Dizionari de Lenghe Furlane

crei  /-è-/  crei  [AF]

1. adi. a pene comprât o a pene fat, ancje in cumbinazion cun "gnûf":  un cit crei (Giulio Andrea Pirona, Ercole Carletti, Giovanni Battista Corgnali, Il Nuovo Pirona); i à comprade dute robe gnove cree, chel che propit i coventave, e la robe dismetude me à passade a mi (Antoni Beline, La fabriche dai predis)
   Sin. gnûf , resint
   Var. grei
2. adi. di plante o di part di plante, a pene nassude, vignude fûr di pôc:  la ombrene lizere des fueis imò creis (Dino Virgili, Pasche fluride)
   
   1. di pome o prodot, ancjemò no madûr, ancjemò indaûr:  lis pomis che no sedin creis (Josef Butaçon, Il furlan. Almanac del an 1877)
      Sin. vert , crût , garp
   2. ancje di persone o di fenomen, ancjemò no madûr, che nol à ancjemò puartât insom dutis lis sôs potenzialitâts:  un cjantautôr ancjemò un tic crei, ma di bielis sperancis (Mauro Missana, Musiche a dute fuarce); la lote pe lenghe furlane, par tant che la situazion e fos ancjemò cree, tal 2000 e jere deventade tant plui concrete che tai agns 70 e 80 (Adrian Cescje, Memoriis di politiche linguistiche)
3. adi. ancje di alc di astrat, gnûf, intat o nancje dal dut madressût:  il prin suspiet inmò crei, si jere pontât dentri vie (Maria Forte, Mabile la Lunghine)
   
   1. intat, no vuastât:  la glesie e jere restade interie e cree tal mieç dal fisc des cjasis [sdrumadis pe vuere] (Agnul di Spere, Cjalant la rive)
4. adi. de Vierte, a pene tacade e che e pues jessi ancjemò frescje o frede:  su lis monts di Cjargne, insom la Tresemane, la ultime nêf; culì i lens cu lis bachetis sglonfis di butui e sui rivâi la jarbe verduline: la Viarte inmò cree tal aiar (Dino Virgili, La aghe da pît la cleve)
5. adi. une vore zovin o che al somee une vore zovin:  al à za passade la etât cree e cumò al è in chê de esperience (Raffaele Serafini, Altris contis di famee); al mostrave, daûr il colôr dai cjavei, di vê i siei agns; ma al veve une muse ancjemò cree. Une muse di frut (Maria Forte, Cjase di Dalban)
6. s.m. ce che al è gnûf, il jessi gnûf:  vistude dut di crei (Tite Robul, Un pôcs di ratais in furlan cormonês)
7. s.m. [TS] agr. tiere ancjemò no lavorade:  arâ tal crei (Giovanni Frau, Aggiunte e correzioni al Nuovo Pirona)
   
   1. operazion di rompi la tiere par preparâle par meti plantis:  cui che à cjamps, je cheste ca / la stagjon del plui cefâ / fâ creis gnûfs, fâ plantisions (Giulio Andrea Pirona, Ercole Carletti, Giovanni Battista Corgnali, Francesco Coceani, Il Nuovo Pirona)