri che il so dovê di citadin (Marc Stolf, Scuele vierte. Par dut, par ducj ma no pal furlan)
Sin. nuie altri
, alc altri
-
adi.
che al è diferent par nature, cundizion, aspiet e v.i.:
cumò nissun i diseve: «Voaltris!», come se a fossin di une altre raze di int (Dino Virgili, La aghe da pît la cleve)
Sin. aviers
, contrari
, diferent
, diviers
, ledrôs
, lontan
-
av.
mai plui, nissune altre volte:
i sdrondenons e i tons a no finivin altri (Ugo Pellis, Catinuta);
a viodi bandiere blancje no train altri, ju cjapin presonîrs (Ivano Urli, Storie di Vera)
Sin. mai plui
, mai plui e mai altri
, plui
Polirematichis e espressions idiomatichis
Proverbis:
- a tindi masse archetis, a cjapin sù i uciei chei altris
- al è facil di direzi lis cjasis di chei altris, al è la sô che al è une vore dificil
- al pâr che la sô crôs a sedi la plui grande ma se si cjale chê di chei altris si torne a cjoli sù la sô
- al sa plui un mat a cjase sô che no un savi a cjase di altris
- altri al è cori, altri al è rivà
- altri al è fevelâ di muart, altri al è il murî
- altri al è il dî, altri al è il fâ
- altri al è il jessi, altri il someâ
- altri al è l'imprometi, altri al è il mantignî
- altris timps, altris usancis
- bisugne fâ la barbe prin par se e po, se al vanze timp, ancje a chei altris
- ce che al è mâl par un, al è ben par un altri
- cemût tegnial cont dai altris cui che nol ten cont di se?
- cu la robe dai altris no si devente siôrs
- cuant che si sta mâl di une bande, si voltisi di chê altre
- cuant che si va jù par la aghe, si cjapisi pai baraçs se no si po altri
- cuant che si vîf, si à di fâ in maniere che a vivin ancje chei altris
- cui che al crôt di fâure a chei altris, se fâs par se
- cui che al fâs la fuesse pai altris al è il prin a lâ dentri
- cui che al gjolt dal mâl dai altris co a vegnin lis disgraciis al vai di bessôl
- cui che al prepare la buse pai altris se fâs par se
- cui che al promet pai altris al paie par se
- cui che al rît dai altris al rît di se
- cui che al robe pai altris al va in preson par se
- cui che al sta in fidance dai altris al pie di mat
- cui che le fâs pai altris le fâs par se
- cui che nol cjate bêçs tes sôs sachetis int cjate mancul in chês di chei altris
- cui che nol rispiete chei altris no si rispiete nancje se stes
- cui che nol ten cont dal so, mancul di chel di chei altris
- cui che si cjale se stes no i vanze timp di cjalâ chei altris
- cui che si cure dai fats dai altris al trascure i siei
- cul art e cul ingjan si vîf nome mieç an, cul ingjan e cul art si vîf chê altre part
- cul fâur ben ai altris tu fasis ben par te
- dal mâl di chei altris no si à nissun vantaç
- de robe dai altris ducj a son gjenerôs
- fâs ai altris ce che tu volaressis fat a ti
- fidance di altris, cjapiel di mat
- fortunât cui che al impare a spesis dai altris e no a spesis sôs
- i cops si dan di bevi un cul altri
- i cops si dan la aghe un cul altri
- i dîs a son peâts un daûr di chel altri
- il mâl dai altris no i juste lis cuestis a dinissun
- il mâl dai altris nol cuince chel di nissun
- il mâl di un nol cuince chel di chei altris
- il pan dai altris, chel plui bon, al à siet crostis e chel plui dûr ind à nûf
- il prin miâr di florins al è dificil di fâ, chei altris daspò a vegnin bessôi
- in chest mont no si à altri ben che il mangjâ
- intant che si pense ai fats dai altris, si dismentee i siei
- l'om nol cognòs il cûr e la ment dal altri om
- la disgracie di un e je la fortune di un altri
- la fortune di un e je la disgracie di un altri
- la vacje sporcje a sporcje chês altris
- lis vacjis si fasin la une la altre
- mangjâ a gust so e vistîsi a gust dai altris
- mangjâ a mût so e vistîsi a mût dai altris
- mangje a mût to e vistìs a mût dai altris
- miôr famei a cjase sô che no paron a cjase dai altris
- miôr misurâ che no vê des mans di chei altris
- miôr un cjôt so che no un palaç di un altri
- muart un pape si 'nt fâs un altri
- nissun om nol cognòs il cûr dal altri om
- nissun sa ce che al bol te cite di chei altris
- no bisugne impaçâsi dai fats dai altris che si à avonde di viodi dai siei
- no stâ fâur ai altris ce che no ti pâr bon a ti
- nol è mai un mâl par un che par altris nol sedi un ben
- nol è plui segret ce che si dîs a un altri
- nol è segret co si i al conte a un altri
- nol po tignî cont de robe dai altris cui che nol ten cont de sô
- o vin di fâ come i cops che si dan di bevi un cul altri
- o vin ducj dibisugne un dal altri
- prin di dî mâl dai altris, cjale te stes
- prin di nô a jerin altris, po a vignaran ancjemò altris
- prin viôt se tu âs la cjamese sporcje po scuintiije a di chei altris
- San Vicenç, grant criùre; Sant Laurinç, grant cjaldure: la une e la altre pôc e dure
- se tu vûs che i altris a mantegnin il to segret, scomence a mantignîlu tu
- sperance dai altris, cjapiel di mat
- tegne e rogne altri mâl no bisogne
- trê a son i difiets dai furlans: fâur mâl ai fradis, lavorâ pai altris, alçâ il comedon
- un diaul al cjace chel altri
- un diaul al pare fûr chel altri
- un gobit nol coione un altri gobit
- un mâl al clame chel altri
- un mâl al tire chel altri
- un malan al cjace chel altri
- un pêr frait al fraidès ancje chei altris
- un piruç vuast al vuaste chei altris
- un plasê al clame chel altri
- un plasê ind clame un altri
- un vizi al clame chel altri
- une peraule e tire chê altre
- une vacje sporcje e cîr simpri di sporcjâ chê altre
- une vacje sporcje e scuintie ancje chês altris
- vistî a mût di chei altris, mangjâ a mût so
- zunâ e altri ben no fâ, a cjase dal diaul no si lasse di lâ