Dizionari de Lenghe Furlane

vert  /-è-/  vert  [FO]

1. adi., s.m. colôr jenfri il zâl e il celest, tipic par esempli de jerbe:  lis monts plui dongje a jerin dutis verdis di boscs e di prâts (Carlo Sgorlon, Il dolfin); E drece viers di me i siei voi verts, cuiets e biei (Alan Brusini, Gian Paolo Linda, I forescj); dal barcon al cjalave fûr tal fogôr dal ort i zâi e i verts des fueis des vîts (Agnul di Spere, Vivi a Codroip); lis gratulis cui peltris colorâts di vert e ros (Dino Virgili, La aghe da pît la cleve)
   
   1. lûs dal semafar che e permeti di passâ:  al è cui che al va in moto spedît, cui che al cjamine sul marcjepît, cui che al semafar al spiete il vert (Raffaella Del Forno, La tartarughe sprint)
2. s.m. part di alc caraterizade di chel colôr:  al roseave lis scussis de angurie fin sul vert (Maria Forte, La tiere di Lansing)
3. adi. spec. di plante o part di plante, sane e vive:  pecjât che rosis e ramaçs no durin verts trop a lunc! (Josef Marchet, Lis predicjis dal muini)
   
   1. (fig.) ancje di persone, zovine e in salût:  il fi plui biel, se Diu lu lassave vert, al podeve pretindi (Maria Forte, Cjase di Dalban)
4. adi. spec. di pomis, no ancjemò maduris:  i piruçs a son ancjemò masse verts; aga di coculis verdis, che serviva par tensi la lana (Ranieri Mario Cossâr, Il sun da la contessina)
   Sin. agri¹ , crei , crût , garp , malmadûr , indaûr
   
   1. dal len, taiât di pôc:  cun chês bruscjis verdis che al brusave e jere dut une fumere (Riedo Pup, La gjambe di Zaneto)
5. adi. (fig.) no ancjemò madûr, tipic di une fase no madure:  chê vite verde che e jere in dirit di vivi lis sôs stagjons (Maria Forte, La tiere di Lansing)
6. adi. di estension di tiere, caraterizade de presince di plantis:  e jere une biele stanzie, grande e lusorose, cui barcons che si vierzevin suntun piçul parc, bielzà vert e profumât in chê stagjon (Franca Mainardis, Aiar di cjase)
   
   1. s.m. ambient cun plantis:  la int che e lavorave in campagne, in mieç dal vert e dal soreli (Pieri Somede dai Marcs, Spacecjamin)
   2. s.m. vegjetazion vive o part taiade di une plante vive:  i uciei tal vert si passavin i cjants (Maria Forte, Mabile la Lunghine); a balarin, nuviç e nuvice, la Furlane e la Sclave cun bielis zoiis di vert sul cjâf (Dino Virgili, La aghe da pît la cleve); une grant fieste, bandierinis pardut, cualchi arc di vert in prin dai borcs (Pieri Somede dai Marcs, L'ultin cordo)
7. adi. (fig.) cun espression e ciere de muse che a pandin rabie, gnervôs, vergogne e v.i.:  Jacum al jere restât cui dêts fers sui botons, vert di rabie, e i veve zigât come ofindût (Maria Forte, La cjase dal Murat); lis possadis a jerin propit te sô sachete: il re al devente vert (Andreina Nicoloso Ciceri, Maletegne - Racconti popolari friulani I); ridons, dulintor! E la Fiorine e je verde. Di chel istès no si rint (Meni Ucel, Tirâ sù fruts)
8. adi. (fig.) che al rispiete l'ambient, che al va daûr dai criteris de ecologjie:  mistîrs peâts ae economie verde, come che e ven clamade chê che e strace pocje energjie e e ten cont dal ambient (Antonella Lanfrit, Artesans devant de crisi, problemis e sperancis: interviste al president di Confartigianato Tilatti)
   Sin. ecologjic
   
   1. di combustibil, che e à mancul sostancis incuinantis rispiet a altris, in particolâr che nol à plomp:  chê altre sorte di benzine verde che si cjate in Slovenie, ven a stâi chê di 95 otans, e à passât cheste cuote […] rivant a 1,528 euros (Alessio Potocco, Cost de benzine, un probleme ancje di là dal clap)
9. adi., s.m. [TS] polit. che, cui che al à obietîfs politics incentrâts su la ecologjie:  te formazion verde regjonâl al fo elet conseîr Elie Mion, un dai oms che cun Cjaval a vevin contribuît a fondâ la linie nazionalitarie furlane di Democrazie Proletarie dal Friûl tai agns 80 (Adrian Cescje, Memoriis di politiche linguistiche); Pieri Fontanin, che al sarà prin conseîr provinciâl pai Verts e plui tart […] deputât tal Parlament sot de bandiere de Lega Nord (Max Mauro, Un Friûl difarent: i 90 mhz di Onde Furlane)
10. adi., s.m. stor., polit. ae fin de seconde vuere mondiâl e tai agns dopo de fin de vuere, di persone o formazion politiche, di ispirazion laiche o catoliche, in contraposizion cul fassisim, caraterizât dal colôr neri, e cul comunisim, caraterizât dal colôr ros:  ce us impuartial se un al è ros o vert? Pensait a lavorà (Tarcisio Venuti, La cjase di Toni)

Proverbis:

• a brusâ lens verts, si fâs fum e no fûc
• al è miôr deventâ ros e dî di no, che no deventâ verts par vê il so
• al è miôr gjavâ il sterp che no mangjâ la nole verde
• i lens verts a fasin fum
• la sperance e je simpri verde
• un len sec al cjape plui prest che no un vert
• un len sec al cjape prime che no un vert
• vuê al è Sant Benedet se nol pie di vert al pie di sec