Dizionari de Lenghe Furlane

passât  pa|ssât  [FO]

1. p.pass., adi. viôt passâ , viôt passâsi
2. adi. che al è stât prime di cumò:  al jere infognât tal fum e tal bevi e tal pensâ a un timp passât e pierdût par simpri (Alan Brusini, Par stradis lungjis)
   Sin. lât¹ , lontan , stât¹
   
   1. i element temporâl, che al è a pene finît, che al jere a pene prime rispiet a chel di cumò:  ti vevio dite che nus à nassût un vidiel propit la setemane passade? (Gianni Gregoricchio, Trê feminis); lis fondis de contabilitât nazionâl a forin stabilidis tai agns Trente dal secul passât, te aree anglosassone (Marzi di Strassolt, Dal Prodot Interni Lort aes misuris dal benstâ)
   2. di element temporâl, che al jere a pene prime rispiet di chel che al fâs di riferiment tal discors:  al specolave cul zei jenfri lis gjambis, sot il puarti, e la blave di l'an passât e sunave sot i dincj dal fier (Dino Virgili, La aghe da pît la cleve)
      Sin. prin , prime¹
   3. di ore, che no je plui in pont:  polsâ fintremai lis dîs passadis (Arturo Feruglio, Viaç a Vignesie)
      Sin. sunât
   4. di etât che no corispuint plui a chê di un numar taront, che e je di cualchi an in plui:  Jean-Marie al à vude la idee di domandâ a sô mari, di otante agns passâts, di contâ la sô vite di emigrante (Italo Scaravetti, Une tant biele scree in Vuascogne!)
      Sin. sunât
3. adi. che par funzionalitât, stîl, mode, concezion e v.i. nol è plui doprât, che nol è plui atuâl:  prejudizis che a esistin ancjemò su la lenghe (il furlan tant che lenghe vecje, passade, che no covente…) (Erika Adami, La promozion de lenghe furlane sui mass media)
4. adi. che nol è plui fresc, masse madûr o, tal câs di robis di mangjâ o sim., che al tache a lâ di mâl:  come un vier tune cjariese passade (Maria Forte, La tiere di Lansing)
   Sin. passadot , lât¹
   Cfr. laît , lisp , frait
5. s.m. il timp che al è stât prime di cumò o prime di un ciert moment:  e sintive nome bisugne di une peraule par fâi dismenteâ il passât, di un confuart par cjalâ cun serenitât il presint (Lucio Perès, La strie); i Furlans di vuê a àn di cjapâ plene cussience de ereditât storiche dal lôr passât (Gian Carlo Menis, Storie dal popul furlan); si pierdeve tai siei ricuarts come se il passât al fos ancjemò sot i siei voi (Carlo Sgorlon, Il dolfin)
6. s.m., adi. [TS] gram. timp verbâl, che al segne une azion za sucedude:  l'indicatîf imperfet al è un passât che al segne une azion cuntune cierte durade e no finide
7. s.m. [TS] gastr. mignestre in forme di creme, une volte passade pal tamês, vuê otignude cun diviers imprescj di cusine:  di prin sielç une porzion di paste o di rîs, mignestre, mignestron, passât di verdure (AAVV, Une sane alimentazion. Un zûc di fruts!); passait cul tamês lis fueis di ledrepis. Inte fersorie dislidi la cevole taçade e il spic di ai cu la spongje. Zontâ il passât di ledrepis e messedant fâlu ben insavorî, regolant di sâl (Giorgio Pascoli, Il Litum: jerbis salvadiis te cusine)
   Sin. creme

Polirematichis e espressions idiomatichis

• aghe passade loc.s.f.
• an passât loc.s.m., loc.av.

Proverbis:

• aghe passade no masane
• aghe passade no masane plui